Dydd Iau, 6 Mehefin bydd Wrecsam yn ymuno â’r genedl i gofio glaniadau D-Day 80 mlynedd wedi i filwyr y Cynghreiriaid gyrraedd glannau gogledd Ffrainc.
Nododd y glaniadau ddechrau’r frwydr i ryddhau gorllewin Ewrop, a phrofodd i fod yn foment ganolog yn yr Ail Ryfel Byd – gan arwain yn y pen draw at orchfygu grymoedd Hitler ar ffrynt y gorllewin.
Mae’n anodd dychmygu’r dewrder, ofn a’r dioddefaint y profodd nifer o filwyr cyn ac yn ystod glaniadau D-Day a’r profiad i’w teuluoedd yn ôl adref wrth iddynt boeni am eu hanwyliaid.
Felly Dydd Iau 6 Mehefin bydd y ddinas yn chwarae ei rhan i gofio’r rhai hynny a ymladdodd a’r rhai hynny a gollodd eu bywydau ar draethau Normandi.
Bydd gorymdaith D-Day yn cychwyn o Eglwys San Silyn yn Wrecsam
Mae aelodau’r cyhoedd yn cael eu hannog i gefnogi’r orymdaith, sy’n cychwyn o Eglwys San Silyn am 1.15pm.
Bydd yr orymdaith yn mynd at Gofeb Milwyr Normandi ym Modhyfryd, lle bydd gwasanaeth byr i osod torchau.
Bydd y Corfflu Drymiau a’r Banerwyr yn arwain yr orymdaith, aelodau o gymuned y lluoedd arfog, Maer Wrecsam y Cynghorydd Beryl Blackmore, a Chefnogwr y Lluoedd Arfog Cyngor Wrecsam, y Cynghorydd Beverley Parry Jones.
Bydd yr orymdaith hefyd yn cynnwys aelodau o griw HMS Dragon a hwn fydd y tro cyntaf i’r criw ymweld â Wrecsam ers i’r ddinas gael ei chysylltu’n swyddogol gyda’r llong ryfel ddiwedd mis Ebrill.
Dywedodd y Cynghorydd Parry-Jones: “Dewch draw os gwelwch yn dda i gefnogi’r orymdaith, a helpwch ni i dalu teyrnged i’r rhai hynny a frwydrodd ac a gollodd eu bywydau ar draethau Normandi yn 1944.
“Fe helpodd eu haberth a’u dewrder i sicrhau’r rhyddid rydym ni’n ei fwynhau heddiw, ac mae hi mor bwysig ein bod ni’n cofio’r hyn a wnaethant drosom ni.
“Hwn hefyd fydd y tro cyntaf y bydd criw o HMS Dragon yn ymweld â’r ddinas, ac fe fyddem wrth ein bodd yn gweld cymaint o bobl â phosibl yn dod draw i roi croeso cynnes iddynt.”
