Ar ôl y Nadolig, gall preswylwyr ddarganfod bod ganddynt ormod o wastraff a sbwriel. Oherwydd hyn, mae rhai pobl yn tipio eu sbwriel yn anghyfrifol.
Os nad yw’r gwastraff hwn yn cael ei waredu’n gywir, gallech gael hysbysiad cosb benodedig neu wynebu erlyniad.
Dyma rywfaint o wybodaeth allweddol i’ch helpu i osgoi camgymeriad costus iawn.
Tipio anghyfreithlon anfwriadol
Mae llawer o bobl wedi gwneud camgymeriadau syml yn ddiniwed sydd wedi costio’n ddrud iddyn nhw. Mae yna fathau o dipio anghyfreithlon y mae llawer o bobl yn eu gwneud yn rheolaidd a allai arwain at ddirwy neu erlyniad. Gall mathau o dipio anghyfreithlon gynnwys:
- Gadael eitemau diangen y tu allan i siopau elusen sydd ar gau.
- Gadael eitemau cartref ar stryd gydag arwydd “Gallwch eu cymryd am ddim”.
- Gadael bagiau o sbwriel wrth ymyl bin cyhoeddus.
- Gadael bagiau o sbwriel wrth ymyl eu bin du yn y gobaith y bydd y casglwyr sbwriel yn ei gymryd.
Talu am gael gwared ar wastraff
Os ydych chi’n talu am “Ddyn gyda fan” i ddod i gael gwared ar eich sbwriel, mae’n werth sicrhau eich bod chi’n diogelu eich hun. Os ydych chi’n talu rhywun i fynd â’ch gwastraff i ffwrdd ac maen nhw’n ei dipio yn anghyfreithlon, gallech chi fod yn gyfrifol.
Gwiriwch bob amser fod ganddynt drwydded cludwr gwastraff. Gallwch wirio bod ganddyn nhw un drwy chwilio ar wefan Cyfoeth Naturiol Cymru a gofyn i’w weld pan fyddan nhw’n dod.
Mae bob amser yn bwysig gwirio eu bod yn gallu darparu gwaith papur priodol a gwarantu gwaredu eich sbwriel yn briodol.
Cadwch brawf o unrhyw drafodion rhyngoch chi a’r person rydych chi wedi trefnu i wneud y gwaith.
Ble i ddod o hyd i safleoedd sbwriel
Ar draws Wrecsam, mae gennym nifer o ganolfannau ailgylchu gwastraff y cartref lle gallwch gael gwared ar eich sbwriel. Gellir dod o hyd i fanylion am bob un o’r rhain a mwy ar dudalen we ein canolfannau ailgylchu gwastraff y cartref.
Sylwch y bydd angen i chi ddod â phrawf eich bod yn byw yn y fwrdeistref sirol gan fod y safleoedd hyn ar gyfer preswylwyr Wrecsam yn unig. Gall enghraifft o brawf adnabod gynnwys bil trydan/nwy/dŵr gyda’ch cyfeiriad arno.
