Mae gwahoddiad i berchnogion eiddo manwerthu ac eiddo masnachol wneud cais am grant newydd sydd wedi’i fwriadu i helpu i adfywio canol dinas Wrecsam.
Bydd Cyngor Wrecsam yn defnyddio £220,000 o gyllid Trawsnewid Trefi i gynnig grantiau o hyd at £50,000 i wella tu blaen adeiladau a dod â defnydd yn ôl i unedau masnachol gwag.
Mae Trawsnewid Trefi yn fenter gan Lywodraeth Cymru, sydd wedi ei llunio i helpu i adfywio canol trefi, gan sicrhau eu bod yn parhau i chwarae rôl allweddol mewn economïau a chymunedau lleol.
Pwy all wneud cais?
Mae grantiau ar gael ar gyfer perchnogion eiddo manwerthu ac eiddo masnachol sydd â safleoedd yng nghanol y ddinas.
Croesewir ceisiadau hefyd gan lesddeiliaid sydd â saith mlynedd neu fwy ar ôl ar eu tenantiaeth, ac sydd wedi cael caniatâd ysgrifenedig gan eu landlord i wneud y gwelliannau arfaethedig.
Ar gyfer beth mae modd defnyddio’r cyllid?
Mae modd defnyddio’r arian i gynorthwyo i ariannu gwaith allanol i du blaen adeiladau, gan gynnwys:
- Blaen siopau
- Gwella ffenestri arddangos
- Gwella arwyddion
- Ffenestri a drysau
- Toeau a simneiau
- Rendro a gwaith strwythurol
Gall gwaith mewnol – a gwelliannau i effeithlonrwydd ynni (e.e. inswleiddio’n well) – fod yn gymwys hefyd, ochr yn ochr â phecyn cynhwysfawr o welliannau allanol.
Rhaid i’r gwaith gael ei gwblhau erbyn 28 Chwefror 2025.
Mae mwy o wybodaeth, gan gynnwys sut i wneud cais, ar wefan Cyngor Wrecsam. Grant Datblygu Eiddo Trawsnewid Trefi | Cyngor Bwrdeistref Sirol Wrecsam
Dywedodd y Cynghorydd Nigel Williams, Aelod Arweiniol yr Economi: “Mae hwn yn gyfnod eithriadol o gyffrous i Wrecsam, a bydd y grantiau hyn o gymorth i adfywio a gwella eiddo yng nghanol y ddinas.
“Byddwn yn annog perchnogion a lesddeiliaid cymwys i wneud cais am y cyllid hwn, a helpu i ddod â chwa o fywyd newydd i’w hadeiladau.
“Wrecsam yw dinas ddiweddaraf Cymru, ac mae’n bwysig bod canol ein dinas yn fywiog a chyffrous.”
Dywedodd Ysgrifennydd Cabinet Tai, Llywodraeth Leol a Chynllunio, Julie James: “Drwy ein rhaglen Trawsnewid Trefi, rydym wedi darparu gwerth miliynau o bunnoedd o gyllid i Gyngor Bwrdeistref Sirol Wrecsam i adfywio canol y ddinas, cefnogi bywiogrwydd a chreu cyfleoedd cyflogaeth.
“Bydd y fenter hon yn Wrecsam yn arwain at well cynnig yng nghanol y dref ac yn rhoi defnydd newydd eto i adeiladau segur sydd yng nghanol y gymuned – dwy elfen sy’n allweddol i’n rhaglenni adfywio.
“Rwy’n edrych ymlaen at weld sut y bydd y buddsoddiad diweddaraf yma o fudd i’r gymuned ac yn helpu i sbarduno’r economi leol.”
