Mae myfyrwyr yn Ysgol Uwchradd Clywedog yn Wrecsam wedi meithrin sgiliau cyflogadwyedd hanfodol, diolch i fenter sy’n hwyluso perthynas waith rhwng ysgolion a busnesau.
Nod y cynllun Dosbarth Busnes, sy’n cael ei gynnal gan yr elusen Busnes yn y Gymuned, mewn partneriaeth â Llywodraeth Cymru a Gyrfa Cymru, yw cefnogi myfyrwyr i ddatblygu’r sgiliau, rhinweddau personol a chymwysterau sydd eu hangen i lwyddo mewn gwaith a bywyd.
Dywedodd Miranda Cookson, Dirprwy Bennaeth yn Ysgol Clywedog: “Pan ofynnodd Lesley Lloyd, Ymgynghorydd Cynnwys Busnes â Gyrfa Cymru i ni gymryd rhan yn y cynllun, fe wnaethom neidio am y cyfle.”
Mae Ysgol Clywedog wedi bod yn rhan o’r cynllun Dosbarth Busnes ers pedair blynedd ac mae hanes ei llwyddiant yn cael ei gofnodi mewn llyfryn sydd newydd ei gyhoeddi.
- Cofrestru -
Parodd yr ysgol â Nyth, a reolir ar ran Llywodraeth Cymru gan Nwy Prydain. Michelle Symonds, Rheolwr Cynnwys y Gymuned yn Nyth oedd y cyswllt â’r ysgol drwy gydol y cynllun.
Roedd Nyth yn awyddus i helpu i wella sgiliau cyflogadwyedd mewn addysg, yn ogystal â chodi ymwybyddiaeth o yrfaoedd mewn pynciau Gwyddoniaeth, Technoleg, Peirianneg a Mathemateg a rhoi hwb i hyder myfyrwyr.
Cymerodd myfyrwyr o flynyddoedd 9 i 11 ran mewn gweithdai oedd yn cynnwys popeth o ysgrifennu CV proffesiynol, technegau cyfweliad, prydlondeb a phresenoldeb i ddefnyddio ffonau symudol yn gyfrifol ac ethos gofal cwsmer.
Er gwaetha’r pandemig, mae sesiynau wedi parhau yn rhithiol, yn cynnwys seminarau addysg yn ymwneud â gwaith.
Eglura Mrs Cookson: “Gwyddom mor bwysig yw hi i fyfyrwyr fod yn barod am y byd gwaith ac rydym yn awyddus i wneud popeth allwn ni i’w helpu i baratoi at y cam nesaf hwn yn eu bywydau.
“Roedd y cynllun Dosbarth Busnes yn cyd-fynd â’n gwaith yn yr ysgol i helpu myfyrwyr blwyddyn 10 ac 11 ddatblygu arferion da yn barod at eu bywydau gwaith, o fod yn ddibynadwy a phrydlon, i ddefnyddio ffonau symudol mewn ffordd gyfrifol. Er enghraifft, defnyddiodd Michelle Bolisi Ffonau Symudol Nwy Prydain i dynnu sylw at y pwysigrwydd y mae busnesau yn ei roi ar sicrhau bod eu gweithwyr yn deall y canlyniadau os byddant yn camddefnyddio eu ffonau symudol yn y gwaith.
“Yn dilyn y sesiwn, fe wnaethom sylwi ar newid mewn meddylfryd gan y myfyrwyr hŷn o ran eu defnydd o ffonau symudol, dim ond un canlyniad positif o’r rhaglen gyfan.
“Anogodd Michelle ein swyddogion i feddwl am eu rôl o safbwynt gwasanaeth cwsmeriaid, gan ystyried eu cyfraniad i’r ysgol a sut gallant gefnogi a mentora myfyrwyr iau. Fe wnaeth hyn helpu swyddogion i ddeall eu rôl yn llawnach, a sut mae ganddynt y potensial i wneud gwahaniaeth gwirioneddol i fyfyrwyr eraill.
“Mae’r cynllun wedi bod yn hynod o fuddiol i’n myfyrwyr i’w helpu i werthfawrogi beth sydd ei angen pan fyddant yn mynd i fyd gwaith, o hoffwn ddiolch i Lesley a Michelle am roi’r cyfle hanfodol hwn iddynt.”
Dywedodd Lesley Lloyd, Gyrfa Cymru: “Rydym yn ddiolchgar iawn i Nyth am ei waith i gefnogi ysgolion a rhoi cyfleoedd gwerthfawr i fyfyrwyr ryngweithio, sy’n llywio, ysbrydoli ac annog pobl ifanc o ran eu cyfleoedd gyrfa.
“Rydym yn edrych ymlaen at barhau i weithio gydag Ysgol Clywedog a Nyth ac atgyfnerthu’r bartneriaeth ymhellach drwy gynllun Partner Gwerthfawr Ysgol Gyrfa Cymru, sy’n cydnabod cyflogwyr sydd wedi cefnogi ysgolion unigol.”
Mae gwneud apwyntiad i dderbyn brechlyn Covid-19 yn haws nag erioed o’r blaen.
TREFNWCH APWYNTIAD AR-LEIN
