Y mis hwn mae Cyngor Wrecsam wedi dyfarnu cymorth ariannol i 26 o brosiectau diolch i gynllun Grantiau Gweithgynhyrchu Busnesau Bach a Chanolig (BBaChau), gyda chefnogaeth Parth Buddsoddi Sir y Fflint a Wrecsam.
Mae’r cynllun a lansiwyd yn ddiweddar yn caniatáu i fusnesau gweithgynhyrchu yn Wrecsam wneud cais am grantiau o £5,000 hyd at £100,000 i helpu i brynu offer newydd, datgarboneiddio neu wneud addasiadau i eiddo, ac ennill achrediad neu ardystiad yn eu maes gwaith.
Mae’r cynllun yn rhan o raglen Parth Buddsoddi Sir y Fflint a Wrecsam, sy’n cael ei chefnogi gan Lywodraeth Cymru a Llywodraeth y DU ac wedi’i gydlynu gan Uchelgais Gogledd Cymru.
Cafwyd 51 o fynegiadau o ddiddordeb, a 35 o geisiadau grant yn ystod y rownd gyntaf hon.
Aeth ceisiadau drwy broses sgorio gadarn, a chymeradwywyd 26 o brosiectau ar gyfer cyllid hyd at gyfanswm gwerth o £1,286,302.
Cystadleuol iawn
Dywedodd y Cynghorydd Mark Pritchard, Arweinydd Cyngor Wrecsam a Chadeirydd Uchelgais Gogledd Cymru: “Mae hon yn garreg filltir gyffrous i Wrecsam ac rwy’n falch iawn o weld ein rownd gyntaf o grantiau yn cael eu dyrannu.
“Bydd mentrau fel y cynllun grant hwn yn chwarae rhan hanfodol wrth sbarduno twf economaidd yn Wrecsam dros y blynyddoedd nesaf – gan helpu i greu swyddi o ansawdd uchel a chryfhau swyddogaeth y rhanbarth fel pwerdy ar gyfer uwch-ddiwydiannau yng Nghymru.
“Mae’n gyfnod cyffrous a hoffwn bwysleisio fy niolch i Lywodraeth Cymru a Llywodraeth y DU am gefnogi’r Parth Buddsoddi.”
Roedd hon yn rownd gyntaf gystadleuol iawn o gyllid, lle roedd yn rhaid i fusnesau ddangos yn glir sut y byddai eu prosiect yn cyfrannu at dri amcan craidd y Parth Buddsoddi:
- Creu 6,000 o swyddi newydd ar gyfer Sir y Fflint a Wrecsam.
- Sicrhau £1 biliwn o fuddsoddiad yn y sector preifat.
- Datblygu dros 5.5 miliwn troedfedd sgwâr o arwynebedd llawr masnachol.
Roedd yn ofynnol i fusnesau hefyd gyfrannu cyllid o 30% tuag at gost eu prosiect.
Dywedodd y Cynghorydd Nigel Williams, yr aelod arweiniol dros yr economi, busnes a thwristiaeth: “Fel cyngor rydyn ni eisiau helpu busnesau lleol i dyfu a bod yn llwyddiannus, oherwydd mae’r llwyddiant hwnnw’n creu cyfleoedd cyflogaeth a gyrfa i bobl leol, mae’n magu hyder ymhlith buddsoddwyr, ac mae’n helpu i roi Wrecsam ar y map.
“Mae’r Parth Buddsoddi wedi rhoi cyfle gwych i ni roi hwb enfawr i’r sector gweithgynhyrchu yn Wrecsam dros y degawd nesaf, a dim ond y dechrau yw’r cynllun grant hwn. Mae’n gyfnod cyffrous i’r rhanbarth.”
Rownd nesaf o gyllid
Bydd prosiectau na ddyfarnwyd grant iddynt yn ystod y rownd gyntaf yn gallu gwneud cais eto yn ddiweddarach yn yr hydref, ynghyd â busnesau eraill.
Os ydych chi’n rhedeg BBaCh yn Wrecsam yn y sector gweithgynhyrchu / gweithgynhyrchu uwch ac yn chwilio am gyllid grant i alluogi twf, beth am ddysgu mwy?
Cymerwch olwg ar wefan Cyngor Wrecsam neu cysylltwch â thîm Parth Buddsoddi’r cyngor.
