Mae gwaith adnewyddu ar 58 a 58a Stryt yr Hôb wedi’i gwblhau ac mae’n gyflawniad sylweddol ar gyfer rhaglen Cynllun Treftadaeth Treflun Wrecsam (CTT) sy’n cefnogi gwarchod Ardal Gadwraeth canol ein dinas.
Mae’r cyllid grant a sicrhawyd o dan gynllun CTT Wrecsam wedi gwella ymddangosiad, cymeriad a swyddogaeth 58 a 58a Stryt yr Hôb trwy waith trwsio priodol i ffabrig hanesyddol yr adeiladau, adfer nodweddion pensaernïol coll a thrwy ddod â lloriau uchaf segur yn ôl i ddefnydd hyfyw.
Mae’r adeilad wedi cadw’r uned fasnachol ar y llawr gwaelod, gyda’r lloriau uchaf wedi’u troi’n unedau preswyl, gan ddarparu mannau byw cynaliadwy o ansawdd da yng Nghanol Dinas Wrecsam. Mae perchennog yr adeilad wedi arwyddo’r fflatiau 3 x 2 draw i Asiantaeth Gosodiadau Preifat CBSW sy’n cefnogi anghenion tai yn y Fwrdeistref Sirol.
Mae’r adnewyddu ar yr adeilad a ariannwyd drwy Gronfa Dreftadaeth y Loteri Genedlaethol a’r Cynllun Treftadaeth Treflun wedi gwella cymeriad yr ardal, gan greu cyfleoedd cyflogaeth, yn ogystal â chynnig cyfle i ddefnyddio adeilad amlwg yng nghanol y ddinas mewn modd gwell.
Mae’r gwaith adfywio wedi’i wneud mewn ffordd sy’n ategu ac yn gwella’r dreftadaeth leol a’r adeiladau traddodiadol yng nghanol y ddinas. Yn hanesyddol, mae Wrecsam wedi colli llawer o’i ffryntiau siopau traddodiadol lle defnyddiwyd deunyddiau a dyluniadau amhriodol nad oes ganddynt fawr ddim perthynas ag arddull draddodiadol yr eiddo presennol yn yr ardal gadwraeth.
Mae hon yn broblem barhaus yng nghanol y ddinas, ond gyda chymorth grant o dan y rhaglen CTT, bydd 58 a 58a Stryt yr Hôb yn gallu adfer ac ailsefydlu nodweddion ac arddulliau treftadaeth bensaernïol priodol, gan wella ymddangosiad a chymeriad cyffredinol yr Ardal Gadwraeth.
Dwedodd y Cynghorydd Nigel Williams, Aelod Arweiniol dros yr Economi: “Cefais fy nhywys o gwmpas yr adeilad sydd newydd ei adnewyddu’n ddiweddar. “Mae’n enghraifft wych o sut rydym yn adfywio canol y ddinas i’w gwneud yn gyrchfan fwy diddorol, cyffrous a bywiog i drigolion ac ymwelwyr â Wrecsam, yn ogystal ag ymrwymo i adferiad parhaus ein hardal gadwraeth.”
Perchennog yr eiddo Julie Rowlands: “Roedd yr help a’r cyngor a gefais gan swyddogion Cyngor Wrecsam cyn ac yn ystod y gwaith yn hynod werthfawr wrth weld y prosiect yn dwyn ffrwyth. Rwy’n falch iawn o weld lefel mor uchel o orffeniad i’r gwaith ac yn hapus bod yr adeilad hwn yng nghanol y ddinas, a oedd wedi cael ei danddefnyddio ers sawl blwyddyn, wedi cael ei adfer i’w hen ogoniant ac erbyn hyn yn darparu gofod busnes yn ogystal â gofod byw yng nghanol y ddinas.
“Allwn i wir ddim fod wedi ei wneud heb y cymorth cyllid grant gan Gyngor Wrecsam a’r Loteri Genedlaethol , a ‘dwi mor falch ein bod wedi achub yr adeilad. Da gallu adrodd bod yr holl denantiaid, preswyl a masnachol, yn gwneud yn dda ac yn mwynhau’r adeilad. “Soniodd adeiladwyr hefyd pan fuon nhw’n gweithio ar yr adeilad, bod siopwyr/y cyhoedd wedi dweud pa mor hyfryd yw’r adeilad nawr a pha mor hyfryd yr olwg yw Wrecsam. Hoffem ddiolch i Chwaraewyr y Loteri Genedlaethol am y cyllid a’r gefnogaeth.”
