Bob blwyddyn ym mis Mawrth, mae Diwrnod Arennau’r Byd yn cael ei nodi ledled y byd i godi ymwybyddiaeth o fethiant yr arennau.
Eleni, mae’r Uned Arennol yn Ysbyty Maelor Wrecsam yn ceisio helpu i ledaenu cymaint o ymwybyddiaeth â phosibl, gan fod hyd at 7.2 miliwn o bobl ledled y DU yn byw gyda’r clefyd ar hyn o bryd.
Mae Uned Arennol Wrecsam yn cynnwys nifer o dimau sy’n helpu i gefnogi cleifion cyn iddynt gael triniaeth, yn ogystal â chleifion sy’n cael triniaeth ar hyn o bryd a chleifion ar ôl iddynt gael trawsblaniad. Maen nhw hefyd yn gweithio ochr yn ochr â nifer o elusennau sy’n cynnig cymorth i bobl sy’n dioddef o fethiant yr arennau.
Felly sut ydych chi’n sylwi ar glefyd yr arennau? Mae canfod a thriniaeth gynnar yn helpu i arafu effeithiau’r clefyd sy’n newid bywydau, a gall symptomau gynnwys:
- Blinder eithafol
- Fferau, traed neu ddwylo’n chwyddo
- Llygaid neu wyneb pwfflyd yn barhaus
- Gwaed neu ewyn yn eich wrin
- Angen gwneud pi-pi yn amlach
- Croen yn cosi
- Anawsterau canolbwyntio
- Teimlo’n sâl neu’n chwydu
- Colli pwysau neu golli archwaeth am fwyd
- Diffyg anadl
- Anesmwythdra yng ngwaelod y cefn, yr ochr neu’r abdomen
Am ragor o wybodaeth, ewch i wefan Diwrnod Arennau’r Byd.
