Yn dilyn y newyddion fod yr Hen Lyfrgell ar Sgwâr y Frenhines am gael ei drawsnewid i ganolbwynt creadigol, rydym wedi edrych ar beth arall sy’n mynd ymlaen yng nghanol y ddinas diolch i Gyllid Trawsnewid Trefi er mwyn creu canol dinas deniadol ar gyfer y dyfodol.
Mae cyllid Trawsnewid Trefi yn darparu cyllid cyfalaf ar gyfer busnesau lleol, mentrau cymdeithasol a chyrff cyhoeddus er mwyn galluogi rhaglen eang a hyblyg o gymorth ar gyfer ystod eang o brosiectau a all helpu i adfywio canol trefi ar draws canolbarth Cymru.
Gall y mathau o brosiectau gynnwys datblygiadau isadeiledd gwyrdd, gwelliannau i’r parth cyhoeddus, gosod isadeiledd digidol mewn canol trefi/dinasoedd, i welliannau i eiddo masnachol a phreswyl yn fewnol ac allanol a llawer mwy.
Mae’r rhaglen yn annog llefydd i fyw, gweithio, ymweld ac aros ac yn gysylltiedig â’r dyheadau yn ein Cynllun Creu Lleoedd ar gyfer Wrecsam.
- Cofrestru -
Adnewyddu Marchnadoedd Wrecsam – £2.565 miliwn
Mae dwy farchnad dan do poblogaidd ar hyn o bryd yn cael eu hadnewyddu gyda’r cyllid hwn, yn ogystal â chyllid arall sydd wedi’i sicrhau gan Chwaraewyr y Loteri Genedlaethol trwy Gyllid Treftadaeth Treflun Wrecsam a’r Gronfa Ffyniant Gyffredin.
Agorwyd Marchnad y Cigydd yn 1848 a’r Farchnad Gyffredinol yn 1879. Nid oes gwaith adnewyddu sylweddol wedi ei wneud ar yr un o’r ddwy ac mae hi nawr yn amser i ni edrych ar ddyfodol er mwyn sicrhau bod y ddwy farchnad yn ffynnu yng nghanol y ddinas.
Y Stryd Fawr – £1.33 miliwn
Mae’r stryd bwysig a hanesyddol hon wedi’i lleoli yng nghalon hanesyddol Ardal Gadwraeth y ddinas ac yn cynnwys nifer o adeiladau rhestredig. Bydd y cyllid sydd wedi’i sicrhau yn creu gofodau parth cyhoeddus newydd; yn croesawu dull dinasoedd doeth i ganol dinas digidol; a chreu economi dydd a nos amlbwrpas, o ansawdd uchel sy’n apelio at bobl sy’n byw a gweithio yn Wrecsam a’r rhai sy’n ymweld.
Xplore! Y Ganolfan Darganfod Gwyddoniaeth – £750,000
Gynt ym Mhrifysgol Glyndŵr (Bellach Prifysgol Wrecsam), agorodd y Ganolfan Darganfod Gwyddoniaeth ar Stryt Henblas, hen Siop Adrannol, yn Hydref 2020.
Yn ogystal â chyllid eraill, derbyniodd £750,000 gan y Cyllid Trawsnewid Trefi i ddarparu profiadau STEM (Gwyddoniaeth, Technoleg, Peirianneg a Mathemateg) cyffrous ar gyfer cymunedau ar draws Gogledd Cymru, trwy ganolfan addysg Gwyddoniaeth hygyrch gydag arddangosfeydd hwyliog i bob oed. Mae’n cynnig gweithgareddau i ysgolion, llogi lleoliad, digwyddiadau corfforaethol, partïon pen-blwydd a llawer mwy.
Amgueddfa – £1.3 miliwn
Ar hyn o bryd mae Amgueddfa’r fwrdeistref sirol yn cael ei adnewyddu i greu “Amgueddfa Dau Hanner” a fydd yn gartref i Amgueddfa Pêl-droed Cymru ac Amgueddfa newydd Wrecsam, oll wedi’i leoli yn yr adeilad ar Stryt y Rhaglaw.
Bydd yr amgueddfa newydd yn dathlu pêl-droed Cymru, ddoe a heddiw, yn ei holl amrywiaeth, o glybiau ar lawr gwlad i’r timau cenedlaethol, yn ogystal â thynnu sylw at lwyddiannau hanesyddol Wrecsam yn y gamp a dathlu treftadaeth gyfoethog y Fwrdeistref Sirol.
Bydd orielau newydd yn cael eu creu er mwyn arddangos casgliadau Amgueddfa Wrecsam, sy’n golygu gwell profiad i ymwelwyr, a lleoliad modern o’r radd flaenaf ar gyfer dysgu am hanes hynod ddiddorol a chyffrous ein rhanbarth ni yng ngogledd-ddwyrain Cymru.
Gan weithio ar y cyd â’r gymuned, bydd yr amgueddfa yn cynnal rhaglen o weithgareddau a digwyddiadau i ysbrydoli pawb sy’n ymweld i ddysgu, bod yn actif a chyflawni eu potensial.
Grantiau Datblygu Eiddo – £150,000
Gwelwyd buddsoddiad o £318,623 o’r Grantiau Datblygu Eiddo wedi’u dyrannu i wella blaen adeiladau a dod â gofod llawr masnachol gwag yn ôl i ddefnydd. Cefnogodd deg o fusnesau yng nghanol y ddinas a gwelwyd tri eiddo gwag yn dod yn ôl i ddefnydd.
Mae gwelliannau wedi cynnwys blaen siop newydd, arwyddion ac adfer nodweddion treftadaeth a gwelliannau effeithlonrwydd ynni i unedau masnachol, er mwyn helpu i gefnogi busnesau lleol i leihau eu biliau ynni.
Mae grantiau wedi cael eu defnyddio tuag at waith allanol i du blaen adeiladau, gan gynnwys:
- blaen siopau
- gwella ffenestri arddangos
- gwella arwyddion
- ffenestri a drysau
- toeau a simneiau
- rendro
- gwaith strwythurol
Buddsoddiad mawr yng nghanol y ddinas
Dywedodd y Cynghorydd Nigel Williams, Aelod Arweiniol Economi ac Adfywio, “Mae’n gyfnod cyffrous ar gyfer canol y ddinas gyda buddsoddiad anferth, nid yn unig gan Gyllid Trawsnewid Trefi, ond hefyd trwy nifer o ffynonellau ariannu eraill er mwyn sicrhau dyfodol disglair a llwyddiannus ar gyfer Wrecsam.
“Hoffwn ddiolch i’n swyddogion a Llywodraeth Cymru am eu hymrwymiad i wneud canol dinas Wrecsam yn lleoliad lle mae pobl eisiau byw, gweithio, dysgu, ymlacio, buddsoddi ac ymweld.
Derbyniwch y newyddion a’r wybodaeth ddiweddaraf yn syth i’ch mewnflwch
Efallai yr hoffech hefyd ddarllen Gorymdaith yng Nghanol y Ddinas i goffáu 80 mlynedd ers glaniadau D-Day
