Ydych chi’n cofio’r dyddiau diddiwedd hynny o haf yn chwarae y tu allan, yn dringo coed, reidio beiciau, gwneud persawr rhosyn, neu ddim ond ‘hongian allan’ yn y parc? Mae’r profiadau hyn yn rhan o’r hyn sy’n gwneud plentyndod mor arbennig. Nawr, mae’n bryd meddwl am brofiadau eich plant eich hunain a sut y gallwn eu cefnogi i gael eiliadau bythgofiadwy.
Mae Arolwg Chwarae Mawr Wrecsam ar gyfer Rhieni a Gofalwyr yn ymwneud â deall y cyfleoedd sydd gan blant i chwarae heddiw. Yn Wrecsam rydym am sicrhau bod gan blant ddigon o amser, lle a chaniatâd i chwarae a thrwy gwblhau’r arolwg hwn byddwn yn gallu adnabod ffyrdd o wella pethau.
Dwedodd yr Aelod Arweiniol dros Addysg, y Cynghorydd Phil Wynn: “Os ydych chi’n rhiant neu’n ofalwr i blentyn rhwng 0 a 17 oed, dyma’ch cyfle i ddweud wrthym am brofiadau eich plentyn, felly cymerwch ychydig funudau a llenwch yr arolwg. “Bydd eich adborth yn helpu i lunio ein blaenoriaethau i wneud Wrecsam yn lle hyd yn oed gwell i blant gael plentyndod iachach a hapusach.”
