Gofynnir i breswylwyr helpu i ffurfio dyfodol gofal dementia trwy gymryd rhan yn Ymgyrch Wrando Gymunedol Wrecsam, ac mae cyfle tan ddiwedd mis Hydref i chi ddweud eich dweud a gwneud gwahaniaeth.
Mae’r ymgyrch yn rhan o brosiect ehangach Cymru’n Gwrando a gaiff ei gefnogi gan Gwelliant Cymru a Citizens UK, ac mae ambell ffordd wahanol o gymryd rhan.
Arolwg gwrando
I ddechrau, gallwch helpu trwy lenwi’r arolwg gwrando, sy’n fyw tan 31 Hydref. Dim ond tua 10 munud mae’n ei gymryd i lenwi’r arolwg ac mae’n gofyn am eich barn am nifer o bethau sy’n ymwneud â gofal dementia, gan gynnwys ‘beth yw gofal dementia da?’ a ‘beth ddylai fod ar gael i bobl sy’n byw gyda dementia yn y gymuned hon?’.
- Cofrestru -
Mae gwella gofal dementia yn fater i bawb, felly rhowch o’ch amser os gallwch.
LLENWCH YR AROLWG GWRANDO RŴAN
Digwyddiad Hwb Lles
Ffordd arall o gymryd rhan yw archebu eich lle i ymweld â’r Hwb Lles rhwng 10am a 3pm ddydd Iau, 12 Hydref, 2023.
Bydd y digwyddiad yn galluogi pobl sy’n byw gyda dementia, gofalwyr di-dâl sy’n cefnogi pobl i fyw gyda dementia, gweithwyr proffesiynol a grwpiau/ sefydliadau cefnogi i ddod ynghyd mewn un lle i drafod pa fath o gefnogaeth dementia sydd ar gael o amgylch Wrecsam a thrafod pa gefnogaeth arall sydd ei hangen.
Bydd gan weithwyr proffesiynol o faes iechyd a gofal cymdeithasol, staff o BIPBC, elusennau a grwpiau a sefydliadau cefnogaeth lleol eu stondinau unigol eu hunain er mwyn i chi drafod eich anghenion a siarad am unrhyw beth sy’n ymwneud yn benodol â dementia yr hoffech siarad amdano’n bersonol.
Bydd cyflwyniad am ddementia hefyd a byddwch chi’n cael clywed siaradwyr o amryw leoliadau.
Darperir te a choffi. Gallwch archebu eich lle trwy Eventbrite.
Methu dod ar 12 Hydref?
Os na allwch chi ddod i’r Hwb Lles ar 12 Hydref ond yn awyddus i siarad â rhywun yn bersonol, peidiwch â phoeni, bydd ein Cydlynydd Cynllunio sy’n Canolbwyntio ar yr Unigolyn yn ymweld â nifer benodol o leoliadau ar draws Wrecsam i gasglu adborth yn y gymuned.
Y dyddiadau sydd wedi’u cadarnhau hyd yma yw:
- Dydd Mercher 13 Medi, 10am-3pm – Neuadd Blwyf y Waun, y Waun LL14 5NA
- Dydd Mawrth 19 Medi, 10am-11.30am – Neuadd Goffa Ymddiriedolaeth Cofeb Ryfel Gresffordd a’r Cyffiniau, oddi ar Stryd Fawr Gresffordd, LL12 8PS
- Dydd Iau Medi 21, 10am-12pm – Hen Llyfrgell Carnegie (hen ystafell llyfrgell) 17 Ffordd y Parc, Coedpoeth, LL11 3TD
- Dydd Gwener 6 Hydref, 10am-12pm – Llyfrgell y Rhos, Ffordd y Tywysog, Rhosllanerchrugog, LL14 1AB
Mae dyddiadau pellach wrthi’n cael eu trefnu, ond byddwn yn rhannu’r manylion gyda chi cyn gynted ag sy’n bosibl.
“Mae eich barn yn wirioneddol bwysig”
Dywedodd y Cynghorydd John Pritchard, Aelod Arweiniol Gofal Cymdeithasol i Oedolion: “Mae dementia’n effeithio ar gymaint o bobl a’u teuluoedd mewn gymaint o wahanol ffyrdd. Mae siarad gyda phobl eraill a rhannu’r profiadau hyn yn ein helpu nid yn unig i ddatblygu’r gefnogaeth sy’n bodoli eisoes, ond yn bwysig, mae’n gadael i ni weld pa gefnogaeth arall sydd ei hangen hefyd.
“Bydd Ymgyrch Wrando Gymunedol Wrecsam yn ein helpu i ganfod y pethau pwysig hyn, ac rydym am geisio casglu gymaint o wybodaeth ag sy’n bosibl i helpu i wella gofal dementia. Mae eich barn yn wirioneddol bwysig. Llenwch yr arolwg gwrando, ac os fedrwch chi, dewch i’r Hwb Lles ar 12 Hydref.”
Derbyniwch y newyddion a’r wybodaeth ddiweddaraf yn syth i’ch mewnflwch.
