Mae ymgynghoriad ar ddyfodol tair ysgol gynradd ym Mwrdeistref Sirol Wrecsam wedi’i lansio.
Yr wythnos diwethaf (16 Medi), rhoddodd Bwrdd Gweithredol Cyngor Wrecsam ei gymeradwyaeth i ymgynghori ar ddyfodol Ffederasiwn Ysgolion Dyffryn Dyfrdwy, sy’n cynnwys ysgolion cynradd yn Froncysyllte, Garth a Pentre.
Mae gofyn i aelodau’r cyhoedd – gan gynnwys rhieni a gofalwyr – rannu eu barn ar gynigion i gau’r ysgol yn Froncysyllte, tra bydd yr ysgolion yn Garth a Pentre yn cael eu cadw.
Mae niferoedd Froncysyllte wedi bod yn gostwng dros y pum mlynedd diwethaf, gyda dim ond 11 o ddisgyblion wedi’u cofrestru yn ystod y flwyddyn academaidd ddiwethaf, a dim ond pedwar disgybl sydd wedi’u cofrestru hyd yma yn y flwyddyn academaidd gyfredol.
Pe bai penderfyniad yn cael ei wneud i gau’r ysgol yn Froncysyllte, byddai disgyblion yn cael cynnig lle mewn ysgol amgen.
Dywedodd y Cynghorydd Phil Wynn, yr Aelod Arweiniol dros Addysg: “Am y pum mlynedd diwethaf, mae nifer y disgyblion ym mhob un o’r tair ysgol wedi bod ymhell o fod yn llawn.
“Gyda niferoedd disgyblion mor isel a chymaint o leoedd gwag, mae’n gwneud synnwyr adolygu strwythur Ffederasiwn Dyffryn Dyfrdwy ac ystyried a yw’n gynaliadwy cadw’r tair ysgol.
“Fel cyngor, mae’n rhaid i ni wneud yn siŵr bod ysgolion yn hyfyw yn hirdymor, ond rydym hefyd yn sensitif i anghenion a dewisiadau rhieni a gofalwyr – felly rydym yn annog pobl i gymryd rhan yn yr ymgynghoriad hwn fel y gallwn gael eu barn cyn penderfynu sut i symud ymlaen.”
Bydd yr ymgynghoriad ar agor tan 7 Tachwedd.
