Mae pobl yn cael eu gwahodd i fynychu dangosiad ffilm yn yr Hwb Lles ym mis Mai, a fydd yn helpu i annog gwell cyfathrebu a sgyrsiau gwell am ddementia.
Cynhelir y dangosiad rhwng 10am a 12pm ddydd Llun, 15 Mai, yn yr Hwb Lles yn Adeiladau’r Goron ar Stryt Caer, a bydd y mynychwyr yn cael gwylio’r ffilm bryfoclyd ‘The World Turned Upside Down’ gyda Chydlynydd Dementia Cynllunio sy’n Canolbwyntio ar yr Unigolyn Cyngor Wrecsam, Kate Evans.
Drama a gafodd ei llwyfannu yng Nghaerwysg ym mis Ionawr 2022 yw ‘The World Turned Upside Down’, ac mae’n dod o brosiect ymchwil dementia mawr o’r enw IDEAL sydd wedi’i leoli ym Mhrifysgol Caerwysg.
Yn ogystal â dangos y ddrama ei hun, mae’r ffilm hefyd yn dangos y broses o’i chreu. Byddwch yn cael gweld fideo o’r ymarferion, barn pobl â phrofiad o fyw â dementia, a myfyrdodau gan yr actorion a’r bobl a oedd yn rhan o’r ddrama.
Byddwch yn cael gwahoddiad i fyfyrio ar y rhesymau pam a sut y gall sgyrsiau fynd yn wael neu weithio’n dda, yn ogystal â beth sy’n helpu i gynnal sgyrsiau da. Bydd Kate yn stopio’r ffilm ar adegau amrywiol i drafod syniadau a safbwyntiau ar gyfer gwahanol senarios a gyflawnwyd gan yr actorion.
Darperir lluniaeth hefyd, a bydd te a choffi ar gael ar ôl cyrraedd.
Gallwch archebu eich lle drwy ffonio 01978 298608 neu drwy anfon e-bost at kateA.evans@wrexham.gov.uk
“Mae’n broses ddysgu i bawb sydd ynghlwm â dementia”
Dywedodd Kate: “Rwy’n angerddol am gefnogi dinasyddion sy’n byw â dementia, yn ogystal â’r bobl sydd wrth eu hochr trwy’r profiad. Mae sefyllfa pawb yn wahanol ac nid oes ateb cywir nac anghywir, mae’n broses ddysgu i bawb sydd ynghlwm â byw ochr yn ochr â dementia.
Mae bod yn agored gyda’n gilydd a rhannu profiadau yn bwysig iawn a gall wneud i ni sylweddoli bod gennym lawer o gefnogaeth o’n cwmpas mewn cyfnod a allai deimlo’n ynysig ar adegau.”
“Mae’r canlyniad yn aml yn dibynnu ar yr hyn sy’n cael ei gyfathrebu, a sut”
Dywedodd y Cynghorydd John Pritchard, Aelod Arweiniol Gofal Cymdeithasol i Oedolion: “Mae cyfathrebu da ac effeithiol o ran dementia yn chwarae rhan fawr yn y diagnosis, felly mae cael y sgyrsiau hyn gyda’r bobl o’n cwmpas yn bwysig iawn. Mae ‘The World Turned Upside Down’ yn wych, ac mae’n dangos bod llawer o sefyllfaoedd lle mae’r canlyniad yn aml yn dibynnu ar yr hyn sy’n cael ei gyfathrebu, a sut.
“Rydym yn croesawu pawb i archebu eu lle a dod draw i’r dangosiad yn yr Hwb Lles ar 15 Mai, a fydd yn eich helpu i ddeall pam ei bod yn bwysig i siarad am ddementia.”
Wedi gweld twll yn y ffordd? Rhowch wybod i ni ar-lein – mae’n hawdd.
[button color=”” size=”large” type=”square_outlined” target=”new” link=” https://fynghyfrif.wrecsam.gov.uk/cy/service/Pothole_report”] DWEDWCH WRTHYM AM GEUDWLL [/button]
