Erthygl Gwadd Groundwork Gogledd Cymru
Diolch i arian gan Gronfa Dreftadaeth Genedlaethol y Loteri, mae Groundwork Gogledd Cymru yn falch o gyhoeddi ei fod yn lansio cwrs Hyfforddiant Tywys Cymunedol newydd. Bydd deg lle yn cael eu hariannu’n llawn ar gyfer unigolion 16 oed a throsodd sydd â diddordeb mewn crwydro yn yr awyr agored, dysgu am fannau gwyrdd, neu ddarganfod mwy am dreftadaeth ddiwydiannol yr ardal.
Mae’r hyfforddiant lefel mynediad hwn, a ddarperir gan Wales Best Guides, yn cynnig cyflwyniad difyr i grefft y tywysydd, gan ddilyn arferion gorau sy’n cael eu cydnabod yn fyd-eang tra’n rhoi sylw i straeon, tirweddau a phobl Gogledd Cymru. Bydd pawb sy’n cymryd rhan yn datblygu sgiliau siarad yn gyhoeddus ac yn gwella eu hyder, yn ogystal â darganfod sut mae natur wedi ailhawlio safleoedd treftadaeth ddiwydiannol ledled y rhanbarth.
Dywedodd Ruth Armstrong, Uwch Gydlynydd Ymgysylltu â’r Gymuned:
“Rydym yn falch iawn ein bod yn gallu cynnig y cyfle hyfforddiant hwn, ac rwy’n gobeithio y bydd yn helpu pobl i ailddarganfod cariad at Ddyffryn Clywedog mewn ffordd newydd a difyr.”
Yn ystod y cwrs bydd y cyfranogwyr yn arsylwi ar daith dywysedig broffesiynol, yn cydweithio mewn grwpiau i ymchwilio i hanes lleol, ac yn ymarfer cyflwyno darn tywys byr mewn lleoliad cyfeillgar a chefnogol. Does dim asesiadau ffurfiol, ond gall cyfranogwyr ddewis cwblhau cynllun archwilio a gweithredu personol a fydd yn cael ei adolygu gyda’r hyfforddwr.
Cynhelir yr hyfforddiant ym Mhyllau Plwm y Mwynglawdd dros bedwar sesiwn wythnosol, a fydd y para 5 awr yr un, 9:30am – 2:30pm ar ddydd Iau ar y dyddiadau canlynol: 26 Mehefin, 3 Gorffennaf, 10 Gorffennaf ac 17 Gorffennaf. Ar ôl cwblhau’r hyfforddiant, bydd cyfranogwyr yn derbyn Tystysgrif Presenoldeb gan WOTGA.
Gall y cwrs hwn arwain at gymwysterau tywys proffesiynol hefyd. Gall graddedigion fynd yn eu blaenau i ddilyn cyrsiau achrededig Lefel 1 a 2 Bathodyn Gwyn, lefel 3 Bathodyn Gwyrdd hyfforddiant tywys rhanbarthol, neu hyd yn oed cymhwyster Bathodyn Glas Lefel 4 (y ‘ddraig’), sy’n gymwys i Gymru gyfan. Gall y rhaglenni uwch arwain at gyfleoedd ar gyfer gwaith ac incwm llawrydd fel tywysydd WOTGA cymwysedig. I gofrestru neu gael rhagor o wybodaeth, cysylltwch â ruth.armstrong@groundworknorthwales.org.uk,
