Mae 10 mlynedd wedi bod ers i Gymru arwain y gad fel y wlad gyntaf yn y DU i wneud dangos sgoriau hylendid bwyd yn gyfreithiol orfodol. Ers mis Tachwedd 2013, mae’r gyfraith wedi mynnu bod busnesau yng Nghymru’n dangos eu sticer sgôr hylendid bwyd mewn lle amlwg – fel y drws ffrynt, y fynedfa neu ffenestr amlwg.
Mae cwsmeriaid a busnesau wedi parhau i weld manteision y Cynllun Sgoriau Hylendid Bwyd ac mae’n cael ei ddathlu, yn haeddiannol, fel un o gyflawniadau mwyaf y wlad o ran iechyd y cyhoedd yn yr 21ain ganrif.
Ddegawd yn ddiweddarach, mae’r cynllun wedi annog gwell safonau ymysg busnesau bwyd yn Wrecsam, gyda thros 92.9% o fusnesau’n dangos sgôr o 5 a 98.8% gyda sgôr o 3 neu uwch.
Cymryd hylendid bwyd a safonau o ddifrif
Mae’r sticeri du a gwyrdd amlwg sydd i’w gweld mewn bwytai, caffis ac archfarchnadoedd ac ar-lein yn rhoi sicrwydd i bobl bod busnesau ym Mwrdeistref Sirol Wrecsam yn cymryd hylendid bwyd a safonau o ddifrif.
Mae sticeri sgoriau hylendid bwyd yn ffordd syml a thryloyw o ddangos canlyniadau archwiliad hylendid sydd wedi’i wneud gan swyddogion yr Awdurdod Lleol. Mae’r cynllun yn rhoi hyder i gwsmeriaid bod bwyd yn cael ei baratoi a’i weini mewn modd glân a bod y busnes yn bodloni’r gofynion cyfreithiol ar gyfer hylendid bwyd.
Mae’r cynllun yn galluogi pobl i wneud penderfyniadau doeth am y mannau lle maent yn prynu bwyd ac yn bwyta bob dydd. Mae mwy o fanteision hefyd – mae gorfodi busnesau i arddangos eu sgôr hylendid hefyd yn eu hannog i wella eu safonau hylendid. Gall pob busnes bwyd ennill y sgôr uchaf, sef ‘5 – da iawn’ drwy wneud yr hyn mae angen iddynt ei wneud dan gyfraith bwyd. Cofiwch – mae sgôr hylendid bwyd yn dda ar gyfer busnes ac yn rhoi mantais gystadleuol i’r rhai sy’n ennill y sgôr hylendid orau.
Mae’r cynllun wedi cael effaith go iawn ar hylendid. Mae safonau hylendid mewn busnesau bwyd wedi gwella o ganlyniad i’r cynllun gorfodol, a 96% o fusnesau yng Nghymru bellach yn dangos sgôr o ‘3’ neu uwch. Mae ymchwil yn dangos bod busnesau sydd â sgôr uwch yn llai tebygol o fod yn gyfrifol am achosion o salwch bwyd.
Dywedodd Nathan Barnhouse, Cyfarwyddwr yr Asiantaeth Safonau Bwyd yng Nghymru:
“Rydyn ni’n falch o gynnal y Cynllun Sgoriau Hylendid Bwyd mewn partneriaeth ag Awdurdodau Lleol a Llywodraeth Cymru. Mae Awdurdodau Lleol yn hollbwysig i lwyddiant y cynllun. Drwy ymgysylltu efo busnesau bwyd yn rheolaidd, maen nhw wedi bod yn allweddol i wella safonau hylendid i’r lefel sydd i’w gweld heddiw. Mae’r cynllun yn caniatáu i bobl bleidleisio gyda’u punnoedd neu drwy glicio botwm a dewis y busnesau sy’n cymryd hylendid bwyd o ddifrif.”
Holwch ynglŷn â’r Safon Hylendid Bwyd, chwiliwch am y sticer, neu edrych ar-lein cyn prynu bwyd.
Efallai yr hoffech hefyd ddarllen Gwiriwch fod y tacsi yr ydych yn mynd iddo yn gyfreithlon!
