Mae Wrecsam yn falch o gyhoeddi ein bod wedi cyflawni statws Cymuned sy’n Dda i Bobl Hŷn Sefydliad Iechyd y Byd (WHO) yn swyddogol, gan gydnabod ein hymrwymiad i wneud y sir yn lle gwych i dyfu’n hŷn.
Dywedodd y Cynghorydd John Pritchard, Aelod Arweiniol dros Ofal Cymdeithasol i Oedolion: “Mae’r cyflawniad mawr hwn yn adlewyrchu cydweithrediad gwirioneddol rhwng Cyngor Wrecsam, sefydliadau lleol, unigolion allweddol, gwirfoddolwyr, grwpiau cymunedol, a’r cyhoedd. Mae wedi cael ei lunio gan ymdrech, brwdfrydedd a dealltwriaeth ar y cyd gan bobl ledled y sir sy’n rhannu ymrwymiad i gefnogi heneiddio’n gadarnhaol.”
Dathlwyd y cyflawniad yn nigwyddiad lansio Heneiddio’n Dda Wrecsam a gynhaliwyd yn Nhŷ Pawb ar 12 Chwefror, a ddaeth â 54 o sefydliadau ynghyd i arddangos y cymorth helaeth sydd ar gael i bobl hŷn ledled y sir.
Agorwyd y digwyddiad gan Gomisiynydd Pobl Hŷn Cymru, a ganmolodd ymroddiad Wrecsam i greu amgylcheddau cynhwysol a chefnogol i bobl o bob oedran. Roedd yr ymweliad yn foment bwysig wrth ddathlu’r gydnabyddiaeth ryngwladol hon.
Fel rhan o’n gwaith parhaus, rydym yn falch o ddefnyddio’r enw Heneiddio’n Dda Wrecsam oherwydd bod heneiddio yn rhywbeth sy’n wynebu pawb, ac rydym i gyd eisiau heneiddio’n dda. Mae’r enw yn adlewyrchu ein cred y dylai heneiddio fod yn gadarnhaol, cael ei gefnogi a’i ddathlu.
Mae cyflawni statws Cymuned sy’n Dda i Bobl Hŷn WHO yn garreg filltir arwyddocaol i Wrecsam ac mae’n adlewyrchu gwaith caled sefydliadau lleol, trigolion a phartneriaid cymunedol sydd wedi ymrwymo i helpu pobl i gadw’n egnïol, yn annibynnol ac yn gysylltiedig wrth iddynt heneiddio.
Adnewyddwch eich casgliadau bin gwyrdd ar gyfer 2026/27 – bydd y casgliadau’n dechrau ym mis Ebrill!
Mae mwy a mwy o aelwydydd LHDTC+ yn maethu yng Nghymru – Newyddion Cyngor Wrecsam
