Rydym yn falch o gyhoeddi y bydd gwaith yn dechrau i weithredu’r cynlluniau cyffrous ar gyfer adfywio’r Stryt Fawr a’r ardaloedd cyfagos.
Mae’r gwelliannau yn cynnwys:
- Creu parth cerddwyr ar Stryt Yorke / Stryt Fawr / Allt y Dref a Stryt yr Abad
- Creu mannau gwyrdd a phlannu coed
- Gosod blociau palmant newydd, ymylon palmant gwenithfaen a dodrefn stryd
Yn dilyn canlyniadau’r ymarfer ymgynghori diweddar, mae’r cynllun wedi ei ymestyn i gynnwys Allt y Dref a Stryt yr Abad.
Mae Alun Griffiths Contractors Ltd wedi eu penodi i ddarparu’r gwelliannau amgylcheddol i Ganol Dinas Wrecsam. Bydd cam cyntaf y gwaith yn dechrau’r wythnos hon ar Stryt Yorke ac Allt y Dref ddydd Llun, 1 Gorffennaf.
Bydd y gwaith wedi’i gwblhau erbyn 25 Hydref 2024.
Mae hwn yn waith mawr ond bydd amhariad yn cael ei leihau gymaint â phosibl, gyda’r prif lwybr yn aros ar agor i draffig a bydd mynediad i gerddwyr yn cael ei gadw ar bob stryd.
O ystyried lled cyfyngedig Allt y Dref a Stryt yr Abad, bydd angen cau’r rhain i gerbydau am gyfnodau penodol tra maent yn cael wyneb newydd. Bydd mynediad i gerddwyr yn cael ei ganiatáu.
Bydd mesurau ar waith i leihau amhariad i fusnesau yn ystod y cyfnod hwn yn cynnwys darparu porthorion gan y Contractwr i gefnogi busnesau gyda chyflenwadau a bydd Alun Griffiths, Swyddog Cyswllt Cyhoeddus yn galw heibio i drafod y manylion hyn.
Meddai’r Cynghorydd Nigel Williams, Aelod Arweiniol Economi Cyngor Wrecsam: “Rydym yn edrych ymlaen yn arw at weld y cynlluniau ar gyfer y Stryt Fawr a’r ardaloedd cyfagos yn dod yn fyw – gan barhau gyda’n hymrwymiad i fuddsoddi a gwella canol ein dinas fel ei bod yn darparu’r profiad gorau posibl i fusnesau, preswylwyr ac ymwelwyr.”
Er mwyn gwneud y gwaith angenrheidiol mor ddiogel â phosib, bydd angen cau Allt y Dref i gerbydau o 1 Gorffennaf, a bydd yn ail-agor ddechrau Medi 2024. Bydd mynediad i gerddwyr yn cael ei ganiatáu a bydd busnesau yn cael eu cefnogi gyda’u chyflenwadau. Ar gyfer busnesau ar Allt y Dref a Stryt Yorke, os byddwch eisiau cysylltu gweler manylion cyswllt y prosiect isod:
E-bost: wrecsam@alungriffiths.co.uk Ffôn: 0330 041 2185
Oriau gwaith y Contractwr fydd rhwng 7:30am a 6pm o ddydd Llun i ddydd Gwener ac os bydd angen gweithio ar y penwythnos, 9am tan 1pm ar ddydd Sadwrn. Nid oes unrhyw gynlluniau ar hyn o bryd i weithio ar benwythnosau ac ni fydd y Contractwr yn gweithio yn ystod Gŵyl Banc mis Awst.
Rydym yn gwerthfawrogi fod hon yn ardal brysur o’r ddinas ac ymddiheurwn o flaen llaw am unrhyw darfu dros dro a achosir. Bydd y Contractwr yn gweithio’n ddiogel, effeithlon ac i’r safonau uchaf er mwyn cwblhau’r gwaith cyn gynted ag y bo modd.
Efallai yr hoffech hefyd ddarllen Mae Motorfest Wrecsam yn dychwelyd eto yn 2024: Campau Cyffrous, Tryciau Creaduriaid a Mwy!
Derbyniwch y newyddion a’r wybodaeth ddiweddaraf yn syth i’ch mewnflwch
