Ar drothwy tymor ysgol newydd, mae Cyllid a Thollau EF (CThEF) yn atgoffa teuluoedd i agor cyfrif Gofal Plant sy’n Rhydd o Dreth heddiw i arbed hyd at £2,000 fesul plentyn ar eu biliau gofal plant blynyddol.
Gall teuluoedd ddefnyddio’u cyfrif Gofal Plant sy’n Rhydd o Dreth i dalu am unrhyw ofal plant cymeradwy gan gynnwys clybiau gwyliau, clybiau brecwast neu ar ôl ysgol, gwarchodwyr plant a meithrinfeydd.
Mae’r cynllun yn darparu hyd at £2,000 y flwyddyn fesul plentyn i deuluoedd sy’n gweithio ac sydd â phlant hyd at 11 oed. Os yw’r plentyn yn anabl a hyd at 16 oed, darperir hyd at £4,000 y flwyddyn. Am bob £8 sy’n cael ei dalu i gyfrif Gofal Plant sy’n Rhydd o Dreth, mae teuluoedd yn cael taliad atodol o £2 gan y llywodraeth yn awtomatig. Mae teuluoedd yn gallu arbed hyd at £500 bob 3 mis fesul plentyn neu £1,000 os yw eu plentyn yn anabl.
“Mae Gofal Plant sy’n Rhydd o Dreth yn cynnig cymorth ariannol”
Meddai Myrtle Lloyd, Cyfarwyddwr Cyffredinol CThEF ar gyfer Gwasanaethau i Gwsmeriaid, “Mae dychwelyd i’r ysgol a threfnu gofal plant ar gyfer y tymor newydd yn gallu bod yn ddrud i deuluoedd sy’n gweithio. Mae Gofal Plant sy’n Rhydd o Dreth yn cynnig cymorth ariannol fel y gall teuluoedd arbed arian yn sgil costau gofal plant. Chwiliwch am ‘Tax-Free Childcare’ ar GOV.UK a chofrestrwch ar-lein heddiw.”
Mae agor cyfrif Gofal Plant sy’n Rhydd o Dreth ar-lein yn syml a gellir ei wneud mewn tua 20 munud. Gellir talu arian i mewn ar unrhyw adeg, 365 diwrnod y flwyddyn, a’i ddefnyddio ar unwaith neu bryd bynnag y bydd ei angen. Gellir codi unrhyw arian sydd heb ei ddefnyddio ar unrhyw adeg.
Ewch i GOV.UK i gofrestru, a dechrau arbed arian heddiw.
Mae’r llywodraeth yn cynnig help i gartrefi. Trowch at GOV.UK i ddysgu pa gymorth sydd ar gael ar gyfer costau byw, gan gynnwys help gyda chostau gofal plant.
Derbyniwch y newyddion a’r wybodaeth ddiweddaraf yn syth i’ch mewnflwch
Mae’n bosibl yr hoffech ddarllen hefyd am CThEF yn addo £5.5 miliwn o gyllid partneriaeth i roi cymorth i gwsmeriaid y mae angen help ychwanegol arnynt
