Erthygl wadd gan Wasanaeth Gwaed Cymru.
“Doedd neb yn meddwl y byddai Luca yn goroesi y penwythnos hwnnw. Ar amrantiad, roedd y dyfodol yr oeddem wedi’i gynllunio wedi’i rwygo,” meddai Rebecca Park, mam i Luca, pedair oed, sydd wedi bod yn brwydro yn erbyn tiwmor llinyn asgwrn cefn prin ac ymosodol ers pan oedd ond yn 15 wythnos oed.
Y Nadolig hwn, mae Rebecca yn rhannu stori ei mab, Luca, i ddiolch i bawb sydd erioed wedi rhoi gwaed neu blatennau ac i godi ymwybyddiaeth o ba mor bwysig yw’r rhoddion hyn i gleifion ledled Cymru. Mae Gwasanaeth Gwaed Cymru yn tynnu sylw at stori Luca fel rhan o’u hymgyrch ‘Gweld yw Credu’, lle bydd rhoddwyr yn dechrau derbyn negeseuon pan fydd eu rhoddion yn cael eu rhoi i ysbytai Cymru i helpu i amlinellu gwir angen y rhoddion hanfodol hyn bob dydd.
Yn ddim ond 15 wythnos oed, cafodd Luca ddiagnosis o’r math mwyaf ymosodol o diwmor, a elwir yn radd pedwar, a oedd wedi’i lapio o amgylch llinyn ei asgwrn cefn. Oherwydd lleoliad y tiwmor, ni ellir cael llawdriniaeth ac felly mae’n anwelladwy.
Dywedwyd wrth Rebecca efallai mai dim ond wythnosau i fyw oedd gan Luca.
Dechreuodd Luca driniaeth yn Ysbyty Plant Arch Noa yng Nghaerdydd ond yn anffodus aeth yn sâl o fewn dyddiau i ddechrau’r driniaeth. Cafodd tad Luca, Paul, a’i frawd hŷn, Zac, ganiatâd arbennig i ymweld â’r ward ochr yn ochr â Rebecca yn ystod y pandemig byd-eang, oherwydd difrifoldeb y sefyllfa. Eu hunig ddymuniad fel teulu oedd mynd â Luca adref i gael ei amgylchynu gan y rhai sy’n ei garu.
Wrth gofio’r cyfnod torcalonnus hwnnw, dywedodd Rebecca: “Doedd neb yn meddwl y byddai Luca yn goroesi’r penwythnos hwnnw. Ar amrantiad, cafodd y dyfodol yr oeddem wedi’i gynllunio ei rwygo.”
Er mawr syndod i bawb, dechreuodd Luca wneud gwelliannau bach ac yn y pen draw cwblhaodd flwyddyn o gemotherapi, gyda chefnogaeth trallwysiadau gwaed a phlatennau lluosog.
Wrth drafod y trallwysiadau a achubodd bywyd Luca, dywedodd Rebecca: “Rwyf am ddiolch i haelioni dieithriaid llwyr am ddarparu’r anrhegion achub bywyd hyn i Luca.
Parhaodd: “Gofynnir i mi yn aml, ‘Beth alla i ei wneud i helpu?’. Yr ateb yw, os ydych chi am helpu Luca ynghyd ag unrhyw un sy’n ymladd canser, ystyriwch roi rhodd.
“Yn syml, ni fyddai Luca yma heb roddion gwaed a phlatennau. Mae haelioni dieithriaid llwyr wedi achub ein bachgen bach, nid unwaith, ond ddwywaith.”
Diolch byth, mae canser Luca bellach mewn cyflwr sefydlog ac mae’n parhau i herio pob peth. Mae bellach yn bedair oed ac yn edrych ymlaen at Nadolig arall gyda theulu a ffrindiau.
“Mae straeon fel un Luca yn anodd eu darllen, ond i’w fam Rebecca a’i dad Paul, maen nhw’n gwybod pa mor hanfodol yw rhoddion i gleifion mewn angen, a faint maen nhw wedi helpu eu teulu i ddathlu Nadolig llawen arall gyda’i gilydd,” meddai Alan Prosser, Cyfarwyddwr Gwasanaeth Gwaed Cymru.
“Bob dydd, mae angen tua 350 o roddion gwaed ar Wasanaeth Gwaed Cymru i helpu ysbytai ledled y wlad. Mae tua 75% o roddion gwaed yn mynd i drin cyflyrau meddygol fel un Luca ac mae ysbytai angen cyflenwad o bob math o waed sydd ar gael yn hawdd, hyd yn oed ar Ddydd Nadolig a Dydd Calan.
“Yn ein Gwasanaeth, rydym yn gweld y gwahaniaeth y mae rhoddwyr yn ei wneud bob dydd, ond nawr, fel rhan o’n hymgyrch ‘Gweld yw Credu’ bydd rhoddwyr yn hefyd, trwy dderbyn neges yn dweud wrthynt pa ysbyty sydd wedi derbyn eu celloedd coch neu eu platennau. Mae’n un o’r ffyrdd newydd y gallwn ddangos ein gwerthfawrogiad i’n holl roddwyr am roi awr o’u hamser i helpu rhywun mewn angen.
“I drefnu i roi rhodd sy’n achub bywydau neu i ddarganfod mwy, ewch i www.welshblood.org.uk neu ffoniwch 0800 252 266 heddiw.”
Derbyniwch y newyddion a’r wybodaeth ddiweddaraf yn syth i’ch mewnflwch.
