Mae Ysgol yr Hafod yn Johnstown yn dathlu yn dilyn ei harolwg diweddar gan Estyn.
Ymwelodd arolygwyr â’r ysgol ym mis Medi 2025. Mae’r adroddiad, a gyhoeddwyd yr wythnos hon, yn nodi:
“Yn Ysgol Gynradd yr Hafod, mae disgyblion yn teimlo’n ddiogel, yn hapus ac yn barod i ddysgu. Mae’r ysgol yn meithrin chwilfrydedd ac yn cefnogi annibyniaeth yn effeithiol, sy’n creu hinsawdd gadarnhaol ar gyfer dysgu.
“Mae amgylcheddau sydd wedi’u cynllunio’n dda a chyfleoedd dysgu annibynnol pwrpasol yn annog disgyblion i archwilio, meddwl yn greadigol a gweithio ar y cyd. Mae’r profiadau hyn yn helpu disgyblion i ddod yn ddysgwyr hyderus, gwydn sy’n ymddwyn yn dda ac yn dangos parch at eraill.
“Mae staff yn gweithio’n effeithiol gyda disgyblion a rhieni i greu diwylliant o uchelgais a disgwyliadau uchel ac mae darpariaeth ar gyfer disgyblion ag anghenion dysgu ychwanegol yn gryfder nodedig yn yr ysgol.”
Mae’r adroddiad hefyd yn dweud: “Mae’r pennaeth yn darparu arweinyddiaeth gref ac effeithiol sy’n hyrwyddo disgwyliadau uchel a phartneriaethau cadarnhaol ymhlith staff, rhieni a disgyblion.
“Mae ethos cynhwysol yr ysgol, cyfathrebu clir a phrosesau sydd wedi’u rheoli’n dda yn helpu i gael gwared ar rwystrau i ddysgu a hyrwyddo lles disgyblion ac mae grwpiau arweinyddiaeth disgyblion yn hyrwyddo balchder yn eu hysgol.
“Mae athrawon a chynorthwywyr addysgu yn meithrin perthynas gynnes a chefnogol gyda disgyblion. Mae’r nodweddion hyn yn creu awyrgylch cadarnhaol a phwrpasol ar draws yr ysgol.”
Tynnwyd sylw at ddau ‘giplun’ cadarnhaol o’r ymweliad – cyfleoedd dysgu pwrpasol sy’n meithrin annibyniaeth a chreadigrwydd, a’r gweithdrefnau datblygu proffesiynol effeithiol ac arloesol.
Dywedodd y Pennaeth, Alison Heale: “Rwy’n eithriadol o falch o’r disgyblion, y staff a’r llywodraethwyr yma yn Ysgol yr Hafod a’r hyn rydym wedi’i gyflawni.
“Mae gennym dîm gwych o staff a chymuned gefnogol sy’n gweithio’n andros o galed i ddarparu’r gorau i’n disgyblion bob dydd.
“Diolch i’n rhieni am eu cefnogaeth barhaus a hefyd i’r staff, ac i lywodraethwyr yr ysgol am ymdrechu i ddarparu’r amgylchedd dysgu gorau posibl i’n holl blant.”
Dywedodd Cadeirydd y Llywodraethwyr, Victoria Williams: “Mae’r corff llywodraethu a minnau wrth fy modd gyda chanlyniad yr adroddiad. Cynhaliwyd yr arolwg yn ystod wythnosau cyntaf y tymor newydd ac rydym yn cymeradwyo ymdrechion ac ymroddiad ein staff eithriadol, gan fod yr ysgol mor barod ac wedi derbyn adroddiad mor ddisglair.
“Rydym yn hynod falch o’n hysgol a’r lle sydd ganddi yn ein cymuned gefnogol. Edrychwn ymlaen at barhau i ddarparu profiad dysgu rhagorol i’n disgyblion mewn lleoliad meithringar sy’n ysbrydoli positifrwydd, hyder a pharch.”
Gwnaeth arolygwyr ddau argymhelliad yn dilyn yr ymweliad:
- Sicrhau bod profiadau dysgu yn darparu’r lefel gywir o her i ddiwallu anghenion gwahanol y disgyblion
- Gwella ansawdd a chysondeb adborth i ddisgyblion fel eu bod yn deall y camau nesaf i wneud cynnydd yn eu dysgu.
Gallwch ddarllen yr adroddiad llawn ar wefan Estyn.
