Yn agor yn llawn yn ddiweddarach eleni, bydd Stori Brymbo, atyniad ymwelwyr dan arweiniad y gymuned, yn dod yn gyrchfan hanfodol yng ngogledd Cymru.
Bydd Stori Brymbo yn cadw ac yn adrodd hanes naturiol a diwydiannol cyfoethog Wrecsam drwy adrodd straeon, adfywio a phrosiectau dan arweiniad y gymuned lle mae’r gorffennol yn cwrdd â’r dyfodol.
Yn seiliedig ar safle hen Waith Dur Brymbo, bydd y safle yn cynnwys 3 adeilad sy’n adrodd straeon diwydiant yma drwy lensys Pobl, Haearn a Dur, Siop Goffi, man arddangos celf ac ardaloedd awyr agored.
Mae’r safle hefyd yn gartref i goedwig ffosil unigryw sydd wedi denu diddordeb rhyngwladol, gyda ffosilau yn cael eu darganfod o 300 miliwn o flynyddoedd yn ôl, pan oedd y tir yr ydym yn ei adnabod fel Wrecsam wedi’i leoli rhywle ger y cyhydedd! Y Goedwig Ffosil yw’r cloddiad byw cyntaf yn y byd, dan arweiniad y gymuned sy’n cynnwys gwirfoddolwyr cymunedol a myfyrwyr o 13 o Brifysgolion.
Ymwelodd Prif Weithredwr Ymddiriedolaeth Treftadaeth Brymbo, Nicola Eaton Sawford, a’r arweinydd cyfathrebu, Amanda Goodwin, â Chanolfan Gwybodaeth i Ymwelwyr Wrecsam yn ddiweddar i ychwanegu’r elfennau terfynol at arddangosfa am Stori Brymbo.
Mae’r arddangosfa yn cynnwys gwrthrychau o’r goedwig ffosil yn ogystal â chelf a chrefft fel canhwyllau cwyr gwenyn wedi’u gwneud â chwyr o’r cychod gwenyn ar y safle a chrochenwaith wedi’i wneud o glai o’r safle.
- Cofrestru -
Mae Canolfan Gwybodaeth i Ymwelwyr Wrecsam wedi’i lleoli ar Stryt Caer ac ar agor o ddydd Llun i ddydd Sadwrn: 9.30am – 4.30pm a gall ddarparu gwybodaeth i’ch helpu i archwilio’r ardal leol yn ogystal â chynnig amrywiaeth eang o fwyd a diod lleol, crefftau, rhoddion a nwyddau o Gymru/ Wrecsam.
Dywedodd yr Aelod Arweiniol dros Fusnes, Economi a Thwristiaeth, y Cynghorydd Nigel Williams, “Bydd Stori Brymbo yn ased gwych arall i Wrecsam pan fydd yn agor yn llawn yn ddiweddarach eleni. “Tan hynny gallwch gael syniad o’r hyn fydd ar gael drwy ymweld â’r VIC yn Wrecsam ar Stryd Caer.”
