Fel rhan o thema allweddol y Parth Buddsoddi ar gyfer gwella seilwaith lleol, mae Trafnidiaeth Cymru yn cael cyllid i wella gwasanaethau bysus ar draws Wrecsam a Sir y Fflint.
Disgwylir i Gyngor Bwrdeistref Sirol Wrecsam dderbyn cyfran o £20m gan Barth Buddsoddi (PB) Wrecsam a Sir y Fflint, i wella gwasanaethau bysus ar draws Wrecsam.
Wedi’i hariannu gan Lywodraeth Cymru a’r DU, bydd Rhaglen Trawsnewid Bysus y PB yn gwella gwasanaethau bysus lleol, gan helpu pobl i gael mynediad at gyfleoedd cyflogaeth a datblygu sgiliau mewn cyrchfannau allweddol, fel Stad Ddiwydiannol Wrecsam a Stad Ddiwydiannol Llai.
Gwelliannau arfaethedig
Y gwelliannau arfaethedig yw:
- Mwy o fysiau i, ac o Ystâd Ddiwydiannol Wrecsam
- Teithiau bws newydd yn gynnar yn y bore i wella cysylltiadau â gwasanaethau sy’n teithio i Ystâd Ddiwydiannol Wrecsam
- Gwell llwybrau bysiau traws-ddinasol, fel bod modd teithio i Ystâd Ddiwydiannol Wrecsam heb y ffws o newid o fws i fws yng nghanol y ddinas
- Rhai teithiau bws wedi’u hymestyn i wasanaethu ystâd ddiwydiannol ger pentref Llai
Manteision i weithwyr a busnesau presennol / yn y dyfodol
Dywedodd y Cynghorydd David A Bithell, yr Aelod Arweiniol sy’n gyfrifol am Drafnidiaeth Strategol “Mae croeso mawr i’r cyllid sydd wedi’i dderbyn i gyflwyno gwasanaethau bws newydd a gwell i gysylltu cyflogaeth a mynediad i waith.
“I breswylwyr Bwrdeistref Sirol Wrecsam, bydd hyn yn dod â manteision uniongyrchol mynediad gwell at swyddi, cefnogi gweithwyr shifft, cysylltiadau rhwng mwy o gymunedau; a mynediad haws i deithio ar draws y rhanbarth yn gyffredinol.
“I fusnesau lleol, rydym yn gwybod y bydd y gwelliannau hyn hefyd yn golygu dalgylch gweithlu ehangach, gan ganiatáu mwy o dwf busnes, llai o dagfeydd a pharcio; yn ogystal ag annog teithio mwy cynaliadwy o fewn y gweithlu.”
Arolwg teithio: Ennill e-daleb gwerth £250 cyn y Nadolig!
Hefyd, os ydych chi’n gweithio yn un o’r ardaloedd cyflogaeth allweddol yn Wrecsam, yn un o’r gweithleoedd/sefydliadau addysgol canlynol, rydym yn gofyn i chi gymryd rhan mewn arolwg teithio:
- Ystâd Ddiwydiannol Wrecsam (gan gynnwys Parc Busnes Redwither)
- Ystâd Ddiwydiannol Llai
- Prifysgol Wrecsam
- Coleg Cambria – Ffordd y Bers
- Coleg Cambria – Yale
Bydd yr ymatebion i’r arolwg yn cael eu defnyddio i fonitro a gwerthuso effeithiolrwydd cyflwyno’r gwelliannau i’r gwasanaeth bysus.
Ni ddylai’r arolwg gymryd mwy na 10 munud i’w gwblhau.
Fel diolch i chi am gymryd yr amser i gwblhau’r arolwg hwn, byddwn yn cynnig y cyfle i chi gymryd rhan mewn raffl gwobrau am ddim i ennill taleb Amazon gwerth £250.
Mae’r raffl wobrau yn cau ar 13 Rhagfyr 2026, a bydd yr enillydd yn cael ei ddewis a’i hysbysu ar 15fed Rhagfyr 2026.
Diweddariadau ar y gwelliannau yn y dyfodol
Byddwch yn gallu gwirio am ddiweddariadau pellach ar y Rhaglen Trawsnewid Bysus o fewn y wybodaeth am y Parth Buddsoddi ar wefan y cyngor, neu cadwch lygad am ddiweddariadau ar ein cyfryngau cymdeithasol.
