Rydym yn falch o gyhoeddi ein bod wedi llofnodi partneriaeth gyda Costelloes EV Group i ddarparu ar gyfer gweithredu, cynnal a chadw a gosod mannau gwefru cerbydau trydan (EVCP) ar dir sy’n eiddo i’r Cyngor.
Mae’n bartneriaeth hirdymor wedi’i hariannu’n llawn a bydd yn caniatáu i ni ehangu ein rhwydwaith o declynnau gwefru ar draws y sir am gost is a gwella ein gwasanaeth.
Mae Costelloes yn seiliedig yn Ellesmere Port ac maen nhw’n arbenigwyr yn y diwydiant gan gynnig datrysiad llawn ar gyfer systemau paneli solar, storio batris a gwefru cerbydau trydan. Mae’r cytundeb gyda nhw’n caniatáu i ni:
- ehangu ein rhwydwaith presennol o fannau gwefru cerbydau trydan
- cyflwyno mannau gwefru cerbydau trydan yn gyflymach ac am gost is
- gwella gwasanaeth a phrofiad i gwsmeriaid
- darparu gwasanaeth effeithiol a phroffesiynol
Daw’r cytundeb fel rhan o’n gwaith i ddatgarboneiddio cludiant ar draws y fwrdeistref sirol, gan ddefnyddio cefnogaeth o gyfleoedd ariannu lle maent ar gael.
- Cofrestru -
Dros y flwyddyn nesaf, byddwn yn ystyried darparu mwy na 45 o unedau EVCP llai a dau ganolbwynt symudedd EVCP, ar ôl cael cyfraniad o £758,654 o Gronfa Trawsnewid Cerbydau Allyriadau Isel Iawn Llywodraeth Cymru 24/25.
“Mwy o fannau gwefru o safon uchel, wedi’u cynnal a’u cadw’n dda”
Meddai’r Cynghorydd David A Bithell, Dirprwy Arweinydd a Chefnogwr yr Hinsawdd: “Rydym wrth ein boddau i fod yn llofnodi’r bartneriaeth arloesol gyda Costelloes EV Group, i’n helpu i ymestyn a gwella ein rhwydwaith o fannau gwefru cerbydau trydan. Rydym am gefnogi ein preswylwyr i symud at ddefnyddio cerbydau trydan trwy ddarparu mwy o fannau gwefru o safon uchel, wedi’u cynnal a’u cadw’n dda ar draws Wrecsam, a bydd sicrhau cytundeb gydag arbenigwr diwydiant yn ein helpu i gyflawni hynny.”
“Partneriaeth i ddarparu datrysiadau datgarboneiddio ar draws y sir”
Meddai David Costelloe, Rheolwr Gyfarwyddwr Costelloes EV Group: “Rydym ni’n hapus iawn i gael ein penodi i ddarparu isadeiledd gwefru cerbydau trydan Cyngor Bwrdeistref Sirol Wrecsam, gan osod a gweithredu amrywiaeth lawn o fannau gwefru, fel cam cyntaf yn ein partneriaeth i ddarparu datrysiadau datgarboneiddio ar draws y sir.
“Mae gan ein tîm fwy na 30 mlynedd o brofiad yn y diwydiant trydanol, ac maen nhw’n ymroddedig i fod ar flaen y gad o ran datblygiadau a thechnoleg newydd. Rydym ni’n falch iawn o ddarparu gwasanaeth a chefnogaeth arbennig i’n cwsmeriaid, gan sicrhau bod eu hanghenion yn cael eu diwallu â’r lefel uchaf o broffesiynoldeb ac arbenigedd.”
Gallwch ddysgu mwy am Strategaeth Gwefru Cerbydau Trydan Llywodraeth Cymru ar eu gwefan.
Standiau newydd i feics a sgwteri yng Nghefn Mawr – Newyddion Cyngor Wrecsam
Derbyniwch y newyddion a’r wybodaeth ddiweddaraf yn syth i’ch mewnflwch.
