Mae Gorffennaf Di-blastig yn fudiad byd-eang i helpu miliynau o bobl i fod yn rhan o’r ateb i lygredd plastig er mwyn darparu strydoedd, moroedd a chymunedau hyfryd a glanach.
A fedrwch chi wrthod defnyddio deunyddiau plastig untro drwy gydol mis Gorffennaf? Efallai bod hyn yn ymddangos yn heriol, ond yn aml iawn, mae digon o opsiynau amgen i blastigion untro sydd bellach yn gyffredin iawn yn ein bywydau bob dydd.
Dyma rai pethau y gallwch chi eu gwneud i leihau eich defnydd o blastig:
- Defnyddio neu fenthyg cwpan goffi y gellir ei hailddefnyddio, neu beth am fwyta i mewn yn eich caffi lleol?
- Ceisiwch ddod o hyd i opsiynau di-blastig wrth brynu ffrwythau a llysiau (prynwch ffrwythau a llysiau rhydd lle bo modd)
- Defnyddiwch eich bagiau siopa eich hunan y gellir eu hailddefnyddio
- Dewch â photel ddŵr y gellir ei hailddefnyddio yn hytrach na phrynu rhai plastig
- Osgowch yr hambyrddau plastig a ddefnyddir ar gyfer cig, pysgod ac eitemau deli
- Ailddefnyddiwch gynwysyddion bocsys bwyd
- Ceisiwch ddefnyddio pecynnau bwyd y gellir eu hailddefnyddio yn hytrach na ffilm blastig
- Defnyddiwch far sebon yn hytrach na sebon hylif
- Rhowch gynnig ar gynnyrch di-blastig yn eich cartref – er enghraifft, sbyngau glanhau a chwistrellwyr glanhau y gellir eu hail-lenwi
Gallwch ddysgu mwy a chymryd rhan drwy ymweld â gwefan Gorffennaf di-blastig.
Mae’r siop ailddefnyddio’n rhoi bywyd newydd i’ch deunyddiau plastig
Os ydych chi’n bwriadu gwaredu eitemau plastig fel dodrefn gardd neu deganau, a’u bod nhw mewn cyflwr da, yna beth am eu rhoi i’r siop ailddefnyddio yng nghanolfan ailgylchu Lôn y Bryn…yn ogystal ag ailgylchu’r eitemau, mi fyddwch chi hefyd yn helpu elusen leol.
Hosbis Tŷ’r Eos sy’n rhedeg y siop a gallwch gyfrannu yn unrhyw un o’r tair canolfan ailgylchu yn Wrecsam. Mae ardal wedi’i neilltuo ar gyfer pobl sy’n dymuno gadael eitemau ym mhob un ohonynt… os nad ydych chi’n siŵr ble i fynd, gofynnwch i un o’n cynorthwywyr a fydd yn hapus i’ch helpu.
Ailgylchu plastig yn Wrecsam
Mae’n hollbwysig eich bod yn ailgylchu unrhyw ddeunyddiau plastig yr ydych yn eu defnyddio, ac yn Wrecsam, mae modd ailgylchu llawer o gynwysyddion plastig.
A wyddoch chi y gallwch ailgylchu POB potel blastig a PHOB mathau o hambyrddau bwyd plastig, potiau plastig a thybiau plastig ar ochr y ffordd yn Wrecsam? Dylai dilyn hyn eich cadw chi ar y trywydd cywir.
Ond, i’ch helpu chi i ddeall hyn ychydig yn well, dyma ychydig o enghreifftiau o’r eitemau arferol o’r cartref sy’n gallu cael eu hailgylchu. Sef:
- Potiau iogwrt
- Tybiau menyn/margarin
- Tybiau prydau parod
- Poteli siampŵ
- Poteli gel cawod
- Poteli cynnyrch glanhau cegin/ystafell ymolchi (yn cynnwys rhai chwistrellu)
- Basgedi ffrwythau (ond nid y ffilm na’r papur swigod)
- Y bocsys clir mae bwyd Tsieineaidd/Indiaidd yn aml yn dod ynddyn nhw
- Poteli ysgytlaeth
- Hambyrddau cig
- Tybiau hufen iâ
- Tybiau siocled mawr (Quality Street, Celebrations ac ati)
Ond gwnewch yn siŵr eu bod nhw’n lân, heb unrhyw weddillion bwyd na diod ynddyn nhw cyn i chi eu rhoi yn y cynwysyddion ailgylchu.
Beth nad ydw i’n gallu eu hailgylchu ar ymyl y palmant?
Y pethau mwyaf cyffredin y mae pobl yn ceisio eu hailgylchu nad oes modd eu hailgylchu ar hyn o bryd ar ymyl y palmant yw bagiau bwyd plastig o bob math, bagiau cario plastig, cling ffilm, plastig swigod a phecynnau creision. Gellir ailgylchu rhai o’r eitemau hyn yn lleoliadau blaen siop rhai archfarchnadoedd.
Yn ogystal â’r eitemau uchod, ni allwn dderbyn eitemau polystyren, plastigion caled (gellir ailgylchu’r rhain yn ein canolfannau ailgylchu) teganau, bocsys Tupperware, pecynnau fferins, tiwbiau past dannedd, raseli plastig, neu becynnau reis y gellir eu rhoi yn y ficrodon.
A ydw i’n gallu ailgylchu deunyddiau plastig o’r ardd?
Nid oes modd ailgylchu deunyddiau plastig o’r ardd, megis potiau planhigion, ar ymyl y palmant ar hyn o bryd, ond gallwch eu hailgylchu yn unrhyw un o’r tair canolfan ailgylchu yn Wrecsam.
Gellir ailgylchu deunyddiau plastig caled eraill megis cyllyll a ffyrc plastig neu gesys CD/DVD yma hefyd.
Eisiau mwy o awgrymiadau a gwybodaeth? Cofrestrwch ar gyfer ein negeseuon e-bost ailgylchu…
