Erthygl gwadd – Cyngor Cymuned Rhosllannerchrugog
Gwahoddir trigolion i lunio dyfodol y pentref – a phenderfynu sydd y caiff arian newydd ei wario.
Gwahoddir trigolion cymuned Rhosllannerchrugog i sesiwn galw heibio yn y Stiwt ddydd Iau 19 Mawrth, 2–7pm, i roi eu barn ar ddyfodol pentref mwyaf Cymru. Mae’r digwyddiad yn rhan o ymgynghoriad cyhoeddus ar Gynllun Creu Lleoedd drafft, sydd hefyd yn cynnwys platfform ar-lein ar wrexhamplacemaking.info/rhos/cymraeg sy’n agored tan ddydd Llun 30 Mawrth. Mae copïau caled o’r cynllun ar gael o ddydd Iau 19 Mawrth yn Llyfrgell y Rhos, swyddfa’r Cyngor Cymuned a chyntedd y Stiwt.
Mae Cyngor Cymuned Rhosllannerchrugog yn gofyn i drigolion, busnesau a grwpiau cymunedol rannu eu blaenoriaethau – gan gynnwys sut y dylai arian cyfalaf newydd gael ei wario. Rhaid i’r Gronfa Balchder Bro, a gafwyd drwy Gyngor Bwrdeistref Sirol Wrecsam gan Lywodraeth y Deyrnas Unedig, gael ei defnyddio ar gyfer gwelliannau ffisegol i lleoedd cymunedol, mannau cyhoeddus, neu’r stryd fawr. Mae hwn yn gyfle gwych i ddylanwadu ar benderfyniadau go-iawn ynghylch prosiectau go-iawn.
Mae’r cynllun drafft yn dangos gweledigaeth ar gyfer y Rhos sy’n ymwneud â phedwar amcan: adfywio Stryt y Farchnad; dathlu asedau diwylliannol a threftadaeth y pentref; gwella symudiad a mynediad; a chryfhau arweinyddiaeth gymunedol. Mae wedi cael ei ddatblygu yn dilyn misoedd o ymchwil lleol ac ymgynghori â’r gymuned, a chaiff ei gyhoeddi ym mlwyddyn canmlwyddiant y Stiwt – sy’n garreg filltir arbennig o bwysig i’r pentref.
Meddai’r Cynghorydd Geoff Foy, cadeirydd y Cyngor Cymuned, wrth esbonio mwy am y cynllun: ‘Mae’r cynllun creu lleoedd drafft hwn yn cynnig cyfle pellach i drigolion gyfrannu at ffurf y gymuned yn y dyfodol, gyda rhagolygon o dynnu cyllid gan lywodraeth Prydain i fynd i’r afael â phroblemau a gwella llawer o asedau.’
Mae’r Rhos yn wynebu heriau gwirioneddol – yn enwedig ar Stryt y Farchnad – ond mae hefyd yn meddu ar asedau eithriadol: y Stiwt, traddodiad Cymraeg a cherddorol cryf, capeli hanesyddol, Parc Ponciau, clybiau chwaraeon llewyrchus, ysgolion uchel eu parch a sefydliadau cymunedol cryf. Mae’r cynllun yn canolbwyntio ar adeiladu ar y cryfderau hyn.
Am fwy o wybodaeth, cysylltwch â Chyngor Cymuned Rhosllannerchrugog ar 01978 840007.
