Gŵyl ddiwylliannol fwyaf Ewrop yn dod i Wrecsam
Rhwng 2 a 9 Awst 2-25 cynhelir yr ŵyl fwyaf o’i math yn Ewrop yn Wrecsam!
Er bod mis Awst yn teimlo’n bell i ffwrdd, mae digonedd i’w wneud wrth baratoi ar gyfer yr Eisteddfod yn y misoedd nesaf.
Cymerwch ran – Get involved
- Cofrestru -
Mae’r Eisteddfod Genedlaethol yn rhoi hwb i’r iaith a diwylliant Cymreig yn yr ardal lle caiff ei chynnal bob blwyddyn. Gall pob un ohonom fod yn rhan o hynny. Un o’r ffyrdd symlaf o gymryd rhan ydi defnyddio faint bynnag o Gymraeg a fedrwch chi. Os ewch chi ar eich gwyliau i Ffrainc neu Sbaen, mae’n beth cwbl arferol i orffen sgwrs drwy ddweud ‘merci’ neu ‘gracias’ ond dydyn ni ddim bob amser yn meddwl am ddweud ‘diolch’ yng Nghymru. Pe byddai pawb yn dweud ‘diolch’ dim ond unwaith y diwrnod yn Wrecsam, byddai hynny’n golygu bod rhywun yn defnyddio’r Gymraeg 135,000 o weithiau mewn diwrnod, neu filiwn mewn wythnos – gyda dim ond un gair. Dychmygwch y ffigyrau pe byddem yn defnyddio ychydig o eiriau Cymraeg eraill hefyd. Rhowch gynnig arni > Give it a go!
Os ydych chi’n rhedeg busnes yn Wrecsam, gallai fod o fantais fawr ichi ddefnyddio rhywfaint o Gymraeg wrth baratoi ar gyfer yr Eisteddfod ac yn ystod yr ŵyl, boed hynny wyneb yn wyneb neu ar-lein, i ddenu cwsmeriaid o blith y miloedd o ymwelwyr a fydd yn dod i’r ardal. Ym Mhontypridd oedd yr Eisteddfod y llynedd a daeth 186,000 o bobl i’r dref gan roi hwb aruthrol i’r economi leol.
Mae’r Eisteddfod yn cael ei hariannu drwy amryw ffynonellau, ond un o’r rhai pwysicaf yw’r grwpiau lleol sy’n codi arian yn ardal yr ŵyl. Yn Wrecsam, ffurfiwyd grwpiau mewn gwahanol ardaloedd daearyddol yn ogystal ag un dudalen gyffredinol, Digwyddiadau Eisteddfod Wrexham Events . Ymunwch â’ch grŵp lleol chi i gael cymryd rhan! Mae’n ffordd wych o ddod i adnabod pobl newydd yn y gymuned leol ac ailgysylltu â hen ffrindiau.
Clywedog Ardal Alun Maelor Ceiriog Wrecsam-Canolog Dyfrdwy
*Ceir mwy o fanylion am yr ardaloedd hyn ar ddiwedd y ddogfen hon.
Cyhoeddir mwy o brosiectau a chyfleoedd i gymryd rhan yn nes at yr amser, yn ogystal â chyfleoedd i wirfoddoli ar Faes yr Eisteddfod. Ymunwch â’ch grŵp Facebook lleol i gael yr holl wybodaeth ddiweddaraf – gallwch hefyd gofrestru i gael newyddion drwy e-bost yn rheolaidd. COFRESTRWCH YMA
Meddai Llinos Roberts, Cadeirydd Pwyllgor Gweithredol Eisteddfod Wrecsam: “Mae’r cyfnod yma o baratoi ar gyfer Eisteddfod Wrecsam yn cynnig llu o gyfleoedd i bawb gymryd rhan mewn gwahanol weithgareddau a digwyddiadau codi arian yn y gymuned a dod yn nes at ddiwylliant Cymru a’r Gymraeg. A ninnau ar y ffin, rydyn ni’n Gymry brwd yn Wrecsam ac yn groesawgar hefyd. “Dewch inni weld yr Eisteddfod fel cyfle i dyfu ein hunaniaeth Gymreig yn Wrecsam.”
Dywedodd y Cynghorydd Hugh Jones, Cefnogwr y Gymraeg yng Nghyngor Wrecsam: “Mae yno rywbeth at ddant pawb yn yr Eisteddfod Genedlaethol. Bydd ymweld â’r Maes ym mis Awst yn gyfle gwych i drochi’ch hun yn niwylliant Cymru, p’un a ydych chi’n siarad Cymraeg bob dydd neu ddim o gwbl. Cymerwch ran, a gwnewch y gorau o’r adeg arbennig hon yn Wrecsam.”
Raffl fawr – the big raffle: £5 y tocyn a gwobr o dalebau gwyliau gwerth £3,000. Os hoffech chi wirfoddoli i werthu tocynnau raffl yn eich gwaith neu’ch cymuned leol, mae’r manylion cyswllt ar dudalen eich grŵp lleol ar Facebook.
GRWPIAU LLEOL
Digwyddiadau Eisteddfod Wrexham Events
Ardal Clywedog: Coedpoeth – Y Mwynglawdd – Gwynfryn – Bwlchgwyn -Brymbo – New Broughton – Tanyfron – Southsea – Pentre Broughton – Caego – Brynteg
Ardal Alun: Gwersyllt – Summerhill – Bradle – Llai – Marford – Gresffordd – Yr Orsedd/Rossett -Burton -Hossley
Maelor: Marchwiel – Bangor is y Coed – Cross Lanes – Owrtyn – Penley – Maelor -Holt -Ystad Diwydiannol.
Ceiriog: Dyffryn Ceiriog -Y Waun – Croesoswallt
Wrecsam Canolog: Borras – Gwaunyterfyn /Acton – Little Acton – Maesydre – Rhosnesi – Offa – Erddig – Hermitage – Brynyffynnon -Rhosddu – Garden Village – Grosvenor – Stansty – Caia
Ardal Dyfrdwy: Rhos – Ponciau – Johnstown – Rhiwabon – Acrefair – Garth -Froncysyllte – Penycae – Pentrebychan – Y Bers – Rhostyllen – Cefnmawr -Trevor – Rhosymedre
