Mae Cynllun Prydlesu Cymru Llywodraeth Cymru yn sicrhau cyflenwad o dai o safon ac yn sicrhau bod eiddo gwag yn cael eu defnyddio unwaith eto ledled Cymru.
Mae Cynllun Lesio Cymru yn rhoi cyfle i landlordiaid a pherchnogion cartrefi gwag lesio eu heiddo i’r awdurdod lleol am rhwng 5 ac 20 mlynedd.
Mae’r cynllun yn helpu i fynd i’r afael â digartrefedd ac yn cefnogi pobl sy’n gadael llety dros dro.
Mae pob un o’r 22 Awdurdod Lleol yng Nghymru bellach yn cymryd rhan yn y cynllun, gyda 430 o eiddo wedi’u cofrestru ledled Cymru ar hyn o bryd.
Yn ddiweddar, ymwelodd Ysgrifennydd y Cabinet dros Dai a Llywodraeth Leol, Jayne Bryant, â Wrecsam i weld drosti’i hun sut mae’r cynllun yn gwneud gwahaniaeth i berchnogion eiddo a meddianwyr yn yr ardal.
Cyfarfu Ysgrifennydd y Cabinet â’r landlordiaid Deri a Julie Rowlands, sydd â sawl eiddo wedi cofrestru a’r cynllun, gan sicrhau bod cartrefi a fyddai fel arall wedi aros yn wag yn cael eu defnyddio unwaith eto o fewn y gymuned.
Cyfarfu hefyd â thenant un o’u heiddo, Eddie Parsons, sydd bellach â chartref lle gall gynnal trefniadau gwarchodaeth a rennir ar gyfer ei blentyn.
Dywedodd Ysgrifennydd y Cabinet: “Mae Wrecsam yn enghraifft ardderchog o sut mae Cynllun Prydlesu Llywodraeth Cymru nid yn unig yn darparu tai, ond hefyd sefydlogrwydd a’r cyfle i deuluoedd aros gyda’i gilydd. Dyma’n union yr oeddem yn gobeithio ei gyflawni pan wnaethom lansio’r rhaglen.
“Rydyn ni’n gwybod bod cartrefi gwag yn adnodd gwastraffus yn ein cymunedau ac mae’r cynllun hwn yn ffordd wych o gynyddu nifer y tai fforddiadwy, ac edrychaf ymlaen at weld hyd yn oed mwy o berchnogion eiddo a landlordiaid yn cofrestru cyn bo hir.”
Dywedodd y Cynghorydd David A Bithell, Aelod Arweiniol Cyngor Wrecsam dros Dai a Newid Hinsawdd: “Mae’r cynllun prydlesu yn ffordd wych o ddod â chartrefi gwag yn ôl i ddefnydd – gan roi hwb pwysig i gymunedau lleol, landlordiaid a thenantiaid.
“Mae’r cynllun yn cael effaith gadarnhaol yn Wrecsam ac mae’n enghraifft wych o sut mae cynghorau lleol a Llywodraeth Cymru yn cydweithio i wella mynediad at gartrefi.”
