Ar Ddydd Llun 2 Mawrth bydd cynrychiolwyr o Wrecsam a rhanbarthau eraill yn ymweld â’r prif weinidog yn 10 Downing Street i lobïo am wasanaeth trên o Wrecsam i Euston.
WSMR (Rheilffordd Wrecsam, Swydd Amwythig a Chanolbarth Lloegr) sydd wedi trefnu’r trên i ddilyn y llwybr rhwng Wrecsam ac Euston, gan alw yn y gorsafoedd y bwriedir eu gwasanaethu ar hyd y llwybr, gan gasglu ASau, arweinwyr rhanbarthol, rhanddeiliaid, busnesau lleol a chynrychiolwyr colegau yn ogystal â chefnogwyr eraill y gwasanaeth a gwahoddwyd.
Y cynllun yw cyflwyno llythyr i’r prif weinidog wedi’i lofnodi gan y rhanddeiliaid yn gofyn i’r llywodraeth gefnogi’r cais newydd gan WSMR i weithredu’r gwasanaeth.
Dywedodd y Cynghorydd David A Bithell, yr Aelod Arweiniol dros Drafnidiaeth Strategol: “Mae’n bwysig lobïo’r rhai sy’n gwneud penderfyniadau wrth i ni geisio darparu cefnogaeth barhaus i wella gwasanaethau rheilffyrdd a gwella cysylltiadau rhwng Wrecsam, canolbarth Lloegr ac Euston Llundain. “Rydym yn gwerthfawrogi’r amser a roddodd y Prif Weinidog Kier Starmer a’i dîm i siarad â ni ynglŷn â’r gwasanaeth arfaethedig a fyddai nid yn unig yn gwella cysylltiadau trafnidiaeth a chysylltedd, ond hefyd yn creu swyddi ac yn cefnogi twf.”
Dywedodd y Cynghorydd Mark Pritchard, Arweinydd y Cyngor: “Mae ein cyfarfodydd gyda WSMR wedi bod yn gadarnhaol iawn ac rydym yn gweithio’n agos gyda’r holl randdeiliaid i droi’r cynnig cyffrous hwn yn realiti i Wrecsam. “Os cawn sêl bendith, disgwylir i’r llinell newydd ddarparu gwerth £9 miliwn o fuddion economaidd rhwng Wrecsam, Amwythig a Walsall heb unrhyw gost i’r trethdalwr.”
Mae deiseb change.org wedi cychwyn ar-lein, a gallwch ddangos eich cefnogaeth drwy sganio’r cod QR isod neu ymweld â’r dudalen yma.
