Yn ddiweddar, mae Cynllun Treftadaeth Treflun Wrecsam wedi derbyn gwobr gan Gymdeithas Ddinesig Wrecsam gyda’r gymdeithas yn nodi “Mae’r Cynllun Treftadaeth Treflun wedi gweld cryn dipyn o weithgarwch yng nghanol y ddinas a’r cyffiniau gyda llawer o adeiladau yn yr ardal gadwraeth yn cael eu hadfer a’u hadnewyddu. Mae’r cynllun wedi arwain at adeiladau’n cael eu defnyddio unwaith eto, eu defnydd yn cael ei ymestyn, a gwelliant i’r amgylchedd adeiledig.”
Enghreifftiau o brosiectau wedi’u cwblhau o fewn y cynllun yw
- Stryt Henblas: Adnewyddiadau yn rhifau 2-10 a 38, gan gynnwys trosi lloriau cyntaf yn fflatiau.
- Stryt yr Hôb: Adfer adeiladau fel 58, 58a, a 59, gan arwain at hen loriau uchaf segur yn cael eu defnyddio unwaith eto fel fflatiau.
- Marchnadoedd Dan Do Wrecsam: (Dolen yma i ddarn blog Jess).
Mae’r gwaith adnewyddu adeiladau a ariennir drwy Gronfa Dreftadaeth y Loteri Genedlaethol a Chynllun Treftadaeth Treflun wedi gwella cymeriad yr ardal, wedi creu cyfleoedd cyflogaeth, wedi gwella adeiladau canol y ddinas yn ogystal â rhoi cyfle i ddefnyddio adeiladau amlwg yng nghanol y ddinas yn well.
Mae’r gwaith adfywio wedi cael ei wneud mewn ffordd sy’n ategu ac yn gwella’r dreftadaeth leol a’r adeiladau traddodiadol yng nghanol y ddinas.
Dywedodd y Cynghorydd Nigel Williams, Aelod Arweiniol dros yr Economi “Rydym wedi bod yn llwyddiannus iawn yn Wrecsam dros y blynyddoedd diwethaf wrth sicrhau cyllid allanol i helpu i wella golwg ac ymarferoldeb canol y ddinas ac adeiladau yn yr ardal gadwraeth. “Mae’n wych gweld bod llwyddiannau’r Cynllun Treftadaeth Treflun wedi cael eu cydnabod gyda gwobr gan Gymdeithas Ddinesig Wrecsam. “Bydd y gwaith yn parhau tuag at ein huchelgeisiau i wneud canol y ddinas yn gyrchfan gyffrous a bywiog i breswylwyr ac ymwelwyr Wrecsam.”
