Mae Cyngor Wrecsam wedi derbyn dros £1.3 miliwn gan Grant Diogelwch Tomenni Glo Llywodraeth Cymru i gyflawni gwaith gwella diogelwch ar domenni glo segur yn y fwrdeistref sirol dros y tair blynedd nesaf.
Mae Wrecsam yn ymfalchïo yn ei chefndir mwyngloddio, sydd yn y gorffennol wedi darparu miloedd o swyddi yn y gymuned leol.
Fodd bynnag, er i’r mwynglawdd olaf gau ym 1986, mae’r fwrdeistref sirol wedi cael ei gadael gydag etifeddiaeth hirdymor ar ffurf llawer iawn o sborion mwyngloddio.
Mae tomenni glo segur yn her fawr i’r cyngor, a bydd y cyllid yn darparu adnoddau ychwanegol i hwyluso asesu pellach a chyflawni gwaith cynnal a chadw diogelwch ar domenni glo segur.
Mae’r gwaith yn cynnwys gwelliannau draenio, asesiadau sefydlogrwydd llethrau a gwaith adfer cysylltiedig.
Dywedodd y Cynghorydd Mark Pritchard, Arweinydd Cyngor Wrecsam: “Mae’r gwaith adfer sy’n gysylltiedig yn faich sylweddol a hirdymor ar adnoddau’r cyngor, felly mae’n fuddiol iawn derbyn y cyllid ychwanegol hwn.
“Rwyf wedi ymgyrchu dros nifer o flynyddoedd am gyllid er mwyn bwrw ymlaen â gwaith sy’n gysylltiedig â Banc Glofa’r Bers a Thomen Wilderness Gresffordd. Felly, hoffwn ddiolch i Lywodraeth Cymru am ddyfarnu dros £1.3 miliwn i’r awdurdod, fydd yn mynd tuag at hwyluso’r gwaith sydd ei angen ar y safleoedd hynny ac ar safleoedd categori C mewn mannau eraill.”
Dywedodd y Cynghorydd Hugh Jones, Aelod Arweiniol Cynllunio a Diogelu’r Cyhoedd: “Ni ddylid tanamcangyfrif y bygythiad i ddiogelwch y cyhoedd a’r amgylchedd sy’n gysylltiedig â thomenni glo mawr.
“Mae’r cyllid gwerthfawr hwn gan Lywodraeth Cymru i’w groesawu’n fawr a bydd yn helpu i fynd i’r afael â’r heriau hirdymor sy’n dod gyda’n gorffennol diwydiannol.”
