Mae Cyngor Wrecsam bellach wedi dyfarnu’r contract dymchwel i Garvey Demolition. Mae disgwyl i waith dymchwel Springfield ddechrau yn yr hydref, er mwyn gwneud lle i un o’r ailddatblygiadau tai cymdeithasol mwyaf y mae’r Cyngor wedi’i gynllunio yn y blynyddoedd diwethaf.
Mae holl ddeiliaid contract Springfield wedi cael eu hailgartrefu’n llwyddiannus mewn cartrefi addas ledled y Fwrdeistref Sirol cyn yr ailddatblygiad.
Mae’r cynigion yn cynnwys 58 o gartrefi newydd a fydd yn cynnwys amrywiaeth o fathau o eiddo sydd wedi’u cynllunio i ddiwallu’r anghenion tai a nodwyd ar y rhestr aros tai.
Mae’r ymgynghoriad cyhoeddus cychwynnol bellach wedi’i gwblhau, ac mae’r holl sylwadau wedi’u hystyried fel rhan o’r cynlluniau pellach.
Ni fydd Canolfan Cunliffe yn cael ei dymchwel yn ystod y cam hwn o’r prosiect.
Bydd y Cyngor yn cysylltu â Chanolfan Cunliffe a thrigolion cyfagos cyn unrhyw waith dymchwel i sicrhau eu bod yn cael gwybod.
Mae’r gwaith dymchwel yn rhan o gam cyntaf yr ailddatblygiad.
Dywedodd yr Aelod Arweiniol Tai, y Cynghorydd Terry Evans, “Bydd y gwaith dymchwel yn gam pwysig ymlaen yn yr ailddatblygiad, gan baratoi’r ffordd ar gyfer cartrefi newydd sydd wedi’u cynllunio i ddiwallu anghenion tai’r Fwrdeistref. Edrychwn ymlaen at weld y datblygiad yn mynd rhagddo.”
Mae’r camau nesaf yn cynnwys ceisio caniatâd cynllunio a’r cymeradwyaethau angenrheidiol ac ystyried yr adborth o’r ymgynghoriad.
Ar ôl hynny, bydd y ffocws ar benodi contractwr ar gyfer y cyfnod adeiladu a gweithio’n agos gyda nhw i ddechrau adeiladu’r cartrefi newydd.
Gallwch ddysgu mwy am ddatblygiadau’r dyfodol ar ein gwefan.
