Cyhoeddwyd y bydd Amgueddfa Bêl-droed Cymru ac Amgueddfa Wrecsam yn agor ei drysau am y tro cyntaf mewn pythefnos
Gyda hanner yr amgueddfa yn dathlu treftadaeth amrywiol pêl-droed yng Nghymru – o lawr gwlad i’r tîm cenedlaethol – mae’r llall yn canolbwyntio ar hanes cyfoethog Wrecsam, o’i gorffennol fel ardal lofaol i gyfnod mwy modern, sydd wedi siapio’r dref fel y mae hi heddiw.
Bydd yr amgueddfa’n agor am 10am ddydd Gwener 25 Medi 2026. Mae angen tocynnau am ddim i gael mynediad a gellir eu harchebu drwy www.amgueddfawrecsam.cymru o hanner dydd, Dydd Llun 14 Medi – dim ond hyn a hyn o slotiau amser sydd ar gael felly archebwch yn gynnar i sicrhau’r diwrnod ac amser o’ch dewis.
Wrth ymweld â’r amgueddfa fel rhan o ddigwyddiad rhagflas arbennig ac i nodi lansiad swyddogol y tocynnau mynediad am ddim, dywedodd y Gweinidog Cabinet dros Ddiwylliant a Chwaraeon, Heledd Fychan:
“Ar ôl bod yn ddigon ffodus i ymweld heddiw, allai ddim aros i weld yr atyniad nodedig hwn yn agor i’r cyhoedd yn hwyrach yn y mis. Mae’n dod â threftadaeth bêl-droed ein cenedl yn fyw tra hefyd yn dathlu’r hanes cyfoethog a’r cymunedau sy’n galw Wrecsam yn gartref. Mae pob arddangosfa a phob stori a adroddir yn rhan bwysig o’n stori genedlaethol, ac mae cymaint i ymwelwyr ei fwynhau a’i ddysgu.
“Byddwn yn annog pawb – o Wrecsam, o Gymru ac o ble bynnag maen nhw’n byw yn y byd – i ymweld a’r amgueddfa wych hon eu Hunain.”
Dywedodd y Cynghorydd Mark Pritchard, arweinydd Cyngor Wrecsam: “Mae cyffro mawr am agor Amgueddfa Bêl-droed Cymru ac Amgueddfa Wrecsam, ac roedd y digwyddiad hwn yn gyfle gwych i ddiolch i’r holl gyllidwyr cyn agor y drysau i’r cyhoedd yn ddiweddarach yn y mis.
“Mae pawb yn yr amgueddfa wedi rhoi blynyddoedd o waith caled i mewn i ddylunio a datblygu’r cynnwys rhyngweithiol ac ymdrochol. Mae cynnwys cymunedau lleol wrth guradu’r arddangosfeydd gwrthrychau wedi bod yn gyflawniad arbennig. Bydd adborth cadarnhaol gan y gweinidog a gwesteion eraill yn cael ei werthfawrogi’n fawr gan bawb. Hoffwn ddiolch yn bersonol i’r staff, unwaith eto, am eu hymroddiad i’r prosiect hwn ac edrychaf ymlaen at weld ymwelwyr â’r amgueddfa’n gwneud y mwyaf o’r atyniad hwn yng nghanol y ddinas.”
Mae’r atyniad newydd trawiadol yn ychwanegiad cyffrous at gynlluniau hamdden a theithio trigolion ac ymwelwyr â’r rhanbarth.
Dywedodd y Cynghorydd Paul Roberts, yr aelod arweiniol sy’n gyfrifol am amgueddfeydd: “Byddwn yn annog pawb sy’n byw yn lleol i archebu eu tocynnau ar unwaith, i fod ymhlith y cyntaf i weld eich amgueddfa newydd. Mae cymaint i’w fwynhau yma a rhywbeth i bawb, o gefnogwyr pêl-droed i bobl sy’n ymddiddori mewn hanes lleol. Mae’r caffi sy’n edrych dros y cwrt blaen yn lle gwych i orffwys yn ystod eich ymweliad.”
Mae croeso i bawb yn yr amgueddfa newydd – bydd ein cynorthwywyr profiad ymwelwyr a’n gwirfoddolwyr wrth law i’ch tywys drwy’r adeilad. Bydd pobl a oedd yn gyfarwydd â’r amgueddfa wreiddiol yn synnu i weld faint mae Adeiladau’r Sir wedi newid, a faint mwy sydd i’w weld a’i ddarganfod.
Rydyn ni’n falch o gael amgueddfa sy’n fwy priodol ar gyfer casgliad pêl-droed cenedlaethol a chasgliad hanes lleol o’r fath raddfa. Mae twf enfawr Wrecsam fel cyrchfan i ymwelwyr yn cyfiawnhau’r lefel o sylw i fanylion ac ansawdd sydd wedi’i gyflawni yma.
Bydd rhagor o fanylion am y penwythnos agoriadol, digwyddiadau sydd i ddod, gweithdai a gweithgareddau i’r teulu, yn ogystal â’n dolenni i archebu tocynnau am ddim, yn cael eu cyhoeddi ar ein gwefan.
Gwnaed ‘Amgueddfa Bêl-droed Cymru ac Amgueddfa Wrecsam’ yn bosib trwy gefnogaeth ein cyllidwyr: Llywodraeth Cymru, Cronfa Dreftadaeth y Loteri Genedlaethol, Trawsnewid Trefi Llywodraeth Cymru, Cronfa Ffyniant Gyffredin Llywodraeth y DU, The Wolfson* Foundation, Cronfa Grant Prynu V&A, a Chyngor Bwrdeistref Sirol Wrecsam.
Dilynwch sianeli cyfryngau cymdeithasol Amgueddfa Bêl-droed Cymru ac Amgueddfa Wrecsam am ddiweddariadau:
Facebook: @FootballMuseumWales @WrexhamMuseums
Instagram: @footballmuseumcymru @wrexhammuseum
Bluesky: @footymuseumcymru @wrexhammuseum
Twitter/X: @FootyMuseumWal
