PROSIECTAU WRECSAM
Ariennir gan Lywodraeth y DU drwy’r rhaglen ‘Ffyniant Bro’; yn ôl ym mis Chwefror fe aethom ati i wahodd sefydliadau i wneud cais am gyfran o Gronfa Ffyniant Gyffredin y DU, ar gyfer prosiectau yn Wrecsam. Ac roeddem yn falch o dderbyn dros 100 o geisiadau am gyllid.
Fel cyngor roeddem yn gyfrifol am rannu’r £22,684,205 a ddyfarnwyd i ni i ariannu cynigion sy’n cefnogi:
- Cymuned a Lle
- Cefnogi Busnesau Lleol
- Pobl a Sgiliau
Mae’r ffigyrau terfynol ar gyfer y prosiectau a gymeradwywyd sy’n ymwneud â Wrecsam yn unig fel a ganlyn:
| Ymgeisydd y Prosiect | Enw’r Prosiect | Cyfanswm Cronfa Ffyniant Gyffredin Wrecsam |
| Ymddiriedolaeth y Tywysog yng Nghymru | Llwybr at Gyflogaeth – Wrecsam | £261,639.00 |
| Gardd Furiog Fictoraidd Erlas | Gardd Furiog Fictoraidd Erlas | £264,375.00 |
| Ymddiriedolaeth Gymunedol Sblash | Prosiect Sero Net Canolfan Hamdden Plas Madoc | £340,000.00 |
| Partneriaeth Parc Caia | Mapiau a Mwy | £357,586.78 |
| Clwb Criced Parc Gwersyllt | Cyfleusterau Cynhwysol Clwb Criced Parc Gwersyllt | £500,000.00 |
| Fair Event Management Ltd | Calendr Digwyddiadau Cymunedol Graddfa Fawr Cynaliadwy ar gyfer Sir Wrecsam | £500,000.00 |
| WeMindTheGap | Dewch i ni newid bywydau 1000 o bobl ifanc yn Wrecsam mewn 1000 o ddiwrnodau, gyda’n gilydd fel cymuned gyda chariad a gwir gyfle. | £510,000.00 |
| Hwb Yr Orsedd Cyf | Hwb Yr Orsedd – Canolbwynt Cymunedol Yr Orsedd | £574,000.00 |
| Cadwyn Clwyd (yn arwain) a Chymdeithas Mudiadau Gwirfoddol Wrecsam | Cronfa Allweddol Cymunedol Wrecsam | £600,000.00 |
| CBSW | Darpariaeth cymorth busnes gwell | £870,000.00 |
| Rainbow Foundation | Prosiect Cynhwysiant a Gwytnwch Treftadaeth Gymunedol De Wrecsam | £1,215,354.40 |
| CBSW | Amgueddfa Bêl-droed Cymru / Amgueddfa Dau Hanner | £1,300,000.00 |
| CBSW | Cronfa Allweddol Cymuned a Lle Wrecsam | £1,303,223.00 |
| CBSW | Cronfa Allweddol Pobl a Sgiliau Wrecsam | £1,303,223.00 |
| Gwyddoniaeth Gogledd Cymru | Dinas Wrecsam: Grymuso Esblygiad Gwyrdd | £1,573,750.00 |
| CBSW | Cronfa Allweddol Grant Cyfalaf a Dichonoldeb Safleoedd ac Adeiladau | £1,936,852.00 |
| Canolfan Tennis Wrecsam Cyf | Prosiect Trawsnewid Canolfan Tennis Wrecsam | £2,000,000.00 |
| CBSW | Cynllun Creu Lleoedd Wrecsam | £2,146,723.75 |
| Cyfanswm | £17,556,726.93 |
Cafodd y prosiectau eu dewis gan banel a luniwyd o ystod eang o fudd-ddeiliaid ar hyd a lled y gymuned – er enghraifft arweinwyr yn eu maes mewn busnesau lleol a buddsoddiad, partneriaeth leol a chyrff strategol, darparwyr addysg a sgiliau, sefydliadau ffydd a CBSW.
- Cofrestru -
Craffwyd yr holl gynigion o ran sut yr oeddent yn cyd-fynd yn strategol gydag anghenion a blaenoriaethau Wrecsam yn ogystal â’u gallu, eu gallu i gyflawni a gwerth am arian.
Yn amodol ar drafodaethau llwyddiannus, bydd gweddill yr arian yn cael ei ddosbarthu i brosiectau eraill nad ydynt wedi eu datgelu (gan ein bod yn dal mewn trafodaethau) yn ogystal â thalu am gostau gweinyddol rhanbarthol a lleol.
PROSIECTAU GOGLEDD CYMRU
Mae yna brosiectau eraill sydd wedi cyflwyno cais i Awdurdodau Lleol niferus yn ardal Gogledd Cymru sy’n dal i gael eu hasesu. Er mwyn bod yn gymwys i wneud cais i’r Gronfa Ffyniant Gyffredin ar hyd a lled Gogledd Cymru roedd rhaid i brosiectau fod yn strategol er mwyn sicrhau’r gallu i gyflawni a’r effaith mwyaf, gydag isafswm cyfanswm gwerth o £250,000 o Gronfa Ffyniant Gyffredin y DU (un ai drwy gais awdurdod unigol neu aml awdurdod). Byddwn yn rhoi’r wybodaeth ddiweddaraf ynglŷn â hyn unwaith y bydd asesiadau wedi eu cwblhau a phenderfyniadau wedi eu gwneud ar ddyfarnu’r cyllid.
