Mae adroddiad newydd gan Estyn yn cynrychioli canlyniad gwych i Ysgol Llan-y-Pwll, a gafodd ei chanmol i’r cymylau.
Tynnwyd sylw at lawer o nodweddion cryfaf yr ysgol a chanmolwyd staff am eu hymroddiad diwyro.
Canlyniadau Estyn
Ymwelodd Arolygwyr Estyn â’r ysgol ddiwedd mis Hydref 2025. Nododd yr adroddiad, a gyhoeddwyd ychydig cyn y Nadolig, “Mae Ysgol Llan-y-Pwll yn gymuned ddysgu ofalgar, hapus a chynhwysol lle ceir ymdeimlad cryf fod pob disgybl yn aelod o deulu mawr, clos.”
“Wrth i’r ysgol barhau i dyfu dros amser, mae’r pennaeth yn darparu cyfeiriad strategol clir sy’n hyrwyddo datblygu cynaliadwy a gwelliant parhaus mewn ffordd bwrpasol ac effeithiol. Mae’r weledigaeth hon, sy’n seiliedig ar gydweithrediad diwyd rhwng holl randdeiliaid yr ysgol, yn sicrhau’r cyfleoedd gorau i bob disgybl o fewn cymuned ddysgu ofalgar a Chymreig. Fel un tîm effeithiol, mae’r pennaeth yn cael ei chefnogi’n ddiwyd gan staff ymroddedig sy’n rhoi pwyslais ar sicrhau bod hapusrwydd, diogelwch a lles pob disgybl wrth wraidd holl waith yr ysgol a’i hethos.”
Nododd yr adroddiad mai “Un o rinweddau amlycaf yr ysgol yw gwybodaeth gadarn arweinwyr a staff am bob plentyn a’r ffordd y maent yn anelu’n angerddol at ddiwallu eu hanghenion lles a dysgu unigol trwy ddulliau tracio cynnydd priodol.”
Canmolodd arolygwyr addysgu a dysgu gan nodi, “Mae staff yn ystyried awgrymiadau disgyblion yn briodol ac yn gweithio’n gynhyrchiol gyda nhw a’u
rhieni i ddatblygu cwricwlwm sy’n ymgorffori natur gymunedol yr ysgol yn bwrpasol. Maent yn darparu ystod eang o brofiadau ysgogol ac ystyrlon sy’n sicrhau diddordeb a mwynhad disgyblion yn eu gweithgareddau dysgu.”
“Un o gryfderau amlwg yr ysgol yw’r dyheadau uchel a rennir gan arweinwyr a staff i feithrin sgiliau Cymraeg disgyblion. Mae’r berthynas gynhyrchiol rhwng yr ysgol a’r rhieni a chymuned ehangach yr ysgol yn gryfder amlwg. Mae arweinwyr yn gweithredu’n rhagweithiol i fagu hyder rhieni wrth gefnogi datblygiad ieithyddol eu plant yn yr iaith Gymraeg.”
Nododd yr adroddiad hefyd, “Dros amser, mae’r rhan fwyaf o ddisgyblion, gan gynnwys y rhai o aelwydydd incwm isel, yn datblygu ystod o sgiliau yn gyson, gan gynnwys eu sgiliau llythrennedd.”
Teulu ysgol croesawgar a chynhwysol
Dywedodd y Pennaeth Rhiannon James: “Rydw i mor falch o’n plant, staff, rhieni, llywodraethwyr a’n teulu ysgol ehangach. Ers i’r ysgol agor ym mis Medi 2022, mae pawb wedi cyfrannu at ddatblygu a sefydlu Ysgol Llan-y-Pwll fel cymuned groesawgar a chynhwysol lle mae disgyblion yn teimlo’n hapus, yn cael eu cefnogi a’u hysbrydoli i ddysgu, tyfu a llwyddo gyda’i gilydd.”
“Rydyn ni i gyd yn gweithio’n galed i sicrhau ein bod yn cynnig ystod eang o gyfleoedd a phrofiadau cyffrous i’n holl ddysgwyr a’u teuluoedd, ac rwy’n falch iawn bod yr arolygwyr wedi cydnabod hyn. Nodwyd bod arweinwyr yn sicrhau bod y ddarpariaeth o fewn yr ardaloedd dysgu dan do ac awyr agored yn gyfoethog ac yn cynnig cyfleoedd gwerthfawr i ddisgyblion chwarae, dysgu ac ymchwilio mewn amgylchedd diddorol.”
“Hoffwn ddiolch i’n holl blant, staff, llywodraethwyr a rhieni am eu cefnogaeth a’u hymroddiad diwyro i’n hysgol. Rydym yn gyffrous i adeiladu ar y sylfaen gadarn hon a sicrhau bod Ysgol Llan-y-Pwll yn parhau i ffynnu a thyfu fel amgylchedd cynhwysol, uchelgeisiol a chefnogol i bob disgybl. Dros y blynyddoedd nesaf, wrth i ddisgyblion symud i’r grwpiau blwyddyn hŷn, edrychwn ymlaen at barhau i ddatblygu ymhellach fel ysgol.”
Tyst i ymroddiad staff
Ychwanegodd y Cynghorydd Becca Martin, Cadeirydd y Llywodraethwyr: “Rwy’n falch iawn o ganlyniad arolwg Estyn cyntaf Ysgol Llan-y-Pwll. Mae’n dyst i arweinyddiaeth y pennaeth ac ymroddiad yr holl staff sy’n ymdrechu i greu amgylchedd dysgu meithringar a dysgwyr brwdfrydig. Ar ran y Llywodraethwyr, hoffwn ganmol yr holl staff am eu gwaith caled, ac edrychwn ymlaen at weithio gyda’n gilydd i adeiladu ar y llwyddiant hwn.”
Gwnaeth arolygwyr yr argymhellion canlynol yn dilyn yr ymweliad:
- Darparwch weithgareddau dysgu sy’n sicrhau her gyson i ddisgyblion.
- Datblygwch rolau arwain disgyblion i gael dylanwad ehangach ar fywyd a gwaith yr ysgol.
- Grymuswch y corff llywodraethu i weithredu prosesau hunanwerthuso yn fwy effeithiol.
Mae’r adroddiad llawn ar gael i’w weld ar wefan Estyn.
