Mae gan bawb eitemau gwastraff mawr sydd angen eu gwaredu, ac mae sawl ffordd i’w wneud yn ddiogel ac yn gyfreithlon.
Mae tair Canolfan Ailgylchu Gwastraff Cartref ledled Wrecsam ar gyfer gwastraff o gartrefi trigolion Wrecsam. Ni ellir gwaredu gwastraff masnachol yn y safleoedd hyn, gan gynnwys gwaredu sbwriel gan wasanaethau clirio ‘dyn a’i fan’. Maent wedi’u lleoli ar Ystâd Ddiwydiannol Wrecsam, Plas Madoc a Brymbo. Cewch wybodaeth am beth allwch waredu, yn ogystal ag amseroedd agor ac ati, ar ein gwefan.
Os oes gennych lawer iawn o sbwriel i’w waredu, a methu mynd i un o’n Canolfannau Ailgylchu, sicrhewch eich bod yn defnyddio cwmni gydag enw da i wneud hyn ar eich rhan. Ni all y cwmni sy’n gweithredu ar eich rhan ddefnyddio ein canolfannau ailgylchu gwastraff cartref, rhaid iddynt ei waredu mewn cyfleuster trwyddedig preifat.
Mae nifer o achlysuron lle mae trigolion wedi talu i rywun waredu eu sbwriel, heb iddynt sylweddoli eu bod mewn gwirionedd yn cymryd eu harian a gwaredu’r sbwriel lle bynnag y gallant. Gallai hyn wneud preswylwyr yn atebol os oes modd olrhain y sbwriel yn ôl atynt.
Felly, os ydych yn talu rhywun i waredu eich sbwriel, sicrhewch eu bod yn fasnachwyr gonest. Dylent fod â Thrwydded Cludydd Gwastraff. Os nad oes ganddynt y drwydded hon, peidiwch â’u defnyddio – yn fwy na thebyg byddent yn tipio’r gwastraff yn anghyfreithlon a chi fydd yn gyfrifol ac yn atebol i erlyniad a dirwy os cânt eu dal neu os gellir olrhain y sbwriel yn ôl i chi. Felly cofiwch ofn i weld eu Trwydded a’u gwirio.
Gwasanaeth Casglu Gwastraff Swmpus Cyngor Wrecsam…
Gallwch ddefnyddio ein gwasanaeth casglu gwastraff swmpus hefyd. Mae gwastraff swmpus yn cyfeirio at eitemau sy’n rhy fawr i’w cludo gyda’r casgliad sbwriel arferol. Gall hyn gynnwys eitemau fel dodrefn, nwyddau gwyn a chyfarpar garddio.
Gallwch drefnu i gael gwared ag eitemau swmpus y cartref ar-lein, a byddwn yn casglu’r eitemau gennych. Gellir casglu hyd at wyth eitem am isafswm o £47.50 (bydd ffioedd ychwanegol ar gyfer mwy nag wyth eitem, gyda phob eitem ychwanegol yn costio £9.50).
“Adroddiadau o ddigwyddiadau difrifol o dipio anghyfreithlon”
Meddai’r Cynghorydd Terry Evans, Aelod Arweiniol yr Amgylchedd: “Mae enghreifftiau ysgytiol o dipio anghyfreithlon wedi’i adrodd i ni, ac mae’n costio arian i’w waredu. Rydym bob amser yn gwirio os oes unrhyw beth yn y sbwriel er mwyn canfod y perchennog, ac os oes, ni fyddwn yn oedi cyn erlyn.
Defnyddiwch gwmni gydag enw da neu ddefnyddiwch ein gwasanaeth casgliadau swmpus neu ymwelwch ag un o’n tair canolfan ailgylchu gwastraff y cartref. Peidiwch â mentro a bod yn agored i erlyniad, oherwydd ymddygiad amheus rhywun arall.”
Yr ydym yn cynnig casgliad ymyl palmant o wastraff gardd/organig yn y bin gwyrdd yn unig, nid ydym yn cynnig unrhyw wasanaeth casglu arall ar gyfer gwastraff gwyrdd, pridd na rwbel.
Efallai yr hoffech hefyd ddarllen Bwletin arbed ynni Cyngor Wrecsam