CRONFEYDD ALLWEDDOL
I alluogi busnesau lleol, sefydliadau a chymunedau sy’n ceisio symiau llai o gymorth i gael mynediad at gronfeydd Cronfa Ffyniant Gyffredin y DU edrychodd y rhan fwyaf o awdurdodau lleol ar sefydlu cronfeydd lleol canolog, yn darparu cyfundrefn gyflwyno cais, cymeradwyo a monitro wedi’i symleiddio.
Mae yna nifer o geisiadau ‘cronfeydd allweddol’ o’r fath ym Mwrdeistref Sirol Wrecsam sydd wedi eu cymeradwyo. Bydd y cronfeydd canolog hyn yn galluogi busnesau lleol, sefydliadau a chymunedau sy’n ceisio symiau llai o gymorth i gael mynediad at gronfeydd Cronfa Ffyniant Gyffredin y DU a darparu cyfundrefn gyflwyno cais, cymeradwyo a monitro wedi’i symleiddio. Rydym yn anelu i gael ein proses ymgeisio am gronfeydd allweddol yn weithredol erbyn Medi 2023, a bydd tudalen we y Gronfa Ffyniant Gyffredin yn cael ei diweddaru gyda rhagor o fanylion maes o law – Cronfa Ffyniant Gyffredin: Gogledd Cymru | Cyngor Bwrdeistref Sirol Wrecsam
Ardaloedd dosbarthu ar gyfer cronfeydd allweddol
Cyngor Bwrdeistref Sirol Wrecsam – Cronfa Allweddol Cymuned a Lle Wrecsam – Creu Cronfa Allweddol i alluogi sefydliadau cymunedol / elusennol llai i gael mynediad at Gronfa Ffyniant Gyffredin y DU gan gefnogi prosiectau llawr gwlad sy’n hyrwyddo cymunedau lleol a gwella cyfleoedd i’r bobl sy’n byw yno. Byddai’r Gronfa Allweddol ar gael ar draws y Fwrdeistref Sirol ar gyfer grantiau rhwng £2,000 a £125,000.
Cyngor Bwrdeistref Sirol Wrecsam – Cronfa Allweddol Grant Cyfalaf a Dichonoldeb Safleoedd ac Eiddo – Bydd y Gronfa Allweddol hon yn darparu cyllid a grantiau cyfalaf i lywio safleoedd, adeiladau a datblygu busnes yn Wrecsam. Wedi’i anelu at berchnogion eiddo presennol, darpar ddatblygwyr, busnesau a buddsoddwyr bydd y gronfa allweddol yn darparu cefnogaeth ariannol i gael mynediad at ystod eang o astudiaethau dylunio, dichonoldeb a hyfywedd i lywio dulliau arloesol newydd yn ymwneud ag ailddefnyddio eiddo a lleihau’r risgiau sy’n gysylltiedig â safleoedd tir llwyd er mwyn ysgogi mewnfuddsoddiad a hybu economi Bwrdeistref Sirol Wrecsam. Byddai’r gronfa allweddol hefyd yn darparu grantiau cyfalaf ar gyfer darnau go iawn o waith a chamau gweithredu i’w cyflawni yn y byd go iawn, drwy allbynnau penodol fel y nodir mewn astudiaethau dichonoldeb presennol neu rai a ariennir. Bydd y grantiau cyfalaf a dichonoldeb yn gofyn am elfen o arian cyfatebol.
Cyngor Bwrdeistref Sirol Wrecsam – darpariaeth cefnogi busnes gwell – Darparu cynllun grant busnes newydd, gydag arian cyfatebol hyd at 50%, (a ariennir fel ad-daliad), gyda chyllid (o hyd at £50,000) ar gael i Fusnesau Bach a Chanolig sy’n bodoli a chyn iddynt gychwyn sy’n hyfyw yn ariannol. Byddai’r fenter yn annog busnesau i gefnogi eu hunain, tra’n darparu cymorth ariannol tuag at fuddsoddiadau cymwys.
Cyngor Bwrdeistref Sirol Wrecsam – Cronfa Allweddol Pobl a Sgiliau Wrecsam – Creu Cronfa Allweddol i alluogi sefydliadau cymunedol / elusennol llai i gael mynediad at Gronfa Ffyniant Gyffredin y DU gan gefnogi prosiectau llawr gwlad sy’n darparu dysgu a sgiliau i fynd i’r afael ag anweithgarwch economaidd, rhwystrau i waith a gwella cyfleoedd ar gyfer y bobl sy’n byw yno. Byddai’r Gronfa Allweddol ar gael ar draws y Fwrdeistref Sirol ar gyfer grantiau rhwng £2,000 a £125,000.
Cadwyn Clwyd a Chymdeithas Mudiadau Gwirfoddol Wrecsam Bydd y prosiect hwn yn cefnogi lleoliadau / cyfleusterau / mannau / grwpiau a arweinir gan y gymuned neu sy’n eiddo i’r gymuned i ddatblygu, cryfhau a hybu isadeiledd cymunedol a phrosiectau wedi eu lleoli yn y gymuned. Bydd y Gronfa Allweddol yn cefnogi (i) prosiectau llai £2,000 i £10,000, a (ii) phrosiectau mwy £10,000 £50,000 (gellir ystyried symiau mwy pan all prosiectau ddangos eu bod yn gallu cyflawni manteision niferus ). Bydd mwy o fanylion ar gael yn nes at y dyddiad lansio.
Dywedodd Arweinydd Cyngor Bwrdeistref Sirol Wrecsam, y Cynghorydd Mark Pritchard: “Bydd y prosiectau hyn yn cael effaith gadarnhaol fesuradwy yn y cymunedau maent yn eu gwasanaethu drwy Ddinas Wrecsam. “Rwy’n edrych ymlaen at weld y cynigion llwyddiannus yn dwyn ffrwyth.”
Derbyniwch y newyddion a’r wybodaeth ddiweddaraf yn syth i’ch mewnflwch
