Pan nad oes ffiniau i gariad, mae ganddo’r pŵer i greu rhywbeth gwirioneddol brydferth. Dyma’n union beth mae Kate a Lisa, cwpl LGBTQ ysbrydoledig, wedi’i gyflawni trwy eu taith anhygoel fel gofalwyr maeth yng Ngogledd Cymru. Yn eu hangerdd am amrywiaeth ac ymroddiad cyson, maent wedi creu teulu cariadus sy’n herio normau ac yn lledaenu empathi.
Yn eu geiriau eu hunain, dyma eu stori hyfryd nhw…
“Dwy flynedd yn ôl, daeth ein plant maeth i’n bywydau, ac maen nhw wedi dod yn rhan barhaol o’n teulu. Rydym yn teimlo’n hynod o ffodus i’w cael ac i allu darparu cartref cariadus iddynt. Mae gennym hefyd ein dau blentyn biolegol, felly mae ein cartref bob amser yn fwrlwm o weithgaredd. Mae wedi dod yn normal newydd i ni, ac ni fyddwn yn newid unrhyw beth.
“Mae gwylio pob un o’n plant yn tyfu ac yn magu hyder wedi bod yn galonogol iawn. Mae’r berthynas y maent yn ei rannu a’r caredigrwydd y maent yn ei ddangos tuag at ei gilydd y tu hwnt i eiriau.
“Mae ein plant wedi dysgu cymaint i ni am nerth a harddwch llawenydd syml. Mae ein plant maeth, yn arbennig, wedi dysgu sut i fwynhau chwarae ac archwilio’r byd o’u cwmpas. Wnawn ni byth anghofio’r tro cyntaf iddyn nhw fynd i’r traeth. Roedd arnynt ofn y tywod yn crafu eu coesau, ond yr wythnos diwethaf, roeddent yn rhedeg i mewn i’r môr yn eu dillad, yn chwerthin gyda hyfrydwch pur. Roedd yn foment mor arbennig i ni.
“Drwy gydol y daith hon, rydym wedi cael cefnogaeth anhygoel gan ein tîm gwaith cymdeithasol. Maen nhw wedi bod yno i ni bob cam o’r ffordd. Rydym hefyd wedi dadlau’n angerddol dros ein plant yn eu hysgolion, gan sicrhau eu bod yn cael y gofal a’r addysg orau bosibl. Rydym wedi mynychu nifer o gyrsiau i roi’r sgiliau angenrheidiol i ni’n hunain i ddiwallu eu hanghenion arbennig.
“Mae maethu wedi bod yn dipyn o daith hyd yma, gyda nifer fawr o uchafbwyntiau yn ogystal â chyfnodau mwy heriol. Mae wedi bod yn brofiad hollol anhygoel, er iddo droi allan i fod yn wahanol i’r hyn yr oeddem wedi’i ddychmygu i ddechrau. Rydyn ni wedi gorfod dysgu cymaint ar hyd y ffordd, ac mae wedi bod yn agoriad llygad go iawn.
“Rydyn ni’n llawn cyffro wrth i ni edrych ymlaen at y dyfodol a pharhau i gefnogi ein plant ar eu llwybrau unigryw. Mae’r teulu amrywiol a chariadus hwn rydyn ni wedi’i greu yn bopeth i ni. Rydym mor ddiolchgar am y daith hon.”
Wedi gweld twll yn y ffordd? Rhowch wybod i ni ar-lein – mae’n hawdd.
