Ar draws yr awdurdod, mae gennym dimau ymroddedig yn ein gwasanaethau llyfrgell sy’n gweithio’n ddi-baid i gyflwyno amserlen o weithgareddau yn eu cymunedau lleol i ddarparu ar gyfer pawb.
Yn ogystal â silffoedd llawn llyfrau i weddu i bob chwaeth, mae ein llyfrgelloedd lleol yn darparu mwy na deunyddiau darllen. Heddiw, byddwn yn edrych ar yr hyn a fydd yn eich disgwyl ar eich ymweliad nesaf â llyfrgell Cefn Mawr.
Wedi’i leoli ar Lôn Plas Kynaston, mae gan ymwelwyr amrywiaeth o ddigwyddiadau i ddewis ohonynt.
Dewch i greu crefftau
Mae digon i’w wneud i’r artistiaid yn ein plith yma yn llyfrgell Cefn Mawr. Bob dydd Llun rhwng 1 a 4pm, maent yn cynnal y grŵp Gwau, Crosio a Chrefftau.
Mae’r grŵp wedi’i gynllunio ar gyfer unrhyw un sydd â diddordeb mewn celf a chrefft. Mae hwn yn ofod ardderchog i’r rheini sy’n hoff o wau, gwnïo, brodio, gwneud cardiau, crosio, macramé, i enwi ond ychydig.
Gall mynychwyr ymuno a dod â beth bynnag rydych yn gweithio arno ar hyn o bryd. Fel arall, gallwch alw heibio a chael sgwrs gyda chyd-grefftwyr.
Nid oes cost am fynychu a darperir lluniaeth, ond dewch â’ch cwpan eich hun.
Ar gyfer yr ymwelwyr iau â’r llyfrgell, mae Clwb Lego bob dydd Mercher rhwng 3.15 a 4pm.
Mae’r sesiynau hyn yn helpu plant i ddysgu sgiliau meddal amrywiol a fydd yn eu dysgu sut i weithio a rhyngweithio ag eraill. Trwy ffordd o ddysgu sy’n llawn hwyl, gall plant ddatblygu sgiliau meddwl creadigol, gwaith tîm, cyfathrebu, datrys gwrthdaro a datrys problemau.
Mae’r sesiynau yn addas ar gyfer plant 4 oed a hŷn ac nid oes cost am fynychu. Nid oes angen cadw lle, dim ond galw heibio a chymryd rhan.
Gwasanaethau i’r gymuned
Mae sesiynau yn cael eu cynnal yn rheolaidd yn llyfrgell Cefn Mawr a all helpu’r gymuned leol yn ei chyfanrwydd.
Ar yr ail a’r pedwerydd dydd Llun o bob mis, gall pobl fynychu sesiynau galw heibio Cyngor ar Bopeth rhwng 1.30 a 4.30pm.
Yma, gall ymwelwyr gael cyngor annibynnol, diduedd a chyfrinachol am ddim ar unrhyw bwnc gan gynnwys cyflogaeth, budd-daliadau a dyled. Maent yn eich helpu i ddod o hyd i ffordd ymlaen, beth bynnag yw’r broblem, felly galwch heibio a sgwrsio ag un o’u harbenigwyr.
Ar y trydydd dydd Llun o bob mis rhwng 2 a 4pm, cynhelir sesiwn galw heibio gyda’r Gwasanaeth Awtistiaeth Integredig.
Os ydych yn byw gydag awtistiaeth, neu os ydych yn cefnogi oedolyn neu blentyn awtistig, gallwch ddod draw i’r sesiynau i gael cyngor a chymorth a chael gwybod am wasanaethau arbenigol a allai eich helpu.
Mae sesiynau am ddim ac mae croeso i chi eu mynychu ar unrhyw bwynt heb fod angen cadw lle ymlaen llaw.
Digwyddiadau i ddod â ni at ein gilydd
Ar ddydd Iau cyntaf y mis, mae grŵp Cefn yn Cofio i’r rhai sydd eisiau sgwrsio am atgofion y gorffennol neu ddim ond eistedd a gwrando ar rai straeon o’r dyddiau a fu.
P’un a ydych yn lleol neu’n dod o rywle pellach i ffwrdd, mae croeso i chi ymuno â’r grŵp wrth iddynt gwrdd rhwng 3 a 4pm. Mae croeso i chi ddod ag unrhyw eitemau neu luniau yr hoffech eu rhannu gyda’r grŵp.
Mae’r digwyddiad am ddim hwn, sy’n cael ei gynnal mewn partneriaeth rhwng llyfrgell Cefn Mawr ac Amgueddfa Cefn Mawr, yn agored i bawb gyda lluniaeth ar gael.
Os ydych yn hoffi darllen a sgwrsio am lyfrau, mae yna grŵp perffaith i chi. Ar ddydd Iau olaf pob mis, rhwng 2 a 3pm, mae’r Grŵp Darllen i Oedolion yn cwrdd i ddod â darllenwyr brwd o’r un anian at ei gilydd.
Mae hwn yn ddigwyddiad am ddim sy’n agored i bawb a darperir lluniaeth ysgafn.
I gael rhagor o fanylion am yr holl ddigwyddiadau a grybwyllir yma a mwy, ewch i’n tudalen digwyddiadau llyfrgelloedd. Fel arall, gallwch ffonio llyfrgell Cefn Mawr ar 01978 820938 neu e-bostio cefnmawr.library@wrexham.gov.uk am ragor o wybodaeth.
