Mae Wrecsam yn dathlu ar ôl ennill Aur a chael ei choroni’n enillydd y Categori Dinas Fach a Dinas yn Rowndiau Terfynol mawreddog RHS Prydain yn ei Blodau 2026.
Cyhoeddwyd y canlyniadau mewn seremoni wobrwyo yn Rochdale ar 20 Hydref, gan gydnabod gwaith caled ac ymroddiad timau Cyngor Wrecsam, sefydliadau cymunedol a gwirfoddolwyr sy’n helpu i wneud Wrecsam yn lle gwyrddach, glanach a mwy croesawgar.
Mae’r cyflawniad yn dilyn llwyddiant diweddar Wrecsam yng Nghymru yn ei Blodau, lle sicrhaodd y fwrdeistref sirol Aur yn y categori Dinas hefyd.
Yn ystod eu hymweliad ym mis Awst, bu beirniaid Prydain yn ei Blodau ar daith o amgylch nifer o leoliadau ar draws y fwrdeistref sirol, gan arddangos yr ystod eang o brosiectau garddwriaethol, amgylcheddol a chymunedol sy’n digwydd ledled Wrecsam.
Roedd eu llwybr yn cynnwys Parc Gwledig Tŷ Mawr, Perllan Pen-y-cae, Meithrinfa Pentrebychan a Gardd Furiog Erlas, cyn ymweld â chanol y ddinas i weld ei arddangosfeydd blodau lliwgar.
Ar hyd y ffordd, dysgodd y beirniaid am y rôl bwysig a chwaraeir gan wirfoddolwyr a hyfforddeion, yn ogystal â mentrau amgylcheddol gan gynnwys gwesty chwilod WRECSAM, systemau cynaeafu dŵr glaw, prosiectau ailgylchu a chompostio.
Tynnodd yr ymweliad sylw hefyd at y gwaith sy’n digwydd drwy gydol y flwyddyn i wella mannau gwyrdd, annog bioamrywiaeth a chreu amgylchedd deniadol i drigolion ac ymwelwyr.
Dywedodd Peter Barton-Price, Cadeirydd Cymru yn ei Blodau, “Mae’n bleser enfawr gen i, ar ran Cymru yn ei Blodau, i longyfarch Wrecsam yn ei Blodau ar gael ei henwi’n Enillydd Categori Dinas y DU 2026 gyda gwobr Aur.
Mae hwn yn gyflawniad gwirioneddol ragorol ac yn un sy’n adlewyrchu’r dull gweledigaethol, cydweithredol gan y Swyddogion, yr Aelodau Etholedig a’r gwirfoddolwyr sydd i gyd yn gweithio’n ddiflino i wneud Wrecsam yn lle gwyrddach, glanach a mwy croesawgar i bawb.
Mae ennill categori Dinas Prydain yn ei Blodau y DU 2026 yn gyflawniad rhyfeddol ac yn gydnabyddiaeth o’r safonau eithriadol y mae Wrecsam yn parhau i’w cyflawni. Dylen nhw i gyd fod yn hynod falch o’r hyn maen nhw wedi’i gyflawni gyda’i gilydd.
Rydyn ni’n dathlu’r llwyddiant hwn gyda nhw, maen nhw’n cynrychioli’r gorau o Gymru ac edrychwn ymlaen at weld Wrecsam yn parhau i ffynnu yn y blynyddoedd i ddod.”
Cafwyd llwyddiant pellach i Casglwyr Sbwriel Wrecsam, gyda dau wirfoddolwr yn derbyn Gwobr Hyrwyddwr Cymunedol yr RHS.
Mae’r gwobrau unigol yn cydnabod eu cyfraniadau eithriadol ac yn adlewyrchu ymroddiad ehangach gwirfoddolwyr Casglwyr Sbwriel Wrecsam, sy’n rhoi eu hamser yn rheolaidd i helpu i gadw cymunedau’n lân a chroesawgar.
Dywedodd y Cynghorydd Nigel Williams, Aelod Arweiniol dros yr Economi, Busnes a Thwristiaeth, “mae ennill aur a chael ein henwi fel enillydd cateogri Dinas a Dinas Fach ym Mhrydain yn ei Blodau yn gyflawniad gwych i Wrecsam ac yn rhywbeth y gallwn ni i gyd fod yn hynod falch ohono.
Mae’r gydnabyddiaeth genedlaethol hon yn tynnu sylw at y balchder yr ydym yn ei gymryd yn ein bwrdeistref sirol a’r ymdrech aruthrol sy’n mynd i wneud Wrecsam yn lle deniadol a chroesawgar i drigolion ac ymwelwyr.
Mae’n braf iawn gweld ein gwirfoddolwyr cymunedol yn cael eu cydnabod ochr yn ochr â’r llwyddiant hwn, a hoffwn longyfarch pawb sydd wedi chwarae rhan mewn cyflawni canlyniad rhagorol.”
Dywedodd y Cynghorydd David A Bithell, Aelod Arweiniol dros yr Amgylchedd, “Mae’r wobr hon yn adlewyrchiad o’r gwaith caled a’r ymroddiad a ddangoswyd gan dimau ein cyngor, grwpiau cymunedol a gwirfoddolwyr drwy gydol y flwyddyn.
Mae Prydain yn ei Blodau yn ymwneud â llawer mwy nag arddangosfeydd blodau. Mae’n cydnabod y gwaith sy’n cael ei wneud i ddiogelu ein hamgylchedd, annog bioamrywiaeth a gwella’r mannau gwyrdd y mae ein cymunedau yn eu mwynhau.
O’n prosiectau amgylcheddol i ymdrechion gwych Casglwyr Sbwriel Wrecsam, mae pawb sy’n cymryd rhan wedi cyfrannu at y llwyddiant hwn, a hoffwn ddiolch iddynt am eu hymrwymiad parhaus.
Mae’r cyflawniad diweddaraf yn ychwanegu at lwyddiant cynyddol Wrecsam mewn cystadlaethau rhanbarthol a chenedlaethol, gan gydnabod ymdrechion ar y cyd y rhai sy’n gweithio i wella amgylchedd y fwrdeistref sirol i bawb.
