Erthygl gwadd – Swyddfa Comisiynydd Heddlu a Throsedd Gogledd Cymru
Mae digwyddiad atal trosedd wedi’i ariannu’n llawn sy’n canolbwyntio ar fusnesau yng Ngogledd Cymru yn cael ei gynnal yn Wrecsam ar 5 Chwefror 2026. Mae perchnogion busnesau o bob rhan o’r rhanbarth yn cael eu hannog i archebu eu lle ac ymuno ar y diwrnod. Wedi’i drefnu mewn partneriaeth gan Dîm Troseddau Seiber Heddlu Gogledd Cymru, Swyddfa Comisiynydd Heddlu a Throsedd Gogledd Cymru, Canolfan Gwydnwch Seiber Cymru, a Llywodraeth Cymru, mae’r Digwyddiad Atal Trosedd Busnes Gogledd Cymru yn siŵr o fod yn ddigwyddiad hynod addysgiadol sy’n edrych ar sut i gadw busnesau’n saff rhag trosedd.
Mae trosedd busnes yn faes troseddoldeb sydd ar gynnydd yn gyflym. Y llynedd, amcangyfrifodd Llywodraeth y DU bod 26% (409,000) o’r holl adeiladau busnes yng Nghymru a Lloegr wedi dioddef unrhyw drosedd arolwg erledigaeth fasnachol (CVS) yn ystod y 12 mis blaenorol. Mae hyn yn cynnwys byrgleriaeth, fandaliaeth, lladrad sy’n gysylltiedig hefo cerbydau, lladradau, ymosodiadau neu fygythiadau, a thwyll. Mae’r ffigurau syfrdanol hyn yn golygu bod cynhadledd fel Digwyddiad Atal Trosedd Busnes Gogledd Cymru yn bwysicach rŵan nag erioed wrth i fusnesau barhau ymdopi hefo economi’r DU sy’n profi twf isel a bygythiadau eraill i hyder busnes.
Bydd y pynciau a drafodir yn cynnwys bygythiadau’r gadwyn gyflenwi; bygythiadau DA sy’n dod i’r amlwg; seiber hanfodol i fusnesau; diogelwch corfforol i fusnesau; a sut y bydd diogelu eich busnesau yn tawelu eich meddwl chi ar gyfer y dyfodol.
Bydd y digwyddiad hanner diwrnod rhad ac am ddim hwn yn cael ei gynnal ar 5 Chwefror 2026 yn Nhŵr Redwither ar Stad Ddiwydiannol Wrecsam, a bydd yn cynnwys cyfraniadau gan siaradwyr a sefydliadau o’r radd flaenaf gan gynnwys:
- Andy Dunbobbin, Comisiynydd Heddlu a Throsedd Gogledd Cymru
- Uned Troseddau Trefnedig Gogledd Orllewin Lloegr
- Canolfan Seibergadernid yng Nghymru
- D G Security Consultancy
- Global Security Management – DTCC
- Tîm Troseddau Seiber, Heddlu Gogledd Cymru
- Dr Huw Vaughan Jones, Jovasi Technology
Dywedodd Andy Dunbobbin, Comisiynydd Heddlu a Throsedd Gogledd Cymru: “Mae trosedd yn erbyn busnesau’n faes troseddoldeb sy’n cynyddu’n gyflym ac yn un dwi’n benderfynol o frwydro yn ei erbyn yng Ngogledd Cymru. Bydd y digwyddiad atal trosedd busnes hwn yn cynnig cyfle i berchnogion busnes ledled y rhanbarth ddod at ei gilydd, clywed gan yr arbenigwyr, a dysgu sut i gadw eu gweithrediadau’n ddiogel rhag troseddwyr. Mae digwyddiad fel hyn yn hanfodol ar adeg pan mae llawer o fusnesau yn cael trafferth hefo’r argyfwng costau byw a rhagolygon economaidd sensitif ac yn methu dioddef trosedd. Felly, dwi’n falch iawn o fod yn gweithio hefo’r Tîm Troseddau Seiber yn Heddlu Gogledd Cymru a phartneriaid allweddol eraill i gynnal y digwyddiad hwn. Byddwn ni’n annog pob perchennog busnes yn y rhanbarth i ystyried mynychu ac archebu eu lle rŵan.”
Dywedodd Ditectif Ringyll Roheryn Evans o Heddlu Gogledd Cymru: “Gall troseddau yn erbyn busnesau gael effaith fawr yn erbyn y gymuned ehangach. Gallai hyn fod yn unrhyw beth o’ch busnes yn rhan o gadwyn gyflenwi sy’n effeithio ar fusnesau eraill, neu os ydy trosedd yn effeithio’n ariannol arno. Mae’n golygu y bydd llai o arian yn ein heconomi leol ni.
“Gall trosedd effeithio ar fusnes naill ai’n gorfforol neu’n ddigidol ac mae’r ddau yn bwysig. Hefo’r sesiwn hon byddwn ni’n ymdrin hefo sut y gallwch chi warchod eich asedau corfforol er mwyn atal colli a difrod i eiddo, ond hefyd sut i ddiogelu eich seilwaith digidol a pha offer a safonau busnes am ddim all helpu i’ch gwarchod chi rhag troseddau trefnedig.”
Pryd: 5 Chwefror 2026, cyrraedd 8:30 dechrau 9.00-13.00
Lleoliad: Tŵr Redwither, Wrecsam, LL13 9XT
Cost: Yn rhad ac am ddim
Cynulleidfa: Perchnogion a gweithredwyr busnesau bach a chanolig ledled Gogledd Cymru
Tocynnau: Archebwch docynnau yma rŵan:
