Erthyl Gwadd – CThEM
Gallai miloedd o deuluoedd sy’n gweithio yng Nghymru fod yn colli cyfle i gael hyd at £2,000 y flwyddyn i helpu gyda chost gofal plant, mae Cyllid a Thollau EM (CThEM) yn atgoffa rhieni, cyn hanner tymor mis Chwefror.
Mae Gofal Plant sy’n Rhydd o Dreth – y taliad gofal plant atodol o 20% – yn rhoi hyd at £500 i deuluoedd cymwys sy’n gweithio bob tri mis (neu £1,000 os yw eu plentyn yn anabl) tuag at gost clybiau gwyliau, clybiau cyn ac ar ôl ysgol, gwarchodwyr plant a meithrinfeydd, a chynlluniau gofal plant achrededig eraill.
Dewch i weithio ym maes gofal cymdeithasol, er mwyn eich cymuned.
Defnyddiwyd y cynllun gan dros 11,035 o deuluoedd sy’n gweithio ym mis Medi 2021, yng Nghymru. Yn gyffredinol, talodd CThEM dros £35 miliwn o daliadau atodol, a rannwyd rhwng bron i 316,000 o deuluoedd ledled y DU – cynnydd o tua 90,000 o deuluoedd o’u cymharu â mis Medi 2020.
Mae’r cynllun Gofal Plant sy’n Rhydd o Dreth ar gael ar gyfer plant hyd at 11 oed, neu 17 oed os oes gan y plentyn anabledd. Am bob £8 a roddir mewn cyfrif, bydd teuluoedd yn cael taliad atodol o £2 ychwanegol gan y llywodraeth.
Gall rhieni a gofalwyr wirio a ydynt yn gymwys a chofrestru ar gyfer Gofal Plant sy’n Rhydd o Dreth drwy GOV.UK.
Meddai Myrtle Lloyd, Cyfarwyddwr Cyffredinol CThEM ar gyfer Gwasanaethau i Gwsmeriaid:
“Mae’r taliad atodol o 20% gan y llywodraeth yn cynnig cymorth i deuluoedd sy’n gweithio i dalu am ofal plant, boed hynny’n filiau meithrinfeydd, clybiau ar ôl ysgol neu glybiau gwyliau. Chwiliwch am ‘Tax-Free Childcare’ ar GOV.UK i gael gwybod mwy.”
Drwy dalu arian i mewn i’w cyfrifon, gall teuluoedd elwa o’r taliad atodol o 20% a defnyddio’r arian i dalu am gostau gofal plant pan fydd angen iddynt wneud hynny. Gellir agor cyfrifon ar unrhyw adeg o’r flwyddyn a gellir eu defnyddio ar unwaith.
Er enghraifft, os oes gan rieni a gofalwyr blant oed ysgol ac yn defnyddio clybiau gwyliau yn ystod gwyliau’r ysgol, gallent dalu arian i’w cyfrifon drwy gydol y flwyddyn. Mae hyn yn golygu y gallent rannu cost gofal plant a manteisio ar y taliad atodol o 20% gan y llywodraeth ar yr un pryd.
Mae Gofal Plant sy’n Rhydd o Dreth hefyd ar gael i blant cyn oed ysgol sy’n mynychu meithrinfeydd, gwarchodwyr plant neu ddarparwyr gofal plant eraill. Yn aml bydd gan deuluoedd sydd â phlant iau gostau gofal plant uwch na theuluoedd sydd â phlant hŷn, felly mae’r cynilion sy’n rhydd o dreth wir yn gallu gwneud gwahaniaeth.
Gall darparwyr gofal plant hefyd gofrestru ar gyfer cyfrif darparwr gofal plant drwy GOV.UK i gael taliadau gan rieni a gofalwyr drwy’r cynllun.
[button color=”” size=”large” type=”square_outlined” target=”new” link=” https://fynghyfrif.wrecsam.gov.uk/cy/service/care_jobs_in_wrexham”]DOD O HYD I SWYDDI GOFALU LLEOL[/button]
