Mae cwpl o ofalwyr maeth o Wrecsam wedi cael eu cydnabod am eu gwydnwch, eu tosturi a’u hymrwymiad diwyro i blant gyda Gwobr Rhagoriaeth Maethu genedlaethol.
Mae Del a Gary, sydd wedi bod yn ofalwyr maeth gyda’u hawdurdod lleol yn Wrecsam ers 25 mlynedd, wedi cael eu henwi’n enillwyr Gwobr Cysylltiadau Gydol Oes The Mortgage Brain yng Ngwobrau Rhagoriaeth Maethu 2026 y Rhwydwaith Maethu. Rhoddodd y beirniaid ganmoliaeth i’r gefnogaeth hanfodol maen nhw’n ei darparu i blant a phobl ifanc yn eu gofal.
Rhoddwyd canmoliaeth i’r cwpl am eu gallu i greu cartrefi diogel, meithringar a sefydlog lle mae plant yn teimlo eu bod yn cael eu parchu, eu gwerthfawrogi ac yn rhydd i fod yn nhw eu hunain. Fe wnaeth eu gweithiwr cymdeithasol goruchwyliol, Hayley Roberts, a’u henwebodd ar gyfer y wobr, dynnu sylw at yr ymagwedd ddigynnwrf a thosturiol maen nhw’n ei dangos tuag at bob plentyn, gan helpu plant sydd wedi profi trawma neu adfyd i deimlo’n ddiogel a meithrin perthnasoedd llawn ymddiriedaeth.
Dywedodd Hayley: “Mae’r gwahaniaeth maen nhw’n ei wneud yn amlwg yn sefydlogrwydd, twf a hyder y plant maen nhw’n gofalu amdanynt. Mae eu hymroddiad yn mynd ymhell y tu hwnt i ddiwallu anghenion dyddiol. Maen nhw’n darparu cyfleoedd, anogaeth ac ymdeimlad o berthyn sy’n galluogi plant i ffynnu.”
Roedd y beirniaid yn edmygu gallu Del a Gary i addasu eu cefnogaeth i ddiwallu anghenion unigol pob plentyn maen nhw’n eu croesawu i’w cartref. Tynnodd Hayley sylw hefyd at sut maen nhw’n parhau i fod yn amyneddgar, yn fyfyriol a chanolbwyntio ar atebion, hyd yn oed yn y sefyllfaoedd mwyaf heriol, gan roi lles plant wrth wraidd eu penderfyniadau bob amser.
Ychwanegodd: “Mae Del a Gary yn dangos dealltwriaeth ddofn o gymhlethdodau maethu. Maen nhw’n creu amgylchedd diogel, meithringar a sefydlog lle mae plant yn teimlo eu bod yn cael eu parchu, eu gwerthfawrogi ac yn gallu bod yn nhw eu hunain.”
Dywedodd y Cynghorydd Rob Walsh, Aelod Arweiniol Cyngor Wrecsam dros Wasanaethau Plant a Theuluoedd: “Rydyn ni’n falch iawn o weld Del a Gary yn derbyn y gydnabyddiaeth haeddiannol hon.
“Mae eu tosturi, eu hymroddiad a’u 25 mlynedd o ymrwymiad i faethu yn Wrecsam wedi gwneud gwahaniaeth gwirioneddol a pharhaol i fywydau’r plant a’r bobl ifanc maen nhw wedi gofalu amdanynt. Trwy greu cartref diogel, cariadus a meithringar, maen nhw wedi helpu plant i ffynnu, ac mae’r wobr hon yn dyst i’r effaith ryfeddol maen nhw’n parhau i’w chael.”
Y Gwobrau Rhagoriaeth Maethu yw gwobrau gofal maeth mwyaf mawreddog y DU, sy’n dathlu cyflawniadau eithriadol mewn maethu ac yn cydnabod y rhai sy’n gwneud cyfraniadau eithriadol i ofal maeth bob dydd.
Cynhaliwyd y seremoni wobrwyo yn Theatr Repertory Birmingham ddydd Iau 12 Tachwedd ac fe’i cyflwynwyd gan y digrifwr a’r gofalwr maeth o Ynys Môn, Kiri Pritchard McLean. Ymhlith yr enwogion a oedd yn bresennol oedd yr awdur plant enwog Jacqueline Wilson, Bardd Llawryfog y Plant Patrice Lawrence a seren The Traitors Judy Wilson.
Mae gofalwyr maeth o Gymru wedi cael eu canmol am y gefnogaeth maen nhw’n ei chynnig i blant a phobl ifanc ledled y wlad yn y Gwobrau Rhagoriaeth Maethu blynyddol.
O’r 17 gwobr, roedd wyth enillydd o Gymru, gyda gofalwyr maeth a’u teuluoedd yn cael eu cydnabod am y tosturi, yr empathi a’r gefnogaeth maen nhw wedi’u dangos i blant a phobl ifanc mewn gofal maeth.
Enillodd teulu maeth arall o Wrecsam hefyd y wobr am Hunaniaeth Ddiwylliannol a Pherthyn, ond byddai’n well ganddynt beidio â chael eu henwi mewn deunydd cyhoeddusrwydd.
I gael rhagor o wybodaeth am ddod yn ofalwr maeth yn Wrecsam, ewch i wrecsam.maethucymru.llyw.cymru
