12 mis yn ôl, roedd dros 800 o bobl yn aros am asesiad therapi galwedigaethol… mae llai na 250 o bobl yn aros erbyn hyn.
Mae Gwasanaeth Therapi Galwedigaethol Cyngor Wrecsam wedi cymryd camau breision dros y flwyddyn ddiwethaf – gan gwtogi rhestrau aros yn sylweddol, a pharhau i ddarparu cefnogaeth o’r radd flaenaf.
Mae’r gwasanaeth yn helpu pobl sy’n ei chael hi’n anodd byw bywyd o ddydd i ddydd oherwydd problemau iechyd neu symudedd – gan eu helpu i ddod o hyd i’r gefnogaeth gywir, fel bod modd iddynt fyw mor annibynnol â phosibl a chael ansawdd bywyd da.
Ym mis Ebrill 2023, roedd yna 859 o bobl yn aros am asesiad Therapi Galwedigaethol, ond erbyn mis Mawrth 2024, roedd y ffigwr wedi’i ostwng i 248.
Mae’r gwasanaeth wedi cwtogi rhestrau aros drwy ganolbwyntio ar reoli’r galw, atal a recriwtio.
Mae’r Cynghorydd John Pritchard, Aelod Arweiniol Gofal Cymdeithasol i Oedolion, yn egluro mwy am y dull hwn…
Meddai: “Un o’r pethau pwysicaf a wnaethom oedd dyrannu 600 o asesiadau ar gontract i ddarparwr allanol. Gwnaeth hyn wahaniaeth mawr i restrau aros, gan olygu bod modd i staff ganolbwyntio ar agweddau eraill ar y gwasanaeth.
“Fe wnaethom hefyd lunio canllaw hunan gymorth er mwyn annog pobl i ddod o hyd i’w datrysiadau eu hunain, lle bo modd, o ran byw bywyd annibynnol o ddydd i ddydd. Mae’r canllaw wedi’i ddosbarthu ar draws adrannau ac mae ar gael ar wefan y Cyngor.
“Fe wnaethom hefyd sefydlu Clinig Asesu Cymunedol yng Nghanolfan Cunliffe, gydag ystafelloedd byw ffug – gan gynnwys ystafell ymolchi ac ystafell wely – lle’r oedd modd cynnal yr asesiadau.
“Bu i hyn hefyd ein helpu i weithio drwy’r rhestrau aros yn gyflymach, a’n galluogi i gyfeirio pobl at y canllaw hunan gymorth lle bo’n briodol.
“Mae’r holl bethau hyn wedi gwneud gwahaniaeth enfawr, ac er bod gennym gryn dipyn o waith i’w wneud o hyd, mae hi’n llawer haws ymdopi â’n rhestrau aros erbyn hyn.”
Mae recriwtio a chadw’r bobl gywir hefyd wedi chwarae rhan allweddol yn y prosiect hwn, drwy greu swyddi arbenigol, yn ogystal â mentrau i ddatblygu ein staff presennol.
Dywed y Cynghorydd Mark Pritchard, Arweinydd Cyngor Wrecsam, fod y cynnydd o ran Therapi Galwedigaethol yn dangos sut y mae’n rhaid i Gynghorau feddwl yn ehangach.
Meddai: “Mae galw uchel iawn am wasanaethau’r Cyngor, a gyda chyn lleied o adnoddau, mae’n rhaid i ni reoli’r galw hwnnw yn y ffordd orau bosibl. Mae’n rhaid i ni feddwl mewn ffordd wahanol a defnyddio dulliau newydd.
“Mae’r gwaith i gwtogi rhestrau aros yn ein Gwasanaeth Therapi Galwedigaethol dros y 12 mis diwethaf yn enghraifft wych o hyn – rydym wedi edrych ar sut y gallwn wneud pethau’n wahanol, a sut y gallwn helpu pobl i gefnogi eu hunain, lle bo modd.
“Mae’r tîm Therapi Galwedigaethol a’r adran gofal cymdeithasol ehangach wedi gweithio galed iawn ac wedi cyflawni canlyniadau rhyfeddol, ac er bod y rhain yn anawsterau ariannol digynsail i lywodraeth leol ar draws y 22 awdurdod yng Nghymru, mae’n dangos y gallwn barhau i fod yn arloesol o ran sut rydym yn darparu gwasanaethau ar gyfer ein cymunedau.”
