Mae adran gofal cymdeithasol Cyngor Wrecsam a Choleg Cambria wedi ymuno i greu Academi Gofal Cymdeithasol Wrecsam.
Mae academi Gofal Cymdeithasol Wrecsam yn cynnig lleoliadau i ddysgwyr sy’n astudio ar y rhaglen diploma iechyd a gofal cymdeithasol yn y coleg ac mae’n bartneriaeth unigryw ac arloesol rhwng cyngor lleol a choleg addysg uwch.
Mae’r academi wedi bod ar waith ers 2022 ac wedi bod yn llwyddiannus yn cynnig 76 lleoliad i ddysgwyr, gan eu paru a’u cefnogi gyda mentoriaid ymroddedig o faes gofal cymdeithasol.
Mae myfyrwyr yn cael cyfle i brofi gofal cymdeithasol yn llawn, fel eu bod yn deall y rôl bwysig y mae’n ei chwarae yn cefnogi pobl sy’n agored i niwed gyda thosturi ac empathi.
Trwy ddal diddordeb myfyrwyr yn gynnar yn eu gyrfa ac arddangos yr amrywiaeth o rolau, rydym yn helpu i godi proffil gofal cymdeithasol fel opsiwn gyrfa yn Wrecsam.
Cynigir lleoliadau i ddysgwyr sydd â diddordeb mewn gyrfa yn y maes gofal cymdeithasol o fewn ein timau amrywiol, gan gynnwys y gwasanaethau darparwr mewnol, timau gwaith cymdeithasol, canolfannau teuluoedd, therapi galwedigaethol, timau cymorth dilyniant ac sy’n canolbwyntio ar y person a’r gwasanaeth gwybodaeth i deuluoedd.
Dywedodd y Cynghorydd John Pritchard, aelod arweiniol dros ofal cymdeithasol, iechyd a lles oedolion: “Mae’r cydweithrediad hwn rhwng y cyngor a Choleg Cambria yn dangos ein bod yn sefydliad sy’n dysgu, sydd wedi ymrwymo i ddatblygu’r gweithlu yn y dyfodol.
“Mae’r paratoi a’r cynllunio rydyn ni wedi’i wneud yn golygu bod Academi Gofal Cymdeithasol Wrecsam yn cynnig profiad gwaith ystyrlon a chyfleoedd dysgu i’r myfyrwyr.”
Croesawodd Coleg Cambria hefyd ymweliad diweddar Dawn Bowden, y Gweinidog dros Blant a Gofal Cymdeithasol yng Nghymru, i adeilad iechyd gwerth £14m, Nant, ar safle Iâl yn Wrecsam – cartref Academi Gofal Cymdeithasol Wrecsam.
Dywedodd Vicky Edwards, Is-Bennaeth Astudiaethau Technegol yng Ngholeg Cambria: “Roeddem yn falch iawn o groesawu Dawn Bowden i adeilad iechyd Nant ac arddangos effaith Academi Gofal Cymdeithasol Wrecsam. Mae’r bartneriaeth hon gyda Chyngor Wrecsam yn creu cyfleoedd gwerthfawr i ddysgwyr, gan roi profiad ymarferol iddynt tra’n helpu i ddatblygu gweithlu medrus a thosturiol yn y dyfodol.
“Rydym yn falch o’r gwahaniaeth y mae’n ei wneud i fyfyrwyr a gwasanaethau gofal cymdeithasol ledled Wrecsam. Trwy ymgysylltu â dysgwyr yn gynnar ac amlygu’r amrywiaeth o lwybrau gyrfa sydd ar gael, rydym yn codi proffil gofal cymdeithasol ac yn ysbrydoli’r genhedlaeth nesaf.”
