Yr haf hwn, bydd Canol Dinas Wrecsam yn dod yn fyw gyda llwybr gwenyn creadigol sy’n cynnwys gweithiau celf creadigol gan blant ysgol lleol.
Fel rhan o Gymru yn ei Blodau, nod y gweithgaredd hwn sy’n seiliedig ar natur yw tynnu sylw at y rôl hanfodol y mae gwenyn a pheillwyr yn ei chwarae yn ein hecosystem.
Bydd y llwybr gwenyn yn cynnwys dwsinau o wenyn wedi’u haddurno’n unigryw ar hyd y strydoedd a’r marchnadoedd. Mae gwahoddiad i bawb archwilio’r llwybr sydd am ddim, gan ddarganfod pob darn o gelf wrth i chi ddilyn y llwybr trwy ganol y ddinas.
Dywedodd yr Aelod Arweiniol dros yr Economi ac Adfywio, y Cynghorydd Nigel Williams: “Rydym wrth ein bodd yn arddangos creadigrwydd ein pobl ifanc wrth godi ymwybyddiaeth o’r gwaith anhygoel y mae gwenyn yn ei wneud i’n planed.” Mae’r llwybr hwn yn atgof lliwgar o’r ffordd mae natur yn ffynnu hyd yn oed mewn mannau trefol, ac mae’n ddathliad o ymrwymiad Wrecsam i gefnogi bioamrywiaeth drwy Gymru yn ei Blodau.”
Gallwch gasglu eich taflen llwybr gwenyn am ddim naill ai yn nerbynfa Tŷ Pawb neu’r Ganolfan Wybodaeth i Ymwelwyr. Bydd y llwybr yn mynd â chi mewn cylch, gan ddechrau a gorffen ger Tŷ Pawb yng nghanol y ddinas.
Gallwch hefyd liwio eich gwenynen eich hun a’i hychwanegu at y ‘cwch gwenyn’ yn Tŷ Pawb.
Bydd y llwybr a’r taflenni ar gael o 28 Mehefin tan 1 Medi.
I gael rhagor o wybodaeth am y Llwybr Gwenyn, anfonwch e-bost i LocalPlacesForNature@wrexham.gov.uk
