Mae trigolion ledled Wrecsam yn cael eu gwahodd i ddweud eu dweud ar ddyfodol gwasanaethau gwastraff ac ailgylchu Bwrdeistref Sirol Wrecsam wrth i ymgynghoriad cyhoeddus newydd agor heddiw.
Mae strategaeth gwastraff newydd yn cael ei datblygu ar gyfer Wrecsam, sy’n nodi sut y gallwn barhau i wella gwasanaethau gwastraff ac ailgylchu, cynyddu ailgylchu a sicrhau bod y gwasanaeth yn diwallu anghenion trigolion yn y blynyddoedd i ddod.
Mae’r ymgynghoriad ar agor o ddydd Iau, 8 Hydref tan ddydd Llun, 26 Hydref, ac rydym am glywed gan gymaint o drigolion â phosibl.
Daw’r ymgynghoriad wrth i nifer o welliannau i wasanaethau gwastraff ac ailgylchu Wrecsam gael eu cyflwyno neu eu datblygu’n barod.
Mae’r rhain yn cynnwys:
- Casgliadau gwastraff gardd am ddim a gynigir o Ebrill 1, 2027, yn amodol ar gymeradwyaeth.
- Casgliadau gwastraff swmpus cost îs, gan helpu preswylwyr i waredu eitemau cartref mwy a chefnogi ymdrechion i leihau tipio anghyfreithlon.
- Sachau ailgylchu newydd mwy a thrymach i gynnig mwy o gapasiti ar gyfer papur a chardbord a helpu i’w hatal rhag chwythu i ffwrdd.
- Mwy o ddeunyddiau yn cael eu casglu ar ymyl y ffordd, gan gynnwys batris cartref.
- Casgliadau gwastraff gardd bob pythefnos trwy gydol y flwyddyn, ar wahân i’r Nadolig a’r Flwyddyn Newydd.
- Casgliadau gŵyl y banc, gan helpu i ddarparu gwasanaeth mwy cyson a lleihau aflonyddwch i breswylwyr.
Mae’r rhaglen ehangach hefyd yn cynnwys buddsoddiad mewn cerbydau sbwriel ac ailgylchu newydd, technoleg rheoli llwybrau newydd a mesurau ychwanegol i wella dibynadwyedd ac effeithlonrwydd casgliadau.
Mae’r rhaglen wella a gyhoeddwyd hefyd yn cynnwys cynwysyddion gwastraff bwyd ychwanegol a chasglu deunyddiau ychwanegol fel cartonau Tetra-Pak.
Cynyddodd cyfradd ailgylchu cartrefi Wrecsam o 60.6% yn 2023/24 i 65.1% yn 2024/25, ond mae angen cynnydd pellach i gyrraedd targed ailgylchu statudol Cymru o 70%.
Dywedodd y Cynghorydd David A Bithell, Aelod Arweiniol dros yr Amgylchedd, “Rydym am i drigolion fod yn rhan o’r sgwrs am ddyfodol gwastraff ac ailgylchu yn Wrecsam.
Rydym eisoes wedi dechrau gwneud gwelliannau i’r gwasanaeth, ond mae angen i’n strategaeth gwastraff newydd edrych ymhellach ymlaen a nodi sut rydym yn parhau i wella ailgylchu, dibynadwyedd a’r gwasanaeth rydyn ni’n ei ddarparu i drigolion.
Mae’r ymgynghoriad hwn yn gyfle i bobl ledled y fwrdeistref sirol ddweud wrthym am eu profiadau, beth sy’n bwysig iddyn nhw a ble maen nhw’n meddwl y gallwn ni wella.
A fyddech gystal â chymryd ychydig funudau i ddweud eich dweud.”
Bydd adborth a dderbynnir drwy’r ymgynghoriad yn cael ei ystyried wrth i’r strategaeth gwastraff derfynol gael ei chwblhau.
Dweud eich dweud
Mae’r ymgynghoriad ar agor rhwng 8 Hydref a 26 Hydref 2026.
Gallwch gwblhau’r ymgynghoriad ar Eich Llais.
