Erthygl gwadd – Bwrdd Iechyd Prifysgol Betsi Cadwaladr
Mae Tim Pattenden wedi camu o’r ystlys i ddod yn Seren y Gêm, gyda chefnogaeth clwb Pêl-droed dan Gerdded Bwrdd Iechyd Prifysgol Betsi Cadwaladr.
Mae Tîm Gwella Iechyd (HIT) y Bwrdd Iechyd wedi partneru gyda Chynllun Cenedlaethol i Gyfeirio Cleifion i wneud Ymarfer Corff (NERS) i gynnal sesiynau yn Stadiwm Queensway, Wrecsam ar gyfer y rhai dros 40 oed sydd â’r angen mwyaf.
Cafodd Tim ei gyfeirio at NERS gan ei feddyg teulu oherwydd bod ganddo Golesterol Uchel, Diabetes Math 2 a Gorbwysedd ac ymunodd â’r tîm Pêl-droed dan Gerdded pan ddaeth i wybod am y bartneriaeth. Erbyn hyn, nid yw Tim yn cymryd unrhyw feddyginiaeth ar gyfer y clefydau anhrosglwyddadwy, diolch i’r ymarfer corff a’r gwelliannau iechyd y mae wedi’u gweld.
“Rwy’n hapus iawn gyda’r gefnogaeth rwyf wedi’i derbyn gan Alex o NERS a Robin o HIT, yn ogystal â phawb arall yn y grŵp,” meddai Tim. “Dydw i ddim yn medru disgrifio pa mor hapus ydw i. Mae wedi cael effaith enfawr ar fy mywyd.
“Mae Alex a Robin mor groesawgar a chymwynasgar. Maen nhw’n gwneud i bopeth ymddangos yn bositif ac yn bosibl. Mae gen i fwy o egni. Rydw i wedi colli 2.5 stôn. Rydw i’n teimlo’n fwy gobeithiol o ran fy iechyd ac mae fy mhwysedd gwaed i lawr, mae’r colesterol yn normal, ac mae fy lefelau siwgr yn ddiogel unwaith eto.
“Rydw i hefyd yn teimlo’n fwy hyderus o ran fy iechyd, ac yn obeithiol y gall wella ymhellach. Rydw i wrth fy modd fy mod yn rhan o’r grŵp sy’n chwarae pêl-droed. Roeddwn i’n meddwl ar un adeg na fyddwn i byth yn teimlo cystal ag ydw i nawr.
“Mae’r rhaglen hon wedi bod yn achubiaeth. Dim ond y rhai sydd ei hangen ac yn dod yn rhan ohoni sy’n deall ei heffaith mewn gwirionedd. Ar un adeg, roeddwn i wir yn teimlo fel petawn i’n marw’n araf. Mae NERS a’r bêl-droed dan gerdded wedi trawsnewid hynny.”
Yn ôl Robin Ranson, Uwch Ymarferydd Gwella Iechyd: “Mae Tim yn seren lwyr, a dylem ganmol ei waith caled a’i ymdrech i wneud hyn er lles ei iechyd corfforol a meddyliol. Roedd Alex yn arfer chwarae pêl-droed pan oedd yn iau, ac mae wedi mwynhau ymuno â’r clwb yn fawr iawn.
“Rydym wedi cychwyn y cynllun ers 12 mlynedd, ac mae wedi mynd o nerth i nerth. Rydym yn croesawu unrhyw un sy’n dymuno gwneud i ymuno â ni. Mae gennym bobl sydd wedi bod yn dod ers y dechrau, ac mae wedi helpu iechyd nifer fawr o bobl yn fawr iawn.”
Dywed Alex Davies, Gweithiwr Proffesiynol Cyfeirio Cleifion i wneud Ymarfer Corff yng Nghyngor Bwrdeistref Sirol Wrecsam: “Mae wedi bod yn bleser croesawu Tim i’r grŵp a gweld y trawsnewidiad yn ei iechyd corfforol a meddyliol. Rydw i a Robin mor falch bod ein sesiynau’n parhau i helpu pobl i gyflawni eu nodau ac rydym yn croesawu unrhyw un sydd yn dymuno dod yn fwy actif trwy bêl-droed i ymuno â ni.”
Mae’r Clwb Pêl-droed dan Gerdded ar gyfer pobl dros 40 oed ac fe’i cynhelir ar ddydd Llun a dydd Gwener o 10am i 11am. Nifer cyfyngedig o leoedd sydd gennym, felly mae angen archebu lle. Os oes gennych ddiddordeb ac os hoffech ddysgu mwy, cysylltwch â Robin a’r Tîm Gwella Iechyd ar 03000 859625, neu Alex a’r Cynllun Cenedlaethol Cyfeirio Cleifion i wneud Ymarfer Corff ar 01978 355826.
Gweler hefyd ein tudalen Facebook, Tîm Gwella Iechyd BIPBC, am ragor o wybodaeth am y clwb a beth arall y mae’r Tîm Gwella Iechyd yn ei gynnig.
Gall pobl hunangyfeirio at NERS trwy’r dudalen we hon.
