Wrth i Ŵyl y Banc agosáu, bydd newidiadau i gasgliadau. Ochr yn ochr â hyn, mae gweithredu diwydiannol wedi’i drefnu ar gyfer dydd Sadwrn 30 Awst, sy’n golygu bod angen i ni roi mesurau ar waith i darfu cyn lleied â phosib ar gwsmeriaid.
Fel y Gŵyl y Banc diwethaf, ni fyddwn yn cynnal unrhyw gasgliadau ar ddydd Llun 25 Awst, a bydd casgliadau’n symud o ddiwrnod. Os yw eich diwrnod casglu ar ddydd Llun, caiff eich gwastraff ei gasglu ar ddydd Mawrth. Os yw eich diwrnod casglu ar ddydd Mawrth, caiff eich gwastraff ei gasglu ar ddydd Mercher. Bydd y patrwm hwn yn parhau am weddill yr wythnos.
Os yw eich diwrnod casglu arferol ar ddydd Gwener, ac mae disgwyl i’ch gwastraff cyffredinol gael ei gasglu ar 29 Awst, rhowch eich gwastraff cyffredinol a’ch ailgylchu allan ddydd Gwener. Byddwn yn casglu eich gwastraff naill ai ar y dydd Gwener neu ar y dydd Sadwrn, ond mae’n bwysig eich bod chi’n rhoi eich bin gwastraff cyffredinol a’ch ailgylchu allan yn brydlon ar y dydd Gwener. Os nad ydym yn gallu casglu eich gwastraff ddydd Sadwrn oherwydd y gweithredu diwydiannol, ni fyddwn yn gallu casglu’r gwastraff hwn tan eich casgliad nesaf a drefnwyd.
Os oes disgwyl i’ch gwastraff gardd gael ei gasglu ar ddydd Gwener 29 Awst, oherwydd y gweithredu diwydiannol, ni allwn warantu y byddwn yn ei gasglu. Os nad ydym yn gallu casglu eich gwastraff gardd, byddwn yn ceisio darparu casgliad ychwanegol ar ddiwedd y flwyddyn i unrhyw un a gollwyd.
Mae’n ddrwg gennym am unrhyw anghyfleustra y gall hyn ei achosi.
Y datganiad diweddaraf ar Streiciau Unite gan Brif Weithredwr Dros Dro Cyngor Wrecsam, Alwyn Jones:
Mae Cyngor Wrecsam yn siomedig bod Unite yn symud ymlaen â’r gweithredu hwn. Mae gwasanaeth Strydlun yn parhau i fod yn un pwysig sy’n cael ei ddarparu i’r cyhoedd, a thros y blynyddoedd mae cymorth sylweddol wedi’i roi ar waith i ddatblygu’r rhan hon o’r gweithlu. Yn 2025, o drafodaethau a chytundeb â’r undeb llafur, cafodd y mwyafrif o weithredwyr Strydlun 1 gyfle i symud i rôl gweithredwr Strydlun 2, a oedd yn golygu cynnydd yn eu cyflog o £1,265 y flwyddyn, ynghyd â darpariaeth hyfforddiant ychwanegol. Dros y pedair blynedd diwethaf mae cynlluniau datblygu ac olyniaeth wedi’u cyflwyno ar gyfer y rheini sy’n dymuno dyrchafu i rôl math gweithiwr mewn gofal, trwy greu rôl Gweithredwr Strydlun 3, i gefnogi dilyniant gyrfa ymysg y gweithlu.
Oherwydd y sefyllfa ariannol anodd yr ydym ni yn Wrecsam, a’r holl wasanaethau cyhoeddus yng Nghymru, yn parhau i’w hwynebu, rydym yn edrych ar holl feysydd y Cyngor i weld ble y gellid gwneud arbedion effeithlonrwydd. Mae hwn yn un o lawer o newidiadau sydd wedi’u rhoi ar waith yn ystod y 12 mis diwethaf i gyflawni effeithlonrwydd a chynnal sefyllfa ariannol gytbwys i’r Cyngor, ynghyd â diogelu gwasanaethau i’r cyhoedd . Ymgynghorwyd ar y syniad o weithio ar ddydd Sadwrn yn lle ar ddydd Llun Gŵyl y Banc, a dim ond 20 ymateb a gafwyd, o weithlu o 245, a oedd yn anghytuno â’r newidiadau. Bydd yr arbediad penodol hwn yn lleihau ein costau presennol o £100,000, ac mae wedi mynd trwy brosesau a chylchoedd pwyllgorau a phrosesau ymgynghori’r Cyngor.
Er eglurder, ynghylch y cyllid ychwanegol gwerth £3,808,252.13 yr adroddwyd amdano, ar gyfer gwasanaethau amgylcheddol. Cafodd y cyllid hwn ei neilltuo i dalu costau rheoli gwastraff pecynwaith, a gall gynnwys uwchraddio neu ehangu cyfleusterau, didoli a phrosesu gwastraff pecynwaith, a rhoi technolegau ar waith sy’n gwella cyfraddau adfer deunyddiau a lleihau halogiad. Rhaid i bob Awdurdod Lleol allu dangos bod y grant wedi’i fuddsoddi mewn gwella cyfraddau ailgylchu. Heb dystiolaeth glir o hyn, mae’n debygol y bydd sancsiynau ariannol yn cael eu cymhwyso yn erbyn dyraniadau blynyddol y cyllid hwnnw yn y dyfodol.
Rydym yn parhau i fod yn ymrwymedig i’r gweithlu hwn, ac i ddarparu’r gwasanaeth yn fewnol i bobl Wrecsam. Rydym yn barod i gymryd rhan mewn trafodaethau i osgoi’r gweithredu hwn, ac yn gobeithio y gellir dod o hyd i ddatrysiad, ac y gellir cael perthynas bartneriaeth gadarnhaol unwaith eto â’r Undebau Llafur.
