Erthyl Gwadd: CThEF
Bydd Cyllid a Thollau Ei Fawrhydi (CThEF) yn cyhoeddi 1.5 miliwn o becynnau adnewyddu credydau treth blynyddol ar gyfer blwyddyn dreth 2023 i 2024 i gwsmeriaid rhwng 2 Mai a 15 Mehefin 2023.
Unwaith y bydd cwsmeriaid yn cael eu pecyn adnewyddu blynyddol bydd ganddyn nhw hyd at 31 Gorffennaf 2023 i wirio bod yr wybodaeth yn gywir ac i roi gwybod i CThEF am unrhyw newidiadau i’w hamgylchiadau a allai effeithio ar eu hawliad.
Mae credydau treth yn helpu teuluoedd sy’n gweithio drwy roi cymorth ariannol targededig iddynt, felly mae’n bwysig nad yw pobl yn colli’r cyfle i gael arian y mae ganddynt hawl iddo.
Mae dau fath o becynnau adnewyddu:
- os oes llinell goch ar draws y dudalen gyntaf a bod ‘atebwch nawr’ wedi’i nodi arni, bydd angen i gwsmeriaid gadarnhau eu hamgylchiadau i adnewyddu eu credydau treth
- os oes llinell ddu ar draws y dudalen gyntaf a bod ‘gwiriwch nawr’ wedi’i nodi arni, bydd angen i gwsmeriaid wirio bod eu manylion yn gywir. Os ydynt yn gywir, nid oes angen iddynt wneud dim a bydd eu credydau treth yn cael eu hadnewyddu’n awtomatig
Bydd angen i fwy na 500,000 o gwsmeriaid credydau treth ymateb i CThEF erbyn y dyddiad cau i gadarnhau eu hamgylchiadau ar gyfer blwyddyn dreth 2023 i 2024, neu risgio cael eu taliadau wedi eu stopio.
Gall cwsmeriaid adnewyddu eu credydau treth yn rhad am ddim drwy GOV.UK neu ap CThEF.
Dywedodd Myrtle Lloyd, Cyfarwyddwr Cyffredinol CThEF ar gyfer Gwasanaethau i Gwsmeriaid, “Mae credydau treth yn rhoi cymorth ariannol hanfodol i deuluoedd, felly mae’n bwysig bod cwsmeriaid yn cadw llygad am eu pecyn adnewyddu ac yn adnewyddu erbyn 31 Gorffennaf. I gael manylion ar sut i adnewyddu, chwiliwch am ‘manage my tax credits’ ar GOV.UK.”
Bydd y pecynnau adnewyddu yn cael eu hanfon mewn sypiau. Mae CThEF yn atgoffa cwsmeriaid sydd heb gael eu pecynnau adnewyddu i aros tan ar ôl 15 Mehefin cyn cysylltu â CThEF am eu pecyn.
Mae CThEF wedi rhyddhau fideo i esbonio sut y gall cwsmeriaid credydau treth ddefnyddio ap CThEF i fwrw golwg dros eu manylion, eu rheoli a’u diweddaru.
Mae adnewyddu ar-lein yn hawdd ac yn gyflym. Gall cwsmeriaid fewngofnodi i GOV.UK i wirio cynnydd eu cais i adnewyddu, i gael sicrwydd bod y cais yn cael ei brosesu, ac i wybod pryd y byddant yn clywed oddi wrth CThEF. Gall cwsmeriaid sy’n dewis i ddefnyddio ap CThEF wneud y canlynol:
- adnewyddu eu credydau treth
- diweddaru newidiadau i’w hawliad
- gwirio amserlen y taliadau ar gyfer eu credydau treth
- cael gwybod faint y maent wedi’i ennill ar gyfer y flwyddyn
Os oes newid yn amgylchiadau cwsmer a allai effeithio ar ei hawliadau am gredydau treth, mae’n rhaid iddo roi gwybod i CThEF am y newid. Mae amgylchiadau a allai effeithio ar daliadau credydau treth yn cynnwys newidiadau i’r canlynol:
- trefniadau byw
- gofal plant
- oriau gwaith, neu
- incwm (cynnydd neu ostyngiad)
Bydd credydau treth yn cael eu disodli gan Gredyd Cynhwysol erbyn 2024. Bydd cwsmeriaid sy’n cael credydau treth yn cael llythyr gan yr Adran Gwaith a Phensiynau (DWP) yn rhoi gwybod iddynt pryd i hawlio Credyd Cynhwysol. Mae’n bwysig bod cwsmeriaid yn hawlio erbyn y dyddiad cau a ddangosir yn y llythyr i barhau i gael cymorth ariannol gan y bydd eu credydau treth yn dod i ben hyd yn oed os ydynt yn penderfynu peidio â hawlio Credyd Cynhwysol. Ond does dim angen aros am eu llythyr trosglwyddo, a gall cwsmeriaid wneud cais i symud i Gredyd Cynhwysol yn gynt, os yw’n iawn iddynt.
Mae’r llywodraeth yn cynnig Help i Gartrefi. Trowch at GOV.UK i gael gwybod pa gymorth gyda chostau byw y gall unigolion fod yn gymwys ar ei gyfer.
Mae troseddwyr yn defnyddio dyddiadau cau, fel yr un ar gyfer adnewyddu credydau treth, i dwyllo pobl a allai fod yn disgwyl clywed gan CThEF i rannu eu manylion bancio neu bersonol eraill. Os yw galwad ffôn, neges destun neu e-bost yn annisgwyl, peidiwch â rhoi gwybodaeth breifat nac ateb, a pheidiwch â lawrlwytho atodiadau na chlicio ar gysylltiadau. Mae’n iawn gwrthod neu anwybyddu unrhyw geisiadau – dim ond troseddwyr fydd yn ceisio rhuthro neu gynhyrfu pobl. Mae CThEF hefyd yn rhybuddio pobl i beidio â rhannu eu manylion mewngofnodi gydag unrhyw un arall. Ewch i GOV.UK i gael rhagor o wybodaeth am sut i roi gwybod am sgam neu weithgarwch amheus.
Wedi methu casgliad bin? Rhowch wybod i ni ar-lein – mae’n hawdd.
[button color=”” size=”large” type=”square_outlined” target=”new” link=”https://myaccount.wrexham.gov.uk/cy/service/Report_a_missed_waste_collection”] RHOWCH WYBOD AM GASGLIAD BIN A FETHWYD [/button]
