Yn ddiweddar, mae adran draffig Cyngor Wrecsam wedi gweld cynnydd mewn adroddiadau o gerbydau sy’n methu â stopio ar groesfannau sebra ar draws y sir.
Atgoffir gyrwyr bod Rheol 195 o Reolau’r Ffordd Fawr yn nodi bod yn rhaid i yrrwr stopio ac ildio yr eiliad y mae cerddwr yn symud ar groesfan.
Dylai gyrwyr edrych allan am gerddwyr sy’n aros i groesi, a bod yn barod i arafu neu stopio, gan adael iddynt groesi.
Mae hyn er mwyn caniatáu i gerddwyr deimlo’n hyderus wrth groesi’r ffordd, yn enwedig plant, pobl oedrannus a’r rheini ag anableddau sy’n dibynnu ar groesfannau sebra yn fwy nag eraill oherwydd eu hoedran, eu gallu, a’u gallu i farnu cyflymder cerbydau sy’n dynesu.
Gall methu â stopio ar groesfan sebra mewn rhai amgylchiadau arwain at hysbysiad cosb gyda thri phwynt cosb a dirwy o £100.
A yw hyn, ynghyd â’r peryglon posib i ddiogelwch pobl ac efallai hyd yn oed bywydau pobl mewn rhai achosion, yn werth y risg mewn gwirionedd?
Gellir dod o hyd i ddadansoddiad llawn a disgrifiad o’r rheolau ar gyfer gyrwyr o amgylch croesfannau sebra yn Rheolau’r Ffordd Fawr.
Dywedodd y Cynghorydd David A Bithell, yr Aelod Arweiniol dros yr Amgylchedd: – “Mae diogelwch pawb ar ein ffyrdd yn flaenoriaeth allweddol yn Wrecsam, ac rwy’n bryderus iawn am y cynnydd mewn adroddiadau am yrwyr yn methu â stopio ar groesfannau sebra yn lleol.
“Felly, hoffwn achub ar y cyfle hwn i annog y cyhoedd i ailymgyfarwyddo â’r rhannau perthnasol o Reolau’r Ffordd Fawr ynghylch defnydd diogel o groesfannau sebra, a chymryd yr holl fesurau cywir i sicrhau rhwydwaith ffyrdd diogel i bawb yn Wrecsam.”
