Mae Llwybr Celf Gyhoeddus newydd sbon yn dod i Wrecsam! Bydd y prosiect cyffrous hwn yn dod â gwaith celf a murluniau bywiog i fywiogi llawer o’r waliau gwag ledled canol y ddinas, gan arddangos diwylliant a threftadaeth gyfoethog ac unigryw Wrecsam.
Bydd y prosiect, a gydlynir gan yr artist Liam Stokes-Massey, o Wrecsam, yn gweld themâu fel treftadaeth, marchnadoedd a diwydiant Wrecsam yn cael eu hadlewyrchu yn y gweithiau celf dethol. Ar ôl paentio murluniau eisoes ar ddau safle yng nghanol y ddinas, mae Liam yn falch o weld y prosiect cyffrous hwn yn parhau ac yn ehangu i leoliadau eraill, a dywedodd:
“Rwy’n gyffrous iawn i weithio ar rywbeth rwy’n credu bod ein cymuned wedi bod yn haeddu ers peth amser. Mae Wrecsam wedi bod yn ganolbwynt creadigrwydd ers amser maith, felly pa ffordd well o ddathlu ein treftadaeth, hanes a diwylliant cyfoethog na thrwy’r cyfrwng hwnnw? Mae’n addo bod yn ddathliad lliwgar ac artistig sy’n denu pobl leol a thwristiaid ato.”
Dywedodd y Cynghorydd Nigel Williams, Aelod Arweiniol yr Economi, Busnes a Thwristiaeth:
- Cofrestru -
“Rwy’n falch iawn o weld Wrecsam yn cofleidio prosiect celf gyhoeddus mor fywiog ac arloesol. Bydd y llwybr hwn nid yn unig yn trawsnewid canol ein dinas ond hefyd yn dathlu ein hanes cyfoethog, ein diwylliant amrywiol, a gwaith caled ein pobl leol. Hoffwn ddiolch i Cydlynydd y Prosiect Liam Stokes-Massey a’r swyddogion sydd wedi gwneud gwaith anhygoel wrth ddod â’r weledigaeth hon yn fyw. Alla i ddim aros i weld y gweithiau celf gorffenedig a’r effaith gadarnhaol y byddant yn ei chael ar ein cymuned.”
Ariennir y prosiect gan y Gronfa Ffyniant Gyffredin ac fe’i cefnogir yn gryf gan Ddinas Diwylliant Wrecsam a thimau canol dinas a chelfyddydau CBSW . Daw’r prosiect yn ystod cyfnod o brosiectau adfywio lluosog sy’n digwydd ar draws canol y ddinas, gan gynnwys adnewyddu Marchnadoedd Cyffredinol a’r Cigyddion, Amgueddfa Bêl-droed Genedlaethol Cymru, canolfan newydd sbon ar gyfer diwydiannau creadigol, trawsnewid y Stryd Fawr a datblygiadau i’n seilwaith digidol.
Dywedodd y Cynghorydd Hugh Jones, Aelod Arweiniol Cymunedau, Cydweithio a Phartneriaethau:
“Mae’n fy llenwi â balchder i weld y prosiect hwn yn digwydd yn ystod cyfnod uchelgeisiol a chyffrous i Wrecsam. Bydd y llwybr celf cyhoeddus hwn yn ychwanegiad gwych i ganol dinas Wrecsam, nid yn unig yn gwella ei apêl weledol ond hefyd yn chwarae rhan hanfodol wrth ddenu twristiaid ac arddangos ein treftadaeth ddiwylliannol gyfoethog. Wrth i ni barhau i ymdrechu tuag at ein cais Dinas Diwylliant, mae mentrau fel hyn yn dangos ein hymrwymiad i greu cyrchfan fywiog a deniadol i ymwelwyr a phreswylwyr. Rwy’n edrych ymlaen at weld y waliau hyn yn dod yn fyw gyda murluniau bywiog sy’n adlewyrchu straeon ein cymuned.
Bydd y gweithiau celf yn ymddangos ar draws 6 safle newydd, gyda disgwyl i’r gwaith ddechrau yn fuan. Bydd y gweithiau celf newydd yn ategu murluniau pêl-droed presennol yn The Fat Boar, Maes Parcio’r Turf ac ar Lôn Crispin.
Bydd manylion llawn am waith celf a lleoliadau yn cael eu datgelu yn fuan! Dilynwch gynnydd y Llwybr Celf Gyhoeddus trwy dudalenau Facebook City Centre Events a Wrecsam2029, yn ogystal â gwefan Dinas Diwylliant.
