Wrth i’r Nadolig agosáu a phawb yn edrych ymlaen at eu partïon Nadolig gyda ffrindiau a theulu, rydym yn atgoffa pawb bod angen gwneud yn siŵr bod unrhyw dacsi yr ydych yn ei ddefnyddio wedi ei drwyddedu’n iawn.
Mae rhai perchnogion ceir yn cymryd mantais o bobl ar ddiwedd eu noson ac yn cymryd eu harian heb fod yn yrwyr tacsi cyfreithlon ac wedi’u trwyddedu’n iawn.
Os nad ydynt wedi’u trwyddedu nid oes ganddynt yswiriant, sy’n golygu y gallai fod yn gostus i chi yn y pendraw os fydd unrhyw beth yn digwydd.
Dyma rai awgrymiadau defnyddiol i’ch cadw chi’n ddiogel:
- Bydd pob cerbyd hurio preifat neu gerbyd hacni yn arddangos platiau trwydded gwyn a phiws a ddylai fod y tu allan i’r cerbydau.
- Bydd Cerbyd Hacni trwyddedig yn arddangos plât cefn ac arwydd to wedi’i oleuo gyda’r gair ‘TAXI’.
- Bydd gan gerbydau hurio preifat arwyddion melyn yn y ffenestri cefn hefyd.
- Bydd gan yr holl yrwyr fathodyn ID yn dangos eu henw, llun ohonynt, rhif trwydded a’r dyddiad dod i ben. Os na allwch weld y bathodyn, gofynnwch i’w weld cyn i chi fynd i unman.
Dywedodd y Cynghorydd Hugh Jones, Aelod Arweiniol Gwarchod y Cyhoedd “Bydd swyddogion gorfodi’r Cyngor yn gweithio ar y cyd â swyddogion Heddlu Gogledd Cymru dros gyfnod y Nadolig yn cynnal gwiriadau.
“Gall nifer o yrwyr tacsi heb drwydded fod yn gyrru mewn strydoedd prysur neu aros mewn mannau prysur ar gyfer unigolion neu grwpiau, felly sicrhewch eich bod yn gwirio nad ydych yn dod yn rhan o sgâm.
“Nid yw gyrwyr tacsi heb drwydded ag unrhyw yswiriant, ac maent hefyd yn cymryd incwm i ffwrdd o weithredwyr ac unigolion cyfreithlon.”
Dywedodd y Sarsiant Medwyn Williams o Uned Trosedd Ffyrdd Heddlu Gogledd Cymru: “Rydym eisiau i bawb gael amser diogel a hwyliog y Nadolig hwn. Rhan bwysig iawn o noson allan yw sicrhau eich bod yn cyrraedd adref yn ddiogel wedyn, a’r ffordd orau yw trefnu ymlaen llawn gydag aelod o’r teulu neu ffrindiau, neu archebu tacsi trwyddedig.
“Rydym yn gweithio’n agos gyda Chyngor Wrecsam ac yn cynnal gwiriadau. Nid ydym eisiau i bobl fynd i dacsis heb drwydded – sef pobl sy’n gwneud teithiau tacsis yn eu cerbydau eu hunain, heb drwydded, a all fod yn unrhyw un. Os ydych yn mynd i un o’r ceir hyn, gallwch roi eich diogelwch mewn risg oherwydd nid ydych yn gwybod pwy sy’n gyrru nac os yw’r cerbyd yn ddiogel.
“Pan fyddwch yn mynd i dacsi, archebwch trwy gwmni sydd ag enw da. Rhaid i dacsis trwyddedig arddangos platiau tacsi tu mewn a thu allan i’r cerbyd.
“Arhoswch yn ddiogel a mwynhewch y dathliadau.”
Os ydych chi’n amau bod rhywun yn gweithredu tacsi heb drwydded, gallwch adrodd hyn i’r Adain Drwyddedu ar 01978 297441, trwy anfon e-bost at licensingservice@wrexham.gov.uk neu gallwch gysylltu â’r Heddlu ar 101. Gallwch fod yn ddienw os ydych yn dymuno.
